សកម្មជន​លទ្ធិប្រជាធិបតេយ្យ​អូស្ត្រាលី​ត្រូវបាន​ឃុំខ្លួន​នៅក្នុង​ប្រទេស វៀតណាម

សកម្មជន​គាំទ្រ​លទ្ធិប្រជាធិបតេយ្យ​ជនជាតិ​អូស្ត្រាលី​ដើមកំណើត​វៀតណាម​ដ៏​លេចធ្លោ​ម្នាក់​ត្រូវបាន​ឃុំខ្លួន​ដោយ​សេវា​សន្តិសុខ​នៅពេល​វិល​ត្រលប់​មកកាន់​ទីក្រុង​ហូជីមិញ​វិញ​។ នេះ​បើតាម​ការ​ឲ្យ​ដឹង​នៅ​ថ្ងៃ​សុក្រ​ពី​សហសេវិក​របស់​គាត់​។​

ការឃុំ​ឃាំង​លោក Chau Van Kham បាន​កើតឡើង​ប៉ុន្មាន​ថ្ងៃ​បន្ទាប់ពី​អ្នកសរសេរ​ប្លុក​និង​ជា​អ្នកនិពន្ធ​ជនជាតិ​អូស្ត្រាលី​ម្នាក់ទៀត​ត្រូវបាន​ចាប់ខ្លួន​នៅក្នុង​ប្រទេស​ចិន​។​

យោងតាម​សហសេវិក​ឈ្មោះ Phong Nguyen បាន​ឲ្យ​ដឹងថា អ្នកជំនួញ​ចូលនិវត្តន៍​រូបនេះ​កំពុង​បំពេញបេសកកម្ម “​ស្វែងរក​ការពិត​” នៅក្នុង​ប្រទេស​នេះ​ដោយ​ចូល​តាមរយៈ​ប្រទេស​កម្ពុជា​។​
​បុរស​ទាំងពីរ​នាក់​នេះ​គឺជា​សមាជិក​នៃ​ក្រុម Viet Tan ដែលជា​ក្រុម​មួយ​ក្នុងចំណោម​ក្រុមប្រឆាំង​រដ្ឋាភិបាល​ដែល​ទីក្រុង​ហាណូយ​ចាត់ទុកថា​ជា​អង្គការ​ភេរវកម្ម​។​

អាជ្ញាធរ​វៀតណាម​បាន​ចោទប្រកាន់​ក្រុម Viet Tan ថា​បាន “​ញុះញង់​ឲ្យ​មាន​អំពើហិង្សា​” ដែលជា​ការចោទប្រកាន់​មួយ​ត្រូវបាន​ក្រុម​នេះ​បដិសេធ​។​

សហសេវិក​បាន​និយាយថា ពួកគេ​មិនបាន​ដឹង​ពី​កន្លែង​ដែល​លោក Chau ត្រូវបាន​គេ​ឃុំខ្លួន​ឬក៏​ថា​តើ​រដ្ឋាភិបាល​អូស្ត្រាលី​ត្រូវបាន​គេ​អនុញ្ញាត​ឲ្យ​ផ្តល់ជំនួយ​កុងស៊ុល​ដែរ​ឬ​អត់​នោះទេ​។​

គេ​ជឿថា គាត់​ត្រូវបាន​គេ​ឃុំខ្លួន​កាលពី​ថ្ងៃទី​១៣​ខែមករា​ខណៈ​ប្រពន្ធ​និង​ក្រុមគ្រួសារ​របស់គាត់​នៅតែ​កំពុង​ស្ថិតក្នុង​ទីក្រុង​ស៊ីដនី​។​

លោក Phong Nguyen បាន​និយាយថា “​នៅពេលនេះ យើង​មិនដឹងថា​គាត់​នៅទីណា​ទេ​។ គាត់​បានដឹង​ពី​ហានិភ័យ​ប៉ុន្តែ​គាត់​បាន​ប្តេជ្ញាចិត្ត​បន្តដំណើរ​ស្វែងរក​ការពិត​នេះ​”​។ លោក​បន្ថែមថា ដំណើរ​នេះ​ត្រូវបាន​រៀបចំឡើង​ដើម្បី​វាយតម្លៃ​អំពី​បញ្ហា​សិទ្ធិមនុស្ស​នៅក្នុង​ប្រទេស​។​

ប្រទេស​វៀតណាម​គឺជា​រដ្ឋ​ឯក​បក្ស​ដែលមាន​ការគាបសង្កត់​យ៉ាងខ្លាំង​ចំពោះ​ការរិះគន់​ណាមួយ​លើ​គណ​បក្សកុម្មុយនិស្ត​ដែល​កំពុង​កាន់អំណាច​។​

អង្គការ​ឃ្លាំមើល​សិទ្ធិមនុស្ស Freedom House បានដាក់​ចំណាត់ថ្នាក់​ប្រទេស​នេះ​ថា “​មិនមាន​សេរីភាព​” ហើយ​អង្គការ​ឃ្លាំមើល​សិ​ទិ្ធ​មនុស្ស Human Rights Watch បាន​ចោទប្រកាន់​រដ្ឋាភិបាល​កាលពីពេល​ថ្មីៗ​នេះ​ថា បាន “​បង្កើន​ការបង្ក្រាប​”៕ AFP

​

Source: Kampuchea Thmey Daily