ចុះបង្ក្រាបទីតាំងហ្គេមមួយកន្លែង និងឃាត់ខ្លួនមនុស្ស២នាក់

Cambodia News January 29, 2019

ភ្នំពេញ ៖ គណៈបញ្ជាការឯកភាពខណ្ឌឫស្សីកែវ ដឹកនាំដោយ ឯកឧត្ដម ជា ពិសី អភិបាលខណ្ឌ ដោយមានការសម្របសម្រួលពី លោកស្រី សុង ឆវ័ន្ត ព្រះរាជអាជ្ញារង អមសាលាដំបូងរាជធានីភ្នំពេញ បានចុះពិនិត្យ និងបង្ក្រាបទីតាំងសេវាកម្សាន្តអ៊ីនធឺណិត ដែលលបលួចបង្កប់សេវាល្បែងស៊ីសងប្រភេទភ្នាល់បាល់ តាមប្រព័ន្ធអនឡាញ ដែលមានម្ចាស់ ឈ្មោះ ទូច វាសនា មួយកន្លែងឃាត់ខ្លួនជនសង្ស័យ២នាក់ និងវត្ថុតាងមួយចំនួន។

ប្រតិបត្តិការណ៍បង្ក្រាបនេះ ធ្វើឡើងកាលពីវេលាម៉ោង១១និង៣០នាទី ថ្ងៃទី២៩ ខែមករា ឆ្នាំ២០១៩ស្ថិតនៅផ្លូវជាតិលេខ៥ ភូមិផ្សារតូច សង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ។

អាជ្ញាធរបានឲ្យដឹងថា ជាលទ្ធផល បានដកហូតនូវកុំព្យូទ័រចំនួន១៤គ្រឿង ទូរទស្សន៍០១គ្រឿង និងឃាត់ខ្លួនជនសង្ស័យ០២នាក់ ដែលជាអ្នកមើលការខុសត្រូវទីតាំងខាងលើ។

បច្ចុប្បន្ន សម្ភារៈ ដែលបានដកហូត រួមទាំងមនុស្ស បានយក និងនាំខ្លួនទៅរក្សាទុកនៅអធិការដ្ឋាននគរបាលខណ្ឌឫស្សីកែវ ដើម្បីចាត់ការតាមនីតិវិធីច្បាប់។

សូមបញ្ជាក់ថា ម្ចាស់ល្បែងស៊ីសងខាងលើ ដោយអាងខ្នងធំនៅពីក្រោយ មិនដែលខ្លាចអ្នកណាឡើយ សូម្បីតែប៉ូលិស ក៏គេមិនខ្លាចដែរ៕