ភ្នំពេញ ៖ លោក ទិត សារឿន អគ្គលេខាធិការរង នៃអគ្គលេខាធិការដ្ឋានក្រសួងយុត្តិធម៌បានឲ្យដឹងថា ក្នុងរយៈពេល៣ថ្ងៃ នៃការតាំងពិព័រណ៍ក្នុងពិធីសម្ពោធបើកឲ្យប្រើប្រាស់ជាផ្លូវការវិមាន ឈ្នះ ឈ្នះ មានប្រជាពលរដ្ឋគ្រប់ស្រទាប់វណ្ណៈប្រមាណជាង១ម៉ឺននាក់ បានចូលមកយកសៀវភៅច្បាប់ ដែលផ្សព្វផ្សាយចែកជូនដោយក្រសួងយុត្តិធម៌។
លោកអគ្គលេខាធិការក្រសួងយុត្តិធម៌រូបនេះបានបញ្ជាក់ថា នេះជាលើកទី១ហើយ ដែលក្រសួងយុត្តិធម៌មានការផ្តល់នូវសៀវភៅច្បាប់ជាលក្ខណៈទ្រង់ទ្រាយធំ ដល់ប្រជាពលរដ្ឋគ្រប់ស្រទាប់វណ្ណៈ ខណៈកន្លងមកធ្លាប់បានផ្តល់ជូន និងផ្សព្វផ្សាយចែកឲ្យបានត្រឹមតែមន្ត្រី អ្នកអនុវត្តច្បាប់ និងនិស្សិតមួយចំនួនប៉ុណ្ណោះ។
លោកបន្តថា ប្រជាពលរដ្ឋ សិស្ស និស្សិត ព្រះសង្ឃ និងមន្ត្រីរាជការគ្រប់ស្រទាប់វណ្ណៈ ដែលបានចូលមកយកសៀវភៅច្បាប់ នៅបញ្ជរស្តង់ពិព័រណ៍ក្រសួងយុត្តិធម៌ ក្រសួងបានចែកជូនដោយមិនគិតថ្លៃ ដើម្បីអបអរពិធីសម្ពោធវិមានអនុស្សាវរីយ៍ ឈ្នះ ឈ្នះ និងអបអរទិវាខួប២០ឆ្នាំ នៃការបញ្ចប់សង្គ្រាមស៊ីវិលនៅកម្ពុជាទាំងស្រុង ដែលរាជរដ្ឋាភិបាលប្រារព្ធឡើងក្នុងរាជធានីភ្នំពេញ ចាប់ពីថ្ងៃទី ២៩ ដល់៣១ធ្នូ។
លោក កែ ធឿន ប្រជាពលរដ្ឋមានស្រុកកំណើតនៅខេត្តព្រៃវែង បានសុខចិត្តឈរជាជួរក្នុងចំណោមមនុស្សជាច្រើន ដើម្បីរងចាំទទួលបានសៀវភៅច្បាប់នានា ដែលចែកជូនដោយឥតគិតថ្លៃពីក្រសួងយុត្តិធម៌ នាថ្ងៃចុងក្រោយ នៃពិធីអបអរទិវាខួប២០ឆ្នាំ នៃនយោបាយ ឈ្នះ ឈ្នះ របស់ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា។
ចំណែកព្រះតេជគុណ ឃាងលី ចាន់ថេង គង់នៅវត្តព្រះពុទ្ធមានបុណ្យ រាជធានីភ្នំពេញ មានពុទ្ធដីកាថា សៀវភៅច្បាប់គោលរបស់កម្ពុជា ដូចជា ៖ ក្រមនីតិវិធីព្រហ្មទណ្ឌ ក្រមរដ្ឋប្បវេណី នីតិវិធី និងការប្រព្រឹត្តទៅរបស់តុលាការជាដើមនោះ ជាប្រភពផ្តល់នូវពុទ្ធិមួយដ៏សំខាន់នៅក្នុងវិស័យយុត្តិធម៌ និងតុលាការ។
កញ្ញា ស្រីណាក់ និស្សិតឆ្នាំទី១ នៃសាកលវិទ្យាល័យមួយក្នុងរាជធានីភ្នំពេញបានអ្នកសារព័ត៌មានយើងដោយទឹកមុខញញឹមរីករាយថា សៀវភៅច្បាប់ទាំងនេះ សុទ្ធតែជាសៀវភៅដ៏មានសារៈសំខាន់ សម្រាប់ជាប្រភពសិក្សាស្រាវជ្រាវរបស់ខ្លួន៕
Source: Kampuchea Thmey Daily
0 Comments