តាកែវ ៖ ជុំវិញករណីផ្ទុះការតវ៉ាពីប្រជាពលរដ្ឋនៅស្រុកអង្គរបូរី ខេត្តតាកែវ កាលពីពេលថ្មីៗកន្លងទៅនេះ កំពុងតែក្លាយទៅជារឿងក្តៅ ខណៈដែលរដ្ឋបាលស្រុកអង្គរបូរី បានចេញលិខិតបំភ្លឺ(លាងខ្លួនឯង) ហើយងាកមកចោទក្រុមអ្នកសារព័ត៌មានថា ផ្សាយព័ត៌មានរឿងផ្ទុះការតវ៉ារបស់បងប្អូនប្រជាពលរដ្ឋនៅឃុំព្រៃផ្គាំជាង៤០០គ្រួសារ ប្តឹងតវ៉ារឿងតម្លៃទឹកបូមដាក់ស្រែ ជាមួយនឹងក្រុមហ៊ុនផ្គត់ផ្គង់ទឹកស្ថានីយឃុំព្រៃផ្គាំរបស់ លោក ឈុន សារឹន ហៅប៉ោង កាលពីថ្ងៃទី២៦ ខែមករា ឆ្នាំ២០១៩កន្លងទៅនេះ ជាការផ្សាយព័ត៌មានបំភ្លៃ និងបំប៉ោងព័ត៌មាន ដោយរដ្ឋបាលស្រុកអង្គរបូរី និងអាជ្ញាធរឃុំ ឆ្លើយថាមិនបានដឹងរឿងទៅវិញ ក្នុងពេលដែលប្រជាពលរដ្ឋប្រុស ស្រី រាប់រយនាក់ ទៅឈរនៅមាត់ជណ្ដើរសាលាឃុំ ស្រែករកអាជ្ញាធរជួយដោះស្រាយ។
ទង្វើនេះ ហាក់បីដូចជាពាក្យរបស់ថ្នាក់ដឹកនាំធ្លាប់និយាយដាស់តឿនរឿយៗថា កុំធ្វើជាមន្ត្រីជើងដប់ ដែលអង្គុយនៅតែក្នុងប៉ារ៉ូចាំស្តាប់របាយការណ៍ទទួលយកផលប្រយោជន៍ មិនគិតគូរពីទុក្ខលំបាករបស់រាស្ត្រ ដែលអាចនិយាយបានថា ជាមន្ត្រីអសកម្មភាព ខ្វះការទំនាក់ទំនងផ្ទាល់ជាមួយនឹងប្រជាពលរដ្ឋ។
សូមបញ្ជាក់ផងដែរថា ការឡាយវីដេអូផ្ទាល់អំពីសកម្មភាព និងការសម្ភាសន៍តវ៉ារបស់ពលរដ្ឋនៅពេលនោះ ក្នុងបណ្តាញសង្គមហ្វេសប៊ុក ដែលនិយាយអំពីទុក្ខលំបាករបស់ពួកគាត់ឲ្យមហាជន និងអាជ្ញាធរគ្រប់លំដាប់ថ្នាក់បានដឹងរឿងពិតនោះ បែរជាមន្ត្រីជើងដប់រដ្ឋបាលស្រុកអង្គរបូរីថា ការផ្សាយព័ត៌មាននេះមិនពិត ហើយជាព័ត៌មានបំប៉ោងទៅវិញ។
តាមការពិនិត្យ សូមឲ្យអាជ្ញាធរស្រុកអង្គរបូរី គួរណាស់តែចុះមកផ្ទាល់ ដើម្បីរកដំណោះស្រាយជូនពលរដ្ឋមិនមែនស្តាប់តែរបាយការណ៍ ហើយចោទប្រកាន់មកអ្នកសារព័ត៌មាននោះទេ ជៀសវាងការធ្លាក់ចុះ នៃការងារគ្រប់គ្រងរដ្ឋបាល របស់ខ្លួន។
សូមរំឭកថា ក្រុមប្រជាពលរដ្ឋរាប់រយនាក់ នៅឃុំព្រៃផ្គាំ ស្រុកអង្គរបូរី ខេត្តតាកែវ កាលពីព្រឹកថ្ងៃទី២៦ ខែមករា ឆ្នាំ២០១៩ កន្លងទៅនេះ បាននាំគ្នាមកប្រមូលផ្ដុំនៅមុខសាលាឃុំទាំងព្រឹក ដើម្បីឲ្យអាជ្ញាធរជួយដោះស្រាយពួកគាត់ ខណៈដែលប្រធានសហគមន៍ផ្គត់ផ្គង់ទឹកសម្រាប់ស្រោចស្រពស្រែប្រាំង ពួកគាត់ប្រែក្រឡាស់សម្ដីក្នុងការយកថ្លៃសេវាផ្គត់ផ្គង់ទឹកបញ្ចូលស្រែខុសពីសន្យាដែលធ្លាប់ធ្វើ ជាហេតុធ្វើឲ្យពួកគាត់ជួបប្រទះនូវការខាតបង់យ៉ាងធ្ងន់ធ្ងរ៕
Source: Kampuchea Thmey Daily
0 Comments