ភ្នំពេញ ៖ ខណៈពេលដែលនាងជាកម្មការិនីរោងចក្រជិះម៉ូតូឌុបគ្នាត្រឡប់មកពីធ្វើការវិញត្រូវបានចោរពីរនាក់ នាំគ្នាជិះម៉ូតូតាមពីក្រោយ រហូតដល់មុខបន្ទប់ជួល ហើយធ្វើសកម្មភាពវាយប្លន់តែមិនបានសម្រេចត្រូវបានប្រជាពលរដ្ឋឃាត់បានម្នាក់វាយទ្រោមខ្លួន កាលវេលាម៉ោង៤ទៀបភ្លឺឈានចូលថ្ងៃទី១៩ ខែមករា ឆ្នាំ២០១៩ នៅភូមិព្រៃទា២ សង្កាត់ចោមចៅទី៣ ខណ្ឌពោធិ៍សែនជ័យ។
ជនសង្ស័យឈ្មោះ សេក តារេក ហៅ ទិត្យ ភេទប្រុស អាយុ១៩ឆ្នាំ មុខរបរមិនពិតស្នាក់នៅភូមិទួលសំបូរ សង្កាត់ប្រវែង ខណ្ឌដង្កោ រាជធានីភ្នំពេញ។
ជនរងគ្រោះឈ្មោះស៊ន រ័ត្ន ភេទស្រី អាយុ២៦ឆ្នាំ មុខរបរកម្មកររោងចក្រ រស់នៅផ្ទះជួលភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ មានស្រុកកំណើតនៅ ស្រុកបារាយណ៍ខេត្តកំពង់ធំ។ ជនរងគ្រោះទី២ឈ្មោះ សោម ស្រស់អាយុ២៦ឆ្នាំ មុខរបរកម្មកររោងចក្រស្នាក់ផ្ទះជួលជាមួយគ្នា មានស្រុកកំណើតនៅស្រុកកំពង់ត្របែកខេត្តព្រៃវែង។ ជនរងគ្រោះជិះម៉ូតូម៉ាកហុងដាឌ្រីមសេ១២៥ ស៊េរី២០១៤ ពណ៌ខ្មៅ អត់ស្លាកលេខភ្នំពេញ 1FA-7402។
តាមប្រភពព័ត៌មានពីជនរងគ្រោះបាននិយាយថា មុនពេលកើតហេតុនាងទើបត្រឡប់មកពីធ្វើការរោងចក្រវេនយប់ហើយបានជិះម៉ូតូ២នាក់ មិត្តភក្កិរបស់នាងឆ្ពោះទៅបន្ទប់ជួលវិញ ហើយបានឃើញជនសង្ស័យ២នាក់ ជិះម៉ូតូតាមពីក្រោយពួកនាង លុះជនរងគ្រោះបើកម៉ូតូ មកដល់មុខផ្ទះជួល ស្រាប់តែ ជនសង្ស័យជិះម៉ូតូហួសបន្តិច ដោយជនសង្ស័យម្នាក់ជិះក្រោយបានចុះពីលើម៉ូតូ ហើយមកដណ្តើម ម៉ូតូរបស់នាង និងវាយនាង៣ដៃផងដែរ។
ប្រភពបន្ដថា ពេលនោះអាម្នាក់ទៀត ដែលអង្គុយលើម៉ូតូបានស្រែកថា ដកកាំភ្លើងបាញ់វាទៅ តែតាមពិតជនសង្ស័យខាងលើ មិនមានកាំភ្លើងនោះឡើយបន្ទាប់មកជនរងគ្រោះ បានស្រែកថា ចោរៗផ្អើលដល់ប្រជាពលរដ្ឋចេញមកពីផ្ទះជួលនាំគ្នាចាប់បានជនសង្ស័យម្នាក់ហើយម្នាក់ទៀតបានជិះម៉ូតូគេចខ្លួនបាត់។ ចំណែកជនសង្ស័យម្នាក់ ដែលឃាត់បានត្រូវបានប្រជាពលរដ្ឋ វាយបណ្តាលឲ្យបែកក្បាលផងដែរ ហើយប្តឹងទៅសមត្ថកិច្ចឲ្យមកជួយអន្តរាគមន៍ភ្លាមៗរួចនាំទៅសាកសួរបន្តនៅប៉ុស្តិ៍នគរបាលរដ្ឋបាលចោមចៅទី៣។
ក្រោយពេលកើតហេតុជនរងគ្រោះបានមកដាក់ពាក្យបណ្ដឹងនៅនគរបាលប៉ុស្តិ៍ចោមចៅទី៣ហើយសមត្ថកិច្ចបានកសាងសំណុំរឿងបញ្ជូនទៅជំនាញព្រហ្មទណ្ឌខណ្ឌពោធិ៍សែនជ័យដើម្បីចាត់ការបន្ដតាមនីតិវិធី៕
Source: Kampuchea Thmey Daily
0 Comments