កំពង់ចាម ៖ លោក ប៉ែន ទៀនចំរើន អធិការនគរបាលស្រុកចំការលើ ដែលទើបចូលកាន់តំណែងថ្មីៗនេះ បានបញ្ចេញកណ្ដាប់ដៃវាយបំបែកសង្វៀនបញ្ជល់មាន់មួយកន្លែង ដោយដកហូតម៉ូតូរបស់អ្នកលេងបានចំនួន១១គ្រឿង យកមករក្សាទុកនៅអធិការដ្ឋានដើម្បីបំពេញសំណុំឯកសារតាមនីតិវិធី ។
ប៉ូលិសបានឲ្យដឹងថា នៅថ្ងៃទី៣១ ខែធ្នូ ឆ្នាំ២០១៨ វេលាម៉ោង១៣និង៣០នាទី កម្លាំងជំនាញព្រហ្មទណ្ឌ អធិការដ្ឋាននគរបាលស្រុកចំការលើ សហការជាមួយកម្លាំង ប៉ុស្តិ៍នគរបាលរដ្ឋបាល ចម្ការអណ្ដូង ដឹកនាំដោយលោក អនុសេនីយ៍ឯក ខ្លូត ហ៊ាន់ អធិការរង ទទួលផ្នែកយុត្តិធម៌ បានធ្វើការចុះបង្ក្រាបកន្លែងលួចលេងល្បែងស៊ីសងដោយខុសច្បាប់ (ជល់មាន់) នៅចំណុចចម្ការស្វាយចន្ទី តំបន់ស្រោមខ្នុរ ស្ថិតក្នុងភូមិស្រោងចាន់ ឃុំចំការអណ្តូង ស្រុកចំការលើ ខេត្តកំពង់ចាម។
ប៉ូលិសបានបញ្ជាក់ថា ក្នុងកិច្ចប្រតិបត្តិការបង្ក្រាបខាងលើនេះ សមត្ថកិច្ចបានដកហូត ៖ ម៉ូតូ១១គ្រឿង និងជញ្ជីងថ្លឹងមាន់០១ រីឯអ្នកលេងបានរត់គេចខ្លួនបាត់។
ប៉ូលិសបានបន្តថា ចំពោះវត្ថុតាងខាងលើ ត្រូវបានសមត្ថកិច្ច យកមករក្សាទុកនៅអធិការដ្ឋាននគរបាលស្រុកចំការលើ ដើម្បីកសាងសំណុំរឿងតាមនីតិវិធី៕
Source: Kampuchea Thmey Daily
0 Comments