ភ្នំពេញ ៖ អ្នកនាំពាក្យក្រសួងអប់រំយុវជន និងកីឡាបានឲ្យដឹងថា ក្រសួងបានដាក់ចេញនូវវិធានការមួយចំនួនដើម្បីកាត់បន្ថយអត្រាបោះបង់ការសិក្សារបស់សិស្សនៅគ្រប់កម្រិតឲ្យកាន់តែប្រសើរឡើងថែមទៀត ដែលជួយធានាឲ្យសិស្សទទួលបានការអប់រំប្រកបដោយសមធម៌ និងពេញមួយជីវិត។
លោក រស់ សុវាចា អ្នកនាំពាក្យក្រសួងអប់រំយុវជននិងកីឡាមានប្រសាសន៍កាលពីថ្ងៃទី១១ ខែមករាឆ្នាំ២០១៩ថា វិធានទាំងនោះរួមមានការពង្រឹងការចូលរួមពីអ្នកពាក់ព័ន្ធ ការដឹកនាំគ្រប់គ្រងតាមសាលារៀន ការពង្រឹងប្រសិទ្ធភាពនៃការផ្តល់អាហារូបករណ៍ លើកទឹកចិត្តនិងបង្កលក្ខណៈងាយស្រួលដល់ការបង្រៀននិងរៀន លើកកម្ពស់ការអប់រំដល់អាណាព្យាបាលសិស្សពីគុណតម្លៃនៃការសិក្សានិងការយកចិត្តទុកដាក់ទៅលើជីវភាពរបស់គ្រូបង្រៀនដើម្បីកាត់បន្ថយអត្រាការបោះបង់ការសិក្សារបស់សិស្សពិសេសនៅកម្រិតវិទ្យាល័យ។
លោកបានបន្តថា ការដាក់ចេញវិធានការទាំងនេះគឺដោយសារតែបច្ចុប្បន្ននេះ អត្រាបោះបង់ការសិក្សារបស់សិស្សចាប់ពីកម្រិតបឋមសិក្សារហូតដល់កម្រិតវិទ្យាល័យនៅប្រទេសកម្ពុជានៅមានកម្រិតខ្ពស់នៅឡើយដែលបណ្តាលមកពីកក្តាគ្រួសារ កត្តាសិស្ស កត្តាសាលារៀននិងកត្តាសង្គម។
យោងតាមទិន្នន័យទូទាំងប្រទេសរបស់ក្រសួងអប់រំយុវជននិងកីឡាក្នុងឆ្នាំ២០១៧-២០១៨បានឲ្យដឹងថា អត្រាបោះបង់ការសិក្សារបស់សិស្សនៅមធ្យមសិក្សាបឋមភូមិមាន១៦,៦ភាគរយ ស្រីមាន ១៤,២ភាគរយ។ ចំណែកការបោះបង់ការសិក្សានៅមធ្យមសិក្សាទុតិយភូមិមាន១៩,៧ភាគរយស្រីមាន១៧ភាគរយនិងនៅកម្រិតបឋមសិក្សាមាន ៤,៧ភាគរយស្រីមាន ៣,៥ ភាគរយ ។
អ្នកនាំពាក្យដដែលនោះបានឲ្យដឹងទៀតថា ដើម្បីដោះស្រាយការបោះបង់ការសិក្សារបស់សិស្សនេះក្រសួងក៏នឹងពង្រឹងគុណភាពគ្រូបង្រៀន ពង្រីកសាលារៀននៅគ្រប់កម្រិត ពង្រឹងអធិការកិច្ចគ្រប់ជ្រុងជ្រោយតាមសាលារៀន ការអភិវឌ្ឍកម្មវិធីសិក្សានិងសៀវភៅសិក្សាគោលគ្រប់ជ្រុងជ្រោយផងដែរដើម្បីធានាបាននូវការអប់រំប្រកបដោយគុណភាព សមធម៌ បរិយាប័ន្ន និងលើកកម្ពស់ឱកាសសិក្សាពេញមួយជីវិតសម្រាប់ទាំងអស់គ្នា។
ជាមួយគ្នានេះដែរលោកបានបន្ថែមទៀតថា ក្រសួងនឹងខិតខំបង្កើនការផ្តល់អាហារូបករណ៍ដល់សិស្សក្រីក្រចាប់ពីកម្រិតបឋមសិក្សារហូតដល់មធ្យមសិក្សាដោយសិស្សបឋមនិងអនុវិទ្យាល័យម្នាក់ទទួលបាន២៤ម៉ឺនរៀលនិងសិស្សវិទ្យាល័យ៣៦ម៉ឺនរៀលដើម្បីឲ្យពួកគេបានបន្តការសិក្សាជាបន្តទៀតយ៉ាងហោចណាស់រៀនចប់ត្រឹមថ្នាក់ទី៩ដែរ។
លោក យង់ គឹមអេង ប្រធានមជ្ឈមណ្ឌលប្រជាពលរដ្ឋដើម្បីសន្តិភាពនិងអភិវឌ្ឍន៍បានគាំទ្រចំពោះវិធានការរបស់ក្រសួងអប់រំនេះព្រោះបានផ្តល់ឱកាសឲ្យសិស្សទទួលបានការសិក្សាបានកាន់តែច្រើន។
ទន្ទឹមនឹងនេះលោកបានជំរុញឲ្យក្រសួងអប់រំគួរតែផ្តល់អាហារូបករណ៍ដល់សិស្សក្រីក្រឲ្យចំទិសដៅនិងមានតម្លាភាពដើម្បីឲ្យពួកគេអាចមានលទ្ធភាពបានបន្តការសិក្សាជាបន្តទៀតផងដែរ។
យ៉ាងណាក៏ដោយលោកបានស្នើឲ្យក្រសួងអប់រំគួរតែពង្រីកសាលារៀនឲ្យបានទៅដល់តំបន់ជនបទដាច់ស្រយាលដើម្បីបង្កលក្ខណៈងាយស្រួលដល់សិស្សពិសេសសិស្សក្រីក្របានទៅសាលារៀនឲ្យបានគ្រប់ៗគ្នា ខណៈនៅតំបន់ខ្លះសាលារៀននៅឆ្ងាយពីផ្ទះប្រជាពលរដ្ឋដែលធ្វើឲ្យសិស្សបោះបង់ការសិក្សាពិសេសសិស្សស្រី៕
Source: Kampuchea Thmey Daily
0 Comments