ប្រធានាធិបតីម៉ិកស៊ិកលោក Andres Manuel Lopez Obrador បាននិយាយតាមទូរស័ព្ទជាមួយប្រធានាធិបតីអាមេរិកលោក Donald Trump កាលពីថ្ងៃពុធនិងបានពិភាក្សាគ្នាអំពីបញ្ហានៃការធ្វើចំណាកស្រុក។
លោក Lopez Obrador បាននិយាយថា មេដឹកនាំទាំងពីរបានពិភាក្សាគ្នាអំពីលទ្ធភាពនៃការបង្កើតកម្មវិធីរួមមួយសម្រាប់ការអភិវឌ្ឍនិងការបង្កើតការងារនៅតំបន់អាមេរិកកណ្តាលនិងនៅប្រទេសម៉ិកស៊ិក។
ទោះបីជាយ៉ាងណាក៏ដោយ សេតវិមានមិនបានឆ្លើយតបភ្លាមៗចំពោះសំណើសុំយោបល់ទេ។
ប្រធានាធិបតីម៉ិកស៊ិកបានអំពាវនាវអោយសហរដ្ឋអាមេរិកចូលរួមក្នុងកិច្ចខិតខំប្រឹងប្រែង “Marshall Plan” ដើម្បីបណ្តាក់ទុនប្រហែល២០ពាន់លានដុល្លារនៅក្នុងការវិនិយោគសាធារណៈនិងឯកជននៅតំបន់អាមេរិកកណ្តាលដើម្បីបង្កើតការងារដូច្នេះប្រជាជននៅទីនោះនឹងមិនចាំបាច់ធ្វើចំណាកស្រុកទៀតទេ។
ជនចំណាកស្រុករាប់ពាន់នាក់កំពុងរស់នៅក្នុងជម្រកដែលមានមនុស្សកកកុញនិងជំរំក្នុងទីក្រុង Tijuana បន្ទាប់ពីធ្វើដំណើរមកពីតំបន់អាមេរិកកណ្តាលដើម្បីគេចចេញពីភាពក្រីក្រនិងអំពើហឹង្សា។ ពួកគេប្រហែលជាត្រូវរង់ចាំរយៈពេលច្រើនសប្តាហ៍ឬច្រើនខែដើម្បីសុំសិទ្ធិជ្រកកោននៅតាមព្រំដែនសហរដ្ឋអាមេរិក។
ការធ្វើអន្តោប្រវេសន៍ខុសច្បាប់គឺជាប្រធានបទសំខាន់នៃយុទ្ធនាការប្រធានាធិបតីរបស់លោក Trump ហើយគាត់បានលើកឡើងអំពីបញ្ហានេះម្តងហើយម្តងទៀតមុនការបោះឆ្នោតពាក់កណ្តាលអាណត្តិកាលពីថ្ងៃទី៦ខែវិច្ឆិកានិងបានដាក់ពង្រាយកងទ័ពអាមេរិកចំនួន៥,៨០០នាក់ទៅកាន់ព្រំដែន។
លោក Trump បានរំលឹកឡើងវិញអំពីការសន្យាអំឡុងយុទ្ធនាការរបស់គាត់ក្នុងការកសាងជញ្ជាំងតាមបណ្តោយព្រំដែនអាមេរិក-ម៉ិកស៊ិកសូម្បីតែបន្ទាប់ពីប្រទេសម៉ិកស៊ិកបានច្រានចោលនូវតម្រូវការម្តងហើយម្តងទៀតរបស់គាត់ដែលថា ម៉ិកស៊ិកត្រូវចំណាយសម្រាប់គម្រោងតម្លៃរាប់ពាន់លានដុល្លារនេះក៏ដោយ។
ថវិកាសម្រាប់ជញ្ជាំងព្រំដែននេះគឺជាចំណុចជាប់គាំងមួយក្នុងកញ្ចប់ថវិកានៅចំពោះមុខសភាអាមេរិកហើយលោក Trump បានប៉ះទង្គិចជាមួយអ្នកប្រជាធិបតេយ្យឈានមុខលើបញ្ហានេះនៅក្នុងកិច្ចប្រជុំមួយកាលពីថ្ងៃអង្គារ៕ REUTERS
[caption id="attachment_1003936" align="alignnone" width="700"]
[/caption]Source: Kampuchea Thmey Daily
0 Comments