ភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានច្រានចោលទាំងស្រុង ចំពោះការចោទប្រកាន់របស់ទណ្ឌិត សម រង្ស៊ី ដែលថា បានរារាំងមិនឲ្យវិលចូលស្រុក ដោយសារហេតុផលមួយចំនួន ជាពិសេសបញ្ហានយោបាយនៅក្នុងគណបក្ស និងបានអះអាងថា សម្ដេចដូចជាមិនឆោតល្ងង់ដល់ថ្នាក់ប្រាប់ សម រង្ស៊ី មិនឲ្យវិលចូលស្រុកនោះទេ។
សម្ដេចក្រឡាហោម ស ខេង បញ្ជាក់បែបនេះ នៅលើបណ្ដាញសង្គមហ្វេសប៊ុកផ្ទាល់ខ្លួន កាលពីល្ងាច ថ្ងៃទី២៤ ខែមករា និងបន្ទាប់ពី លោក សម រង្ស៊ី បាននិយាយនៅតាមវិទ្យុបម្រើឲ្យគោលនយោបាយអាមេរិក ដោយមួលបង្កាច់លើថ្នាក់ដឹកនាំគណបក្សប្រជាជនកម្ពុជា ជាពិសេសមកលើរូបសម្ដេចក្រឡាហោម ស ខេង អំពីដំណើរការដោះស្រាយបញ្ហានយោបាយនៅកម្ពុជា នាពេលកន្លងមក។
សម្ដេចក្រឡាហោម ស ខេង បានបញ្ជាក់យ៉ាងនេះថា "ថ្មីៗនេះ ក្នុងការផ្សាយរបស់វិទ្យុអាស៊ីសេរី លោក សម រង្ស៊ី បាននិយាយចោទប្រកាន់ មួលបង្កាច់ មកលើថ្នាក់ដឹកនាំគណបក្សប្រជាជនកម្ពុជាជាពិសេសមកលើរូបខ្ញុំ អំពីដំណើរការដោះស្រាយបញ្ហានយោបាយកម្ពុជា នាពេលកន្លងមក។
ការលើកឡើងរបស់ លោក សម រង្ស៊ី ដែលនិយាយថា ខ្ញុំបានហាមឃាត់គាត់មិនឲ្យវិលត្រឡប់មកប្រទេសវិញនោះ គឺជាពាក្យសម្ដីមួលបង្កាច់ ដើម្បីបិទបាំងភាពកំសាករត់គេចចេញពីសំណាញ់ច្បាប់របស់ខ្លួនតែប៉ុណ្ណោះ"។
សម្ដេចបន្តថា "ក្នុងនាមជាអ្នកដែលចូលរួមក្នុងឆាកនយោបាយ ខ្ញុំដូចជាមិនដល់ថ្នាក់ឆោតល្ងង់ប្រាប់ សម រង្ស៊ី មិនឲ្យវិលចូលស្រុកនោះទេ។ ប្រការនេះខុសទាំងស្រុងពីច្បាប់រដ្ឋធម្មនុញ្ញ និងអាចផ្តល់ឱកាសគ្រប់ពេលវេលាឲ្យ សម រង្ស៊ី មានលេសវាយប្រហារមកលើរូបខ្ញុំវិញ នៅពេលដែលសមត្ថកិច្ចបានទទួលដីកាដើម្បីចាប់ខ្លួន សម រង្ស៊ី រួចហើយ"។
តាម សម្ដេចក្រឡាហោម ស ខេង បញ្ជាក់ថា " លោកសម រង្ស៊ី បានប្រព្រឹត្តបទល្មើសជាច្រើន និងត្រូវបានតុលាការផ្ដន្ទាទោសរួចហើយ។ ទណ្ឌិតរូបនេះសម្រេចរត់គេចខ្លួនមិនចូលប្រទេសដោយខ្លួនឯង ហើយការត្រឡប់ចូលប្រទេសវិញ ឬយ៉ាងណានោះ វាស្ថិតនៅលើបុគ្គល សម រង្ស៊ី ខ្លួនឯងតែប៉ុណ្ណោះ គ្មានអ្នកណាហាមឃាត់ឡើយ។ ការចេញដីកាចាប់ខ្លួន ទណ្ឌិត សម រង្ស៊ី គឺត្រូវបានប្រកាសជាសាធារណៈ ហើយការបញ្ជាក់របស់ខ្ញុំចំពោះសារព័ត៌មាន និងសាធារណៈមតិជាតិ និងអន្តរជាតិ អំពីដីកាចាប់ខ្លួននេះ គឺធ្វើឡើងជាសាធារណៈ ដែលមិនមានអ្វីជាអាថ៌កំបាំងឡើយ។
ការដែល សម រង្ស៊ី និយាយថា ខ្ញុំមានការលំបាកធ្វើការជាមួយនឹងសម្ដេចអគ្គមហាសេនាបតីតេជោ ហ៊ុន សែន នោះ គឺជារឿងភូតកុហកបោកប្រាស់សុទ្ធសាធ ប្រការនេះ សម រង្ស៊ី ចង់ឲ្យសាធារណៈមតិ មានការភ័ន្តច្រឡំមកលើរូបខ្ញុំ និងជាល្បិចកលនយោបាយរបស់ លោក សម រង្ស៊ី ខ្លួនឯងតែប៉ុណ្ណោះ។ ធាតុពិត គឺ សម រង្ស៊ី ទេ ដែលខ្ញុំពិបាកធ្វើការជាមួយ។
ជាក់ស្តែងនៅល្ងាចថ្ងៃទី១៦ ខែកញ្ញា ឆ្នាំ២០១៣ ខ្ញុំដែលតំណាងឲ្យគណបក្សប្រជាជនកម្ពុជា រីឯលោក សម រង្សី តំណាងឲ្យគណបក្សសង្គ្រោះជាតិ។ ខ្ញុំ និង សម រង្ស៊ី បានជជែកគ្នាតាមទូរស័ព្ទ អំពីសេចក្ដីព្រាងកិច្ចព្រមព្រៀងមួយ រវាងគណបក្សទាំងពីរ។ ខ្ញុំបានសុំយោបល់ថ្នាក់ដឹកនាំគណបក្សប្រជាជនកម្ពុជា ពិសេសសម្ដេចអគ្គមហាសេនាបតីតេជោ ហ៊ុន សែន។ ខ្ញុំ និង សម រង្ស៊ី បានឯកភាពទាំងស្រុង ហើយសង្ឃឹមថា នៅព្រឹកថ្ងៃទី១៧ ខែកញ្ញា ឆ្នាំ២០១៣ នឹងបានចុះហត្ថលេខាទៅលើកិច្ចព្រមព្រៀងនោះ នៅក្នុងកិច្ចប្រជុំនៅមន្ទីររដ្ឋសភា។ ប៉ុន្តែផ្ទុយពីការរំពឹងទុក ពេលចាប់ផ្ដើមភ្លាម កឹម សុខា បានជំទាស់នឹងសេចក្ដីព្រាងនោះទាំងស្រុង ដែលនាំឲ្យកិច្ចចរចាត្រូវបរាជ័យ ហើយពួកគេងាកទៅរកប្រមូលកម្លាំងប្រជាជនធ្វើបាតុកម្មប្រឆាំងលទ្ធផលបោះឆ្នោត និងធ្វើបដិវត្តន៍ពណ៌ជាបន្តទៀត។ បញ្ហានេះទេ ដែលបញ្ជាក់ថា សម រង្សី ជាមនុស្សពិបាកធ្វើការ និយាយបាតដៃជាខ្នងដៃ មិនទៀងត្រង់ ក្រឡេចក្រឡុច មិនទទួលខុសត្រូវ និងអាចនិយាយបានថា គឺ សម រង្ស៊ី ទេជាអ្នកបោកខ្ញុំ"។
សម្ដេចបញ្ជាក់ទៀតថា ខ្លួនសម្ដេចផ្ទាល់ បានរួមការងារជាមួយសម្ដេចអគ្គមហាសេនាបតីតេជោ ហ៊ុន សែន គ្រប់កាលៈទេសៈ ដើម្បីដោះស្រាយបញ្ហាជាតិ ជាង៤០ឆ្នាំកន្លងមកហើយ។ ជោគជ័យ នៃការបោះឆ្នោតអាណត្តិទី៦កន្លងទៅនេះ បានបញ្ជាក់យ៉ាងច្បាស់តាមរយៈនូវការឯកភាពខ្ពស់ និងភាពកាន់តែរឹងមាំ នៃគណបក្សប្រជាជនកម្ពុជា៕
Source: Kampuchea Thmey Daily
0 Comments