ភ្នំពេញ ៖ រដ្ឋសភានៃព្រះរាជាណចក្រកម្ពុជា កាលពីល្ងាចថ្ងៃច័ន្ទ ទី០៣ ខែធ្នូ បានសម្រេចធ្វើវិសោធនកម្មច្បាប់ស្តីពីគណបក្សនយោបាយ ដើម្បីបើកផ្លូវឲ្យអ្នកនយោបាយ ដែលតុលាការហាមប្រាមធ្វើសកម្មភាពនយោបាយ ឲ្យធ្វើសកម្មភាពនយោបាយឡើងវិញ តាមរយៈសំណើរបស់នាយករដ្ឋមន្ត្រី។
ការសម្រេចបែបនេះ បានធ្វើឡើងភ្លាមៗបន្ទាប់ពីមានសេចក្តីថ្លែងការណ៍របស់រាជរដ្ឋាភិបាលកម្ពុជា ដើម្បីបន្ធូរស្ថានការណ៍សម្រាប់ប្រព័ន្ធផ្សព្វផ្សាយបរទេស សហជីព អង្គការសង្គមស៊ីវិល និងអ្នកនយោបាយប្រឆាំង ដែលត្រូវបានផ្សព្វផ្សាយដោយក្រសួងការបរទេស ហើយបើតាមរដ្ឋសភា គឺការធ្វើសេចក្តីស្នើច្បាប់ស្តីពីវិសោធនកម្មមាត្រា៤៥ថ្មី (ស្ទួន) នៃច្បាប់ស្តីពីគណបក្សនយោបាយ ដើម្បីផ្តល់សិទ្ធិដល់នាយករដ្ឋមន្ត្រី ស្នើព្រះមហាក្សត្រ ផ្តល់នីតិសម្បទាដល់អ្នកនយោបាយដែលបានហាមប្រាមនោះ ហើយបើទោះបីសេចក្តីស្នើច្បាប់ស្តីពីវិសោធនកម្មនោះមិនបានបញ្ជាក់ក៏ដោយ គេអាចសន្និដ្ឋានថា ចង់សំដៅដល់ថ្នាក់ដឹកនាំអតីតគណបក្សសង្គ្រោះជាតិចំនួន១១៨រូប ដែលត្រូវបានតុលាការកំពូលប្រកាសហាមមិនឲ្យធ្វើនយោបាយ ក្រោយពីរំលាយគណបក្សសង្គ្រោះជាតិ។
សេចក្តីស្នើច្បាប់ស្តីពី វិសោធនកម្មមាត្រា៤៥ថ្មី (ស្ទួន) នៃច្បាប់ស្តីពីគណបក្សនយោបាយនេះ ជាការបន្ថែមនូវវាក្យខណ្ឌមួយថ្មី ក្នុងមាត្រា៤៥ថ្មី (ស្ទួនមួយ) គឺ “បុគ្គលត្រូវបានតុលាការសម្រេចហាមឃាត់ការ ធ្វើសកម្មភាពនយោបាយ មិនអាចបង្កើតគណបក្សនយោបាយ ឬចូលរួមក្នុងគណបក្សនយោបាយណាមួយ ឬឈរឈ្មោះឲ្យគេបោះឆ្នោត ឬធ្វើសកម្មភាពណា មួយគាំទ្រ ឬប្រឆាំងគណបក្សណាមួយបានឡើយ។ បុគ្គលដែលបានតុលាការ សម្រេចហាមឃាត់ការធ្វើសកម្មភាពនយោបាយនេះ នឹងអាចទទួលបានវិញនូវសិទ្ធិនយោបាយពេញលេញដោយពេញច្បាប់ បន្ទាប់ពីផុតរយៈពេលនៃការហាមឃាត់ដែលកំណត់ដោយសាលដីការបស់តុលាការកំពូល ឬក្នុងករណីដែលបុគ្គលនោះត្រូវបានផ្តល់នីតិសម្បទាឡើងវិញដោយព្រះមហាក្សត្រ តាមសំណើរបស់នាយករដ្ឋមន្ត្រី តាមសេចក្តីស្នើសុំរបស់រដ្ឋមន្ត្រីក្រសួងមហាផ្ទៃ”។
ដូចសេចក្តីថ្លែងហេតុនៃសេចក្តីស្នើច្បាប់នេះបញ្ជាក់ថា វិសោធនកម្មខាងលើនេះ មានគោលដៅសំខាន់ៗ គឺដើម្បីបញ្ជាក់ឲ្យច្បាស់តាមផ្លូវច្បាប់អំពីករណីបុគ្គល ដែលត្រូវបានតុលាការហាមឃាត់ការធ្វើនយោបាយ និងបើកលទ្ធភាពឲ្យបុគ្គលប្រភេទខាងលើអាចទទួលបាននីតិសម្បទានឡើងវិញតាមច្បាប់ ហើយវិសោធនកម្មនេះក៏មានគោលបំណងពង្រឹងលទ្ធិប្រជាធិបតេយ្យសេរីពហុបក្ស នីតិរដ្ឋព្រមទាំងលើកម្ពស់ស្មារតីបង្រួបបង្រួមជាតិផងដែរ។
ទាក់ទងបញ្ហានេះ លោក ឡេង ប៉េងឡុង អ្នកនាំពាក្យរដ្ឋសភា ក៏បានរៀបចំសន្និសីទសារព័ត៌មានភ្លាមៗផងដែរ នៅល្ងាចថ្ងៃទី៣ ខែធ្នូ ដោយបានថ្លែងថា សេចក្តីវិសោធនកម្មច្បាប់ ស្តីពី គណបក្សនយោបាយមាត្រា៤៥ថ្មី(ស្ទួយមួយ) ជាវិសោធនកម្មច្បាប់ដែលមានការប្រញាប់ ហើយគណៈអចិន្ត្រៃយ៍រដ្ឋសភា នឹងបើកកិច្ចប្រជុំពិភាក្សាក្នុងពេលឆាប់ៗនេះដើម្បីដាក់ចូល សម័យប្រជុំរដ្ឋសភាពេញអង្គអនុម័តផងដែរ។ ប៉ុន្តែបើកសម័យប្រជុំនៅពេលណានោះ លោកមិនទាន់បានបញ្ជាក់ពីពេលវេលានៅឡើយទេ។ លោកបន្តថា សេចក្តីវិសោធនកម្មច្បាប់នេះ ក៏មានការជាប់ ពាក់ព័ន្ធនឹងការមន្ត្រីអតីតគណបក្សសង្គ្រោះជាតិ ដែលត្រូវបានតុលាការកំពូលហាមឃាត់ មិនឲ្យធ្វើនយោបាយផងដែរ។
តាមលោក ឡេង ប៉េងឡុង ការធ្វើវិសោធនកម្មនេះ ជាការគិតគូរដល់អ្នកនយោបាយដែលត្រូវបានតុលាការហាមឃាត់ធ្វើនយោបាយមិនឲ្យធ្វើសកម្មភាពនយោបាយ។ លោកបន្តថា អ្នកដែលច្បាប់ហាមឃាត់គឺអាចទទួលបាននីតិសម្បទា អាចទទួលបានសិទ្ធិធ្វើនយោបាយវិញ បន្ទាប់ពីមានសំណើពីនាយករដ្ឋមន្ត្រីស្នើព្រះមហាក្សត្រតាមដំណើររបស់រដ្ឋមន្ត្រីក្រសួងមហាផ្ទៃ។ លោកបន្ថែមថា វិសោធនកម្មច្បាប់នេះ ក៏ដោយសារតែពេលកន្លងមកច្បាប់មិនបានគិតគូរដល់អ្នកដែលត្រូវតុលាការហាមឃាត់នោះទេ ប៉ុន្តែពេលនេះការធ្វើវិសោធនកម្មច្បាប់នេះ គឺបានគិតគូរដល់អ្នកត្រូវតុលាការកំពូលហាមឃាត់ផងដែរ។
លោក ឡេង ប៉េងឡុង បានទទួលស្គាល់ថា កន្លងមកច្បាប់ក៏មានចន្លោះប្រហោងបន្តិចដែរ ដោយពុំបានគិតគូរដល់ពួកគាត់ ប៉ុន្តែឥឡូវនេះយើងគិតគូរដល់ពួកគាត់។ អ្នកទាំងនោះមិនត្រូវបាន នាយករដ្ឋមន្ត្រីវាយតម្លៃថា មិនបានធ្វើឲ្យប៉ះពាល់ដល់ផលប្រយោជន៍ជាតិអ្វីទេ។ ច្បាប់មាត្រា៤៥ចាស់ មិនគិតគូរគ្រប់ជ្រុងជ្រោយ ។ មាត្រា៤៥ស្ទួន ថ្មី១នេះ គឺបានគិតគូរ ទៅដល់១១៨រូបដែលតុលាការបានហាម ដើម្បីផ្តល់នីតិសម្បទាឡើងវិញ៕
Source: Kampuchea Thmey Daily
0 Comments