ភ្នំពេញ ៖ សមត្ថកិច្ចជំនាញ នៃការិយាល័យស្រាវជ្រាវបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ បានបញ្ជូនចោរឆក់០២នាក់ ទៅតុលាការ ដើម្បីផ្ដន្ទាទោសតាមច្បាប់នៅថ្ងៃនេះ ក្រោយពេលបង្ក្រាបបាន២ថ្ងៃរួចមក។
មន្ត្រីអាវុធហត្ថរាជធានីបានឲ្យដឹងថា ចោរឆក់២នាក់ ដែលតុលាការសម្រេចឃុំខ្លួននោះមាន ទី១/ ឈ្មោះ ផល ផានិត ហៅតួ ភេទប្រុស អាយុ២១ឆ្នាំ ,ទី២/ ឈ្មោះ សុខ វង្ស ហៅក្តី ភេទប្រុស អាយុ ១៩ឆ្នាំ។
ប្រភពបន្តថា ចោរឆក់ទាំង០២នាក់ បានសារភាពឲ្យដឹងថា នៅមុនធ្វើសកម្មភាព រូបគេទាំង០២នាក់ បានផឹកស៊ី និងជក់គ្រឿងញៀនជាមួយគ្នា នៅផ្ទះជួល ផ្លូវ២៧១ សង្កាត់បឹងទំពុន ខណ្ឌមានជ័យ រាជធានីភ្នំពេញ បន្ទាប់មកពួកគេទាំង០២នាក់ បានជិះម៉ូតូទៅចេញពីផ្ទះជួល ដើម្បីទៅលេងនៅកោះពេជ្រ។ លុះពេលជិះដល់ចំណុចជិតស្ពានហង្សកោះពេជ្រ ក៏ឃើញជនជាតិចិន០២នាក់ កំពុងដើរលើដងផ្លូវ និងមានកាន់កាបូបជាប់ដៃ រូបគេទាំង០២នាក់ បានជិះម៉ូតូទៅក្បែរជនរងគ្រោះ ហើយបានធ្វើសកម្មភាពឆក់យកកាបូបពីជនរងគ្រោះបានសម្រេច ហើយបានព្យាយាមជិះម៉ូតូរត់គេចខ្លួន ស្របពេលកម្លាំងល្បាតមូលដ្ឋានអាវុធហត្ថខណ្ឌដូនពេញឃើញ ក៏ប្រដេញតាមរហូតដល់ចំណុចផ្លូវលេខ២៤២ កែងផ្លូវព្រះមុនីវង្ស បានឃាត់ខ្លួនពួកគេទាំង០២នាក់ តែម្តង៕
Source: Kampuchea Thmey Daily
0 Comments