ភ្នំពេញ ៖ និស្សិតស្ម័គ្រចិត្តខ្មែរទាំងអស់ តាមរយៈអង្គការ សកម្មភាពយុវជនកម្ពុជា( CYA ) នឹងទទួលបានបទពិសោធន៍ ការពង្រឹងជំនឿ ជឿចិត្តលើខ្លួនឯង ការទទួលបានចំណេះដឹងផ្នែកភាសាបរទេសផ្សេងៗ ជុំវិញពិភពលោក ដោយពួកគាត់ អាចរៀនសូត្រពីគ្នាទៅវិញទៅមក ទាំងចំណេះដឹង និងវប្បធម៌ តាមរយៈការនិយាយភាសាបរទេសជាប្រចាំ ជាមួយចម្រុះជាតិសាសន៍ ហើយពួកគាត់នឹងធ្វើឲ្យខ្លួនឯង ជាមនុស្សដែលរឹងមាំ។
នេះបើតាមការបញ្ជាក់របស់ លោក ស៊ន សុផាត ប្រធានអង្គការសកម្មភាពយុវជនកម្ពុជា( CYA ) ក្នុង
វេទិកាស្ម័គ្រចិត្តអន្តរជាតិ ដែលបានធ្វើឡើង កាលពីព្រឹកថ្ងៃទី០១ ខែធ្នូ ឆ្នាំ២០១៨នេះ នៅមហាវិទ្យាល័យZAMAN ខណ្ឌទួលគោក រាជធានីភ្នំពេញ ដែលមាននិស្សិតមកពីមហាវិទ្យាល័យនានាប្រមាណជិត៣០០នាក់។
លោក ស៊ន សុផាត បានមានប្រសាសន៍ឲ្យដឹងថា វេទិកាស្ម័គ្រចិត្តអន្តរជាតិនេះ ត្រូវបានធ្វើឡើងជារៀងរាល់ឆ្នាំ ក្នុងគោលបំណងផ្តល់ព័ត៌មានដល់យុវជនពិសេសនិស្សិតខ្មែរទាំងអស់ ដែលចាប់អារម្មណ៍ទៅលើការងារស្ម័គ្រចិត្តទាំងក្នុង និងក្រៅប្រទេស ពួកគាត់អាចចូលរួមបាន ដោយការស្ម័គ្រចិត្ត។ CYA មានការងារស្ម័គ្រចិត្តច្រើន មានទាំងក្នុង និងក្រៅប្រទេស ហើយរៀងរាល់ឆ្នាំយើងតែងបានបញ្ជូននិស្សិតស្ម័គ្រទៅក្រៅប្រទេសរហូត។
ដោយឡែក ឆ្នាំនេះ តាមរយៈអង្គការសកម្មភាពយុវជនកម្ពុជា ( CYA ) យើងបានបញ្ជូននិស្សិតស្ម័គ្ររបស់យើងបានចំនួនជាង៧០នាក់ ទៅក្រៅប្រទេស ដូចជាប្រទេសជប៉ុន ចិន ហុងកុង តៃវ៉ាន់ ឥណ្ឌូណេស៊ី និងប្រទេសនៅតំបន់អឺរ៉ុប ដូចជាបារាំង អាល្លឺម៉ង់ អេស្តូនា។
លោកបានបន្តថា នេះជាព័ត៌មានមួយ យើងចង់ចែករំលែកទៅយុវជនទាំងអស់ បើពួកគាត់ចាប់អារម្មណ៍លើការងារស្ម័គ្រចិត្តតាមបែបអន្តរជាតិ ដែលមានអ្នកស្ម័គ្រចិត្តចម្រុះជាតិសាស្ត្រនេះ បើពួកគាត់ទំនេរពីការសិក្សា ពួកគាត់ អាចចូលរួមជាមួយអង្គការសកម្មភាពយុវជនកម្ពុជា ( CYA ) បាន ដោយCYA ជាអ្នកផ្តល់ឱកាស និងលើកទឹកចិត្ត។
លោកបន្តទៀតថា ការងារស្ម័គ្រចិត្តតាមរយៈអង្គការសកម្មភាពយុវជនកម្ពុជា ( CYA ) យុវជន ឬនិស្សិតដែលស្ម័គ្រចិត្ត នឹងទទួលបានបទពិសោធន៍ជាច្រើន ដូចជា ការពង្រឹងជំនឿចិត្តលើខ្លួនឯង ទទួលបានចំណេះដឹងផ្នែកភាសាបរទេសផ្សេង ជុំវិញពិភពលោក ពោលគឺពួកគាត់អាចរៀនសូត្រពីគ្នាទៅវិញទៅមកទាំងចំណេះដឹង និងវប្បធម៌ ដោយការនិយាយភាសាបរទេសជាប្រចាំ ហើយពួកគាត់នឹងក្លាយខ្លួនជាមនុស្សដែររឹងមាំ៕
Source: Kampuchea Thmey Daily
0 Comments