ព្រឹត្តិការណ៍ប្រកួតកីឡាស៊ីហ្គេមលើកទី៣០ កំពុងតែចាប់ផ្តើមរាប់ថយក្រោយ(Countdown) ដោយបានចាប់ផ្ដើមតាំងពីថ្ងៃទី៣០វិច្ឆិកាមកម្ល៉េះ ដែលមកទល់ពេលនេះ មានរយៈពេលជិត២ខែហើយ។
ការប្រកួតកីឡាស៊ីហ្គេមលើកទី៣០ ដែលនឹងធ្វើនៅប្រទេសហ្វីលីពីន នាចុងឆ្នាំ២០១៩នេះ នឹងធ្វើពីថ្ងៃទី៣០វិច្ឆិកា ដល់ ថ្ងៃទី១១ធ្នូ។ ចំពោះ រូបMascot សម្រាប់ការប្រកួតលើកនេះ ក៏បានឯកភាពគ្នាអស់ហើយដែរ។
បាវចនាសម្រាប់ព្រឹត្តិការណ៍ស៊ីហ្គេមលើកទី៣០នេះ គឺ”យើងឈ្នះជាមួយ” ។ នេះជាលើកទី៤ហើយដែលប្រទេសហ្វីលីពីនទទួលធ្វើជាម្ចាស់ផ្ទះ នៃព្រឹត្តិការណ៍នេះ។ ហ្វីលីពីន ធ្វើម្ចាស់ផ្ទះស៊ីហ្គេមលើកដំបូងនៅឆ្នាំ១៩៨១ លើកទី២ឆ្នាំ១៩៩១ លើកទី៣ឆ្នាំ២០០៥ និងលើកទី៤ឆ្នាំ២០១៩នេះ។
ការសម្រេចចិត្តចុងក្រោយកាលពីចុងឆ្នាំ២០១៨ គឺកីឡាចំនួន៥៦ប្រភេទ ដែលមាន៥២៣វិញ្ញាសាត្រូវបានដាក់ឲ្យប្រកួត។ កីឡាអេឡិចត្រូនិក(Electronic Sports)ត្រូវបានដាក់បញ្ចូលទៅក្នុងកម្មវិធីប្រកួតកីឡាថ្នាក់តំបន់នេះជាលើកដំបូង ក្នុងខណៈដែលប្រទេសម្ចាស់ផ្ទះមួយនេះបន្ថែមកីឡាប្រយុទ្ធប្រពៃណីរបស់ខ្លួន គឺកីឡាអារនីស(Arnis)ទៅក្នុងកម្មវិធីប្រកួតដែរនោះ។
អត្តពលិកពី១១ប្រទេស ដែលចូលរួមនោះ គេប៉ាន់ប្រមាណមើលថា អាចមានចំនួន៩.៨៤០នាក់ តែចំនួននេះនឹងអាចប្រែប្រួល។ តាមការគ្រោងទុកពិធីបើកការប្រកួតនឹងធ្វើនៅពហុកីឡដ្ឋានBocaue ហើយតាមការគ្រោងទុកនោះ លោកប្រធានាធិបតីហ្វីលីពីននឹងចូលរួម។ ចំពោះពិធីបិទនឹងធ្វើនៅពហុកីឡដ្ឋានAthletcs។
សម្រាប់ស៊ីហ្គេមលើកទី៣០នេះ បើតាមការអះអាងពី លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាបញ្ជាក់ថា នឹងបញ្ជូនកីឡាទៅចូលរួមប្រកួតឲ្យបានច្រើនជាងមុនព្រោះនេះជាឆ្នាំយុទ្ធសាស្ត្រ។ នៅឆ្នាំ២០២១ ស៊ីហ្គេម លើកទី៣១ នៅវៀតណាមកម្ពុជា ក៏នឹងបញ្ជូនទៅចូលរួមប្រកួតច្រើនដែរ។
ពេលនេះគណៈកម្មាធិការជាតិអូឡាំពិកកម្ពុជា និង ក្រសួងអប់រំយុវជន និង កីឡានៅមិនទាន់កំណត់ថា បញ្ជូនទៅចូលរួមប៉ុន្មានប្រភេទ ហើយប្រភេទកីឡាណាខ្លះនោះនៅឡើយទេ។
ព្រឹត្តិការណ៍ស៊ីហ្គេមកន្លងមក បានក្លាយជាព្រឹត្តិការណ៍មួយ ដែលប្រទេសជាម្ចាស់ផ្ទះតែងតែរៀបចំដើម្បីប្រមូលមេដាយ។ សម្រាប់កម្ពុជា ដែលនឹងធ្វើជាម្ចាស់ផ្ទះនៅឆ្នាំ២០២៣នោះ លោក ថោង ខុនប្រធានគណៈកម្មាធិការជាតិអូឡាំពិកកម្ពុជា បានសម្រេចចិត្តហើយថា នឹងធ្វើដោយតម្លាភាព។
ប្រសិនបើការប្រកួតកីឡាស៊ីហ្គេមលើកទី៣០ឆ្នាំ២០១៩ និង លើកទី៣១ឆ្នាំ២០២១ ឥរិយាបថ នៃការប្រជែងយកមេដាយមិនផ្លាស់ប្ដូរទេនោះ កម្ពុជា នឹងធ្វើជាគំរូគេ ក្នុងការប្រជែងដណ្ដើមមេដាយដោយយុត្តិធម៌ សម្រាប់កីឡាស៊ីហ្គេមលើកទី៣២ ឆ្នាំ២០២៣។
លោក ថោង ខុន បានបញ្ជាក់ហើយថា ឆ្នាំ២០២៣ ប្រទេស ណាមានសមត្ថភាពប្រទេសនោះ នឹងរកបានមេដាយច្រើនជាងគេ។ កម្ពុជា នឹងមិនទទួលយកវប្បធម៌ចែកមេដាយនោះឡើយ៕
Source: Kampuchea Thmey Daily
0 Comments