ភ្នំពេញ ៖ ពិតជារឿងដ៏គួរឲ្យអាម៉ាស់ខ្លាំងបំផុត ចំពោះបុគ្គលម្នាក់ ដែលត្រូវបានគេស្គាល់ថាជាថៅកែក្រុមហ៊ុននាំចូល និងផលិតភេសជ្ជៈមួយដ៏ធំនៅកម្ពុជា ខណៈថ្មីៗនេះ ត្រូវបានតារាប្រុសនិយមការសម្តែងលក្ខណៈភេទទី៣ គឺលោក គន់ រៀមរតនៈ ឬហៅ ចែរ៉ូហ្សា បានចេញមុខទម្លាយភាពអាម៉ាស់រឿងជំពាក់លុយចំនួន២១៥ដុល្លារ ថ្លៃចូលច្រៀងខារ៉ាអូខេ មានរយៈពេល៤ឆ្នាំ ដោយមិនព្រមទទួលខុសត្រូវលើថ្លៃសំណង។
បើតាមការបញ្ជាក់របស់ លោក គន់ រៀមរតនៈ បានរៀបរាប់ភ្ជាប់ជាមួយវិក្កយបត្រជំពាក់ប្រាក់នោះថា សរសេរឡើងចង់ស្រក់ទឹកភ្នែក ស្តាយចិត្តអាណិតចិត្តខ្លួនឯងមូលហេតុដែលធ្វើការជាស្រីKTV(ខារ៉ាអូខេ)ជិត១០ឆ្នាំមកហើយ តែមិនព្រមមានហ្នឹងគេសោះបង ប្អូន ជួយមើលបន្តិចមើល ប៉ុន្មានឆ្នាំហើយបុងមួយហ្នឹង…?។
តារាសម្តែង គន់ រៀមរតនៈ បានបន្តទៀតថា ជានាយកក្រុមហ៊ុននាំចូល និងផលិតភេសជ្ជៈមួយដ៏ធំនៅកម្ពុជា នាំសុទ្ធតែកំពូលតារាសម្តែង និងModel ល្បីៗ មកផឹកច្រៀងលេង មានទាំងម្តាយ ទាំងឪពុក និងប្អូនមួយពូជ ផឹកសុទ្ធតែស្រាថ្លៃៗ ដឹងអី ដល់ពេលគិតលុយ ….អូនទុកបុងហ្នឹងសិន ហើយចាំស្អែកបងឲ្យកូនចៅយកលុយមកសង។ ព្រះហើយ ដាច់ផ្ងារផឹង ស្អែកមែន ស្អែកជាង៤ឆ្នាំកន្លងផុតទៅហើយ បាត់ស្រមោលលោកនាយកក្រុមហ៊ុនសូន្យសុងឈឹង ខលមិនលើក ឆាតមិនតប blockឯងចោលទៀត អាណិតរាស្ត្រផង លោកនាយកក្រុមហ៊ុនអើយ។
គន់ រៀមរតនៈ បាននិយាយថា ស្រលាញ់ គោរព រាប់អាន ស្មោះត្រង់ អស់ត្រឹមរាស្ត្រម្នាក់ហ្នឹងហើយលោក វេចអង្ករដើររកទៅ ដែលស៊ូទ្រាំអត់ស៊ី អត់ចាយខ្លួនឯងទៅធានាបុងផឹកស៊ីជូនលោកនាយកក្រុមហ៊ុនអញ្ចឹងនោះ។ ជួយសែរ១ផង ក្រែងលោកនាយកក្រុមហ៊ុនម្នាក់នោះបានឃើញភ្ញាក់រលឹក នឹកឃើញអនុស្សាវរីយ៍ ផ្អែម ល្វីង ជូរចត់ កម្សត់កម្រជាមួយគ្នាកន្លងមក គាត់ឲ្យកូនចៅគាត់យកលុយមកសងរាស្ត្រ រហាម ម្នាក់នេះផង។
តារាសម្តែងលក្ខណៈភេទទី៣ លោក គន់ រៀមរតនៈ បានបញ្ជាក់ថា ទឹកលុយប៉ុណ្ណឹងវាមិនច្រើនទេសម្រាប់អ្នកមាន តែវាច្រើនណាស់សម្រាប់អ្នកក្រខ្សត់អត់ឃ្លាន តែខ្ញុំក៏មិនអាចទៅបំផ្លាញមុខមាត់ កិត្តិយសរបស់គេដោយសារទឹកលុយប៉ុណ្ណឹងបានដែរ បើទោះបីពេលនេះគេក្លាយជាអ្វី ខ្ញុំជាអ្វីក៏ដោយ សម្លឹង នឹកគិតត្រឡប់ក្រោយឲ្យបានវែងឆ្ងាយ នោះអ្នកហ្នឹងមើលឃើញរាល់អនុស្សាវរីយ៍ដែលធ្លាប់មានជាមួយគ្នា គេក៏ធ្លាប់ជាមនុស្សរបស់យើង យើងក៏ធ្លាប់ជាមនុស្សជាប្រយោជន៍គេ។
បន្ថែមពីលើនេះ លោក គន់ រៀមរតនៈ បានលើកឡើងថាដូចនេះ ការគោរព ស្រលាញ់ រាប់អានដោយភក្ដីភាពរបស់ខ្ញុំ គឺមិនអាចរលាយដោយទឹកលុយប៉ុណ្ណឹងជាដាច់ខាត។ ៤ឆ្នាំដែល ខ្ញុំស៊ូទ្រាំអត់ធ្មត់ ទាំងពេលខ្លះក្នុងខ្លួនឯងរកតែ៥.០០០រៀល បាយព្រឹកមិនបានផងនេះ គ្រាន់តែជាសារមួយសម្រាប់ក្រើនរំលឹកដល់លោកម្ចាស់បុងជំពាក់ និងជាមេរៀនមួយដល់អ្នកបម្រើការងារដូចខ្ញុំ កុំឲ្យលង់ខ្លួនដូចរឿងនេះ តែជឿថាមានច្រើននាក់ដែរជួបរឿងដូចនេះ៕
Source: Kampuchea Thmey Daily
0 Comments