កំពង់ស្ពឺ ៖ សពបុរសម្នាក់ ត្រូវបានរថយន្តដឹកថ្មកិនបែកខ្ទេចខ្ទី ក្នុងហេតុការណ៍គ្រោះថ្នាក់ចរាចរណ៍ដ៏រន្ធត់មួយ រវាងរថយន្ត បុកជាមួយនឹងម៉ូតូជនរងគ្រោះ។
ករណីគ្រោះថ្នាក់ចរាចរណ៍នេះ កើតឡើងនៅចំណុចភូមិក្រសាំងជីមែ ឃុំវាល ស្រុកគងពិសី ខេត្តកំពង់ស្ពឺ វេលាម៉ោង១០និង៣០នាទីព្រឹក ថ្ងៃទី២៤ ខែមករា ឆ្នាំ២០១៩នេះ។
មន្ត្រីនគរបាលបានឲ្យដឹងថា នៅមុនពេលកើតហេតុគេឃើញរថយន្តមួយគ្រឿង ម៉ាកសាក់មែន ពណ៌ស ពាក់ស្លាកលេខ ភ្នំពេញ 3A-1270 អ្នកបើកបរមិនស្គាល់ឈ្មោះ បើកបរពីជើងទៅត្បូង លុះបើកមកដល់ចំណុចខាងលើ បានបត់ឆ្លងផ្លូវទៅលិច ក៏ជ្រុលបុកម៉ូតូមួយគ្រឿង ម៉ាកវ៉េវអ៊ី ពណ៌ខ្មៅ ពាក់ស្លាកលេខ កំពត1I-6954 បើកបរដោយ ឈ្មោះ ប៊ី សុភា ភេទប្រុស អាយុ២១ឆ្នាំ រស់នៅភូមិស្រែក្តាន់ខាងកើត ឃុំទូកមាសខាងកើត ស្រុកបន្ទាយមាស ខេត្តកំពត ពីក្រោយពេញមួយទំហឹង រួចកិនបណ្តាលឲ្យស្លាប់ភ្លាមៗនៅកន្លែងហេតុ។
ប្រភពបន្តថា ក្រោយពីកើតហេតុ អ្នកបើករថយន្តបានចុះរត់គេចខ្លួនបាត់ស្រមោលតែម្តង។ ចំណែកសព ត្រូវបានកម្លាំងជំនាញបានទាក់ទងទៅសាច់ញាតិមកទទួលទៅធ្វើបុណ្យតាមប្រពៃណី។
បច្ចុប្បន្ន ចំពោះម៉ូតូ និងរថយន្ត កម្លាំងនគរបាលជំនាញបានយកមករក្សាទុកនៅអធិការដ្ឋាននគរបាលស្រុកគងពិសី រៀបចំកសាងសំណុំរឿងតាមនីតិវិធីច្បាប់៕
Source: Kampuchea Thmey Daily
0 Comments