សហរដ្ឋអាមេរិក​អំពាវនាវ​ឲ្យ​មាន​តម្លាភាព​នុយក្លេអ៊ែរ​ជាមួយ​រុស្ស៊ី​និង​ចិន

នៅ​ថ្ងៃ​ពុធ សហរដ្ឋអាមេរិក​ បាន​អំពាវនាវ​ឲ្យ​មាន​តម្លាភាព​បន្ថែម​ទៀត ​ខណៈ​ខ្លួន​ បាន​ចោទប្រកាន់​ប្រទេស​រុស្ស៊ី​ និង​ចិន​ថា​មិនបាន​រាយការណ៍​ពេញលេញ​អំពី​កម្មវិធី​នុយក្លេអ៊ែរ​របស់​ខ្លួន​ចំ​ពេល​មានការ​គំរាម​របស់​អាមេរិក​ក្នុង​ការ​ដក​ខ្លួន​ចេញពី​សន្ធិសញ្ញា​គ្រប់គ្រង​អាវុធ​ដ៏​សំខាន់​មួយ។

មន្ត្រីជាន់ខ្ពស់​អាមេរិក​ម្នាក់​បានធ្វើការ​កត់សម្គាល់​បែបនេះ​ខណៈ​សមាជិក​អចិន្ត្រៃយ៍​ទាំង​៥​នៃ​ក្រុមប្រឹក្សាសន្តិសុខ​អង្គការសហប្រជាជាតិ​ដែល​សុទ្ធតែជា​មហាអំណាច​ប្រដាប់អាវុធ​នុយក្លេអ៊ែរ​បា​ន​ជួបប្រជុំគ្នា​នៅក្នុង​ទីក្រុង​ប៉េកាំង​ដើម្បី​ពិភាក្សា​អំពី​ការដក​អាវុធ​នុយក្លេអ៊ែរ​និង​ការមិន​រីកសាយ​នៃ​អាវុធ​នុយក្លេអ៊ែរ​។​

លោកស្រី Andrea Thompson អនុរដ្ឋលេខាធិការ​ទទួល​បន្ទុក​ផ្នែក​គ្រប់គ្រង​អាវុធ​និង​សន្តិសុខ​អន្តរជាតិ​បាន​និយាយថា មាន​លទ្ធផល​មិន​ស្មើគ្នា​នៅក្នុង​កិច្ចខិតខំ​ប្រឹងប្រែង​ដើម្បី​បង្កើន​តម្លាភាព​ក្រោម​សន្ធិសញ្ញា​មិន​រីកសាយ​អាវុធ​នុយក្លេអ៊ែរ​។​

លោកស្រី Thompson បាន​និយាយ​នៅក្នុង​សុន្ទរកថា​បើក​របស់លោក​ស្រី​ថា “​ពីមុន យើង​បាន​ព្រមព្រៀង​កំណត់​ទ្រង់ទ្រាយ​សម្រាប់​ការរាយការណ៍​ប៉ុន្តែ​គម្លាត​រវាង​របាយការណ៍​របស់​សហរដ្ឋអាមេរិក​ជាមួយ​ប្រទេស​រុស្ស៊ី​និង​ប្រទេស​ចិន​គឺ​ឆ្ងាយ​ខ្លាំងណាស់​”​។​

លោកស្រី​បាន​ថ្លែងថា “​ខ្ញុំ​មិនអាច​សង្កត់ធ្ងន់​លើ​តម្លៃ​នៃ​តម្លាភាព​បានទេ​”​។​
​លោកស្រី​បន្តថា “​យើង​កំពុង​សម្លឹង​ទៅរក​ការពិភាក្សា​អំពី​របៀប​ដែល​យើង​អាច​លើកកម្ពស់​តម្លាភាព​ដើម្បី​ធានា​ដល់​អ្នកដទៃ​អំពី​ជំហាន​ពិតប្រាកដ​ដែល​យើង​កំពុង​ធ្វើ​ដើម្បី​ធានា​នូវ​ការអនុលោម​ពេញលេញ​និង​អាច​ផ្ទៀងផ្ទាត់​បាន​ចំពោះ​ការប្តេជ្ញាចិត្ត​និង​កាតព្វកិច្ច​មិន​រីក​សាយភាយ​អាវុធ​និង​ការរំសាយ​អាវុធ​របស់​យើង​”​។​

ក្រុមមន្ត្រី​មកពី​ប្រទេស​រុស្ស៊ី ចិន បារាំង​និង​ចក្រភព​អង់គ្លេស​ដែលជា​ប្រទេស​ស្ថិតក្រោម​សន្ធិសញ្ញា​មិន​រីក​សាយភាយ​អាវុធ​នុយក្លេអ៊ែរ (NPT) ក៏បាន​ចូលរួម​កិច្ចប្រជុំ​នេះ​ផងដែរ​ដែល​នឹង​បន្ត​ដល់​ថ្ងៃ​ព្រហស្បតិ៍​។​

កិច្ចពិភាក្សា​នេះ​បាន​កើតឡើង​បន្ទាប់ពី​មាន​ភាព​តានតឹង​ជាច្រើន​ខែ​រវាង​ទីក្រុង​មូ​ស្គូ​និង​ក្រុង​វ៉ាស៊ីនតោន​ស្តីពី​ជោគវាសនា​នៃ​សន្ធិសញ្ញា​កងកម្លាំង​នុយក្លេអ៊ែរ​កម្រិត​មធ្យម (INF) ដែល​បាន​ចុះហត្ថលេខា​ក្នុង​ឆ្នាំ​១៩៨៧​ដោយ​ប្រធានាធិបតី​អាមេរិក​លោក Ronald Reagan និង​មេដឹកនាំ​សូ​វៀត​លោក Mikhail Gorbachev​។​

ប្រធានាធិបតី​អាមេរិក​លោក Donald Trump បាន​សន្យាថា​នឹង​ដកខ្លួន​ចេញពី​កិច្ចព្រមព្រៀង​នេះ​ខណៈដែល​ប្រធានាធិបតី​រុស្ស៊ី​លោក Vladimir Putin បាន​គំរាម​ដល់​ការប្រកួតប្រជែង​សព្វាវុធ​ថ្មី​ដោយ​និយាយថា ទ្វីបអឺរ៉ុប​នឹង​ក្លាយជា​ជនរងគ្រោះ​ដ៏​ធំ​៕ AFP

​

Source: Kampuchea Thmey Daily