កំពង់ធំ ៖ លំនៅដ្ឋានប្រជាពលរដ្ឋមួយខ្នង ដែលសង់អំពីឈើប្រក់ក្បឿង មានទំហំ ៧ម៉ែត្រ X ១១ម៉ែត្រ ត្រូវបានអគ្គិភ័យ លេបត្របាក់យក យ៉ាងសន្ធោសន្ធៅ ព្រមទាំងបានបំផ្លាញទ្រព្យសម្បត្តិមួយចំនួនទៀត។
ហេតុការណ៍អគ្គិភ័យនេះ បានកើតឡើងនៅវេលាម៉ោង១១និង២០នាទី ថ្ងៃទី២៨ ខែមករា ឆ្នាំ២០១៩ នៅក្នុងភូមិកំពង់ធំ សង្កាត់កំពង់រទេះ ក្រុងស្ទឹងសែន ខេត្តកំពង់ធំ។
ប្រភពព័ត៌មានពីម្ចាស់ផ្ទះបានបង្ហើបឲ្យដឹងថា ជារៀងរាល់ថ្ងៃ ក្រុមគ្រួសាររបស់គាត់បានទៅរស់នៅផ្ទះម្តាយក្មេក នៅទល់មុខផ្ទះឆេះ ហើយផ្ទះរបស់គាត់បិទទ្វារចោល ស្រាប់តែមកដល់ព្រឹកថ្ងៃកើតហេតុ ផ្ទះម្តាយក្មេកបានដាច់ភ្លើង ហើយក្រឡេកមកមើលផ្ទះរបស់ខ្លួន ក៏ឃើញមានអណ្ដាតភ្លើង កំពុងឆាបឆេះយ៉ាងសន្ធោសន្ធៅ ទើបមានការភ្ញាក់ផ្អើល ដល់អ្នកជិតខាង ស្រែកឆោឡោ និងរត់មកជួយពន្លត់។ បន្ទាប់មកបានឃើញរថយន្តបាញ់ទឹករបស់ស្នងការដ្ឋានខេត្តកំពង់ធំ ជួយអន្តរាគមន៍ បាញ់ពន្លត់ អស់ជាច្រើនឡាន ទើបបណ្តាលឲ្យអណ្ដាតភ្លើងរលត់អស់១០០% និងមិនឆេះរៀលដាល ដល់ផ្ទះអ្នកជិតខាង។
លោក ហៀង ហ៊ល ស្នងការរងអគ្គិភ័យ បានប្រាប់ឲ្យដឹងថា ករណីនេះ កម្លាំងសមត្ថកិច្ចចម្រុះ បានចុះជួយអន្តរាគមន៍បាញ់ទឹកភ្លាមៗ អស់ចំនួន៧ឡាន ទើបអាចទប់ទល់ស្ថានភាពបាន។
លោកបន្តថា ម្ចាស់ផ្ទះរងគ្រោះ ឈ្មោះ ឡេក គឹមហួរ អាយុ៣៦ឆ្នាំ រស់នៅភូមិឃុំកើតហេតុខាងលើ ករណីនេះបានឆេះអស់ផ្ទះមួយខ្នងទាំងស្រុង និងទ្រព្យសម្បត្តិមួយចំនួនមាន ដូចជា សំលៀកបំពាក់ គ្រឿងអលង្ការ ខ្សែក ចិញ្ចៀន គ្រឿងសង្ហារិម និងម៉ូតូស៊េរីចាស់២គ្រឿង។
ជាមួយគ្នានេះ លោកក៏បាន អំពាវនាវដល់បងប្អូនប្រជាពលរដ្ឋ សុំឲ្យមានការប្រុងប្រយ័ត្នខ្ពស់ ចំពោះបញ្ហាគ្រោះអគ្គិភ័យតែងតែកើតឡើងជាយថាហេតុ នៅរដូវប្រាំងនេះ៕
Source: Kampuchea Thmey Daily
0 Comments