កំពង់ចាម ៖ សពបុរសម្នាក់ ត្រូវបានប្រជាពលរដ្ឋប្រទះឃើញស្លាប់ក្បែរឧបករណ៍កែច្នៃសម្រាប់ឆក់ត្រី បង្កឲ្យមានការភ្ញាក់ផ្អើល នៅថ្ងៃទី៣០ ខែធ្នូ ឆ្នាំ២០១៨ វេលាម៉ោង៨និង១៥នាទី។
ប៉ូលិសបានឲ្យដឹងថា ក្រោយទទួលព័ត៌មាននេះភ្លាម ពីលោកនាយប៉ុស្តិ៍បឹងកុក ថាមានករណី មនុស្សស្លាប់ (ឆក់នឹងឧបករណ៍ឆក់ត្រី) នៅចំណុចថ្លុក ក្រោយផ្ទះរបស់ឈ្មោះ សេង ក្នុងភូមិចុងថ្នល់ទី២ សង្កាត់ បឹងកុក ក្រុងកំពង់ចាម ខេត្តកំពង់ចាម ភ្លាមៗ កម្លាំងជំនាញ បានសហការជាមួយកម្លាំង បច្ចេកទេសខេត្ត កម្លាំងប៉ុស្តិ៍បឹងកុក គ្រូពេទ្យ និងលោកអនុភូមិចុងថ្នល់ទី២ ចុះទៅដល់កន្លែង កើតហេតុពិនិត្យឃើញ មានបន្សល់ទុកឧបករណ៍ឆក់ត្រីមួយសម្រាប់។
ប៉ូលិសបានបន្តថា សពជនរងគ្រោះ ត្រូវបានសាច់ញាតិដឹកទៅផ្ទះ នៅភូមិថ្មគោល សង្កាត់បឹងកុក ក្រុងកំពង់ចាម មុនពេលសមត្ថកិច្ចទៅដល់។
គណៈកម្មការចម្រុះ បានបន្តទៅពិនិត្យសពដល់ផ្ទះ សពឈ្មោះ វ៉េង សុវណ្ណ ភេទប្រុស អាយុ៣៤ឆ្នាំនៅភូមិថ្មគោល ឃុំរអាង ស្រុកកំពង់សៀម ខេត្តកំពង់ចាម។
តាមការពិនិត្យសាកសព មានស្នាមខ្លោចបីកន្លែងនៅលើកំភួនដៃស្តាំ គល់មេដៃស្តាំ ចង្អុលដៃឆ្វេង ក្រៅពីនោះ ពុំមានស្លាកស្នាមអ្វីទៀតឡើយ។
គណៈកម្មាធិការសន្និដ្ឋានថា ជនរងគ្រោះស្លាប់ដោយសារឧបករណ៍ ឆក់ត្រី ពុំមានពាក់ព័ន្ធបទល្មើស ព្រហ្មទណ្ឌទេ។
បច្ចុប្បន្ន សពជនរងគ្រោះ ត្រូវបានប្រគល់ឲ្យក្រុមគ្រួសារធ្វើបុណ្យតាមប្រពៃណី៕
Source: Kampuchea Thmey Daily
0 Comments