ក្លិប​សូ​ទី​ឡូ​អង្គរ បន្ត​កិច្ចសន្យា​ជាមួយ​កីឡាករ​ជនជាតិ​ជប៉ុន​ចាស់​ម្នាក់ ​រហូតដល់​២​រដូវ​កាល​

ក្លិប​បាល់ទាត់​សូល​ទី​ឡូ​អង្គរ (Soltilo Angkor FC) ដែល​សមាជិក​ពានរង្វាន់​លី​គ​កំពូល​កម្ពុជា Metfone Cambodian League នៅ​រដូវ​កាល​ឆ្នាំ​២០១៩ ខាងមុខនេះ បាន​បង្ហាញ​ថា ​ក្លិប​សម្រេច​បន្ត​កិច្ចសន្យា​២​ឆ្នាំ​ទៀត ​ជាមួយ​ខ្សែបម្រើ​ជនជាតិ​ជប៉ុន ដែល​ធ្លាប់​ប្រកប​អាជីព​នៅ​ក្លិប​ណាហ្គា​វើ​ល និង​យុវជន​ក្រោម​អាយុ​១៩​ឆ្នាំ​របស់​ក្រុម​ជម្រើស​ជាតិ​ជប៉ុន​។​

​កីឡាករ​ថ្មី​រូបនេះ ​ក្លិប​បាន​បញ្ជាក់ថា ​មានឈ្មោះ KENTO FUJIHARA​ កើត​នៅ​ថ្ងៃទី​២៩ ខែ​មករា ឆ្នាំ​១៩៩២​ នៅ​ទីក្រុង​Kanagawa Prefecture ប្រទេស​ជប៉ុន ដោយ​លេង​ក្នុង​តួនាទី ជា​ខ្សែ​ការពារ​។ មុន​ចុះ​កិច្ចសន្យា​រយៈពេល​២​រដូវ​កាល​ជាមួយ​ក្លិប​នៅ​ខេត្តសៀមរាប មួយ​នេះ​ កីឡាករ Fujihara ធ្លាប់ជា​អតីត​កីឡាករ​នៅ​ក្លិប​ណាហ្គា​វើ​ល កាលពី​រដូវ​កាល​២០១៧ ខណៈ​នៅ​រដូវ​កាល​ឆ្នាំ​២០១៦ ​គេ​លេង​នៅ​ក្លិប​Albirex Nigata Singapore​។ កីឡាករ​រូបនេះ​ធ្លាប់​ជា​សមាជិក​ក្នុង​ក្រុម​ជម្រើស​ជាតិ​ជប៉ុន ក្រោម​អាយុ​១៩​ឆ្នាំ​ផងដែរ​។​

​យោងតាម​ការកំណត់​របស់​សហព័ន្ធ​កីឡាបាល់ទាត់​កម្ពុជា (​ស​.​ប​.​ក​) បាន​បញ្ជាក់​ថា​ ​ក្លិប​ជា​សមាជិក​របស់​លី​គ​ខ្លួន​មាន​សិទ្ធិ​ចុះបញ្ជី​កីឡាករ​បរទេស​ចំនួន​៥​នាក់ ​ប៉ុន្តែ​ដាច់ខាត ​ក្នុងនោះ​ត្រូវតែមាន​កីឡាករ​ជា​ជនជាតិ​សមាជិក​ទ្វីបអាស៊ី​១​រូប​។ ដូច្នេះ​ក្រុម​សូល​ទី​ឡូ​អង្គរ មាន​កីឡាករ​បរទេស​គ្រប់​ចំនួន​ហើយ ដោយ​ក្នុងនោះ​មាន​កីឡាករ Kento Fujihara,Unno Tomoyuki,Motoyama Kota,Fumiya Kogure,Yuta Kikuchi ដែល​សុទ្ធ​ជា​ជនជាតិ​ជប៉ុន​។​

​សូមបញ្ជាក់ថា ​ក្រុម​សូល​ទី​ឡូ​អង្គរ កាលពី​ស្ថិតនៅក្រោម​ការដឹកនាំរ​ប​ស់ លោក Yuki Matsuda​ដែល​ជា​គ្រូបង្វឹក​ចាស់ បាន​ឈរ​នៅ​ចំណាត់ថ្នាក់​លេខ​១០ ក្នុងចំណោម​សមាជិក​ទាំង​១២​ក្នុង​ពានរង្វាន់​លី​គ​កំពូល​កម្ពុជា រដូវ​កាល​ឆ្នាំ​២០១៨​ក្រោយ​រក​បាន​ជ័យជម្នះ​ចំនួន​៥​លើក​ហើយ ​ធ្លាប់​ស្មើ​៥​លើក​ និង​ចាញ់​១២ លើក​មាន​២០​ពិន្ទុ ដែល​អាច​បន្ត​ក្នុង​លី​គ​កំពូល​រដូវ​កាល​បន្ទាប់​ទៀត​។ ចំណែក​ក្នុង​ពាន​រ​ង្វាន់​សម្ដេច​តេ​ជោ ហ៊ុន សែន វិញ​ ក្រុម​សូល​ទី​ឡូ​អង្គរ បាន​ធ្លាក់​ត្រឹម​វគ្គ​១៦​ក្រុម​ចុងក្រោយ បន្ទាប់ពី​ចាញ់​គូប្រជែង​ក្នុង​ខេត្ត​តែមួយ​ គឺ​អង្គ​រថា​យ​ហ្គឺ​រ ដោយ​លទ្ធផល​ទាំង​២​ជើង​៣​ទល់​២៕

 

Source: Kampuchea Thmey Daily