រតនគិរី ៖ រថយន្តសាំយ៉ុងបានជ្រុលចង្កូតបុកម៉ូតូក្នុងទិសដៅស្របទិសគ្នាបណ្តាលឲ្យជនរងគ្រោះរងរបួសធ្ងន់។
ករណីគ្រោះថ្នាក់ចរាចរណ៍ បានកើតឡើងកាលពីវេលាម៉ោង១០និង៤៥នាទីព្រឹក ថ្ងៃសៅរ៍ ១៤កើត ខែបុស្ស ឆ្នាំច សំរឹទ្ធិស័ក ព.ស២៥៦២ ត្រូវនិងថ្ងៃទី១៩ ខែមករា ឆ្នាំ២០១៩ នៅលើកំណាត់ផ្លូវជាតិលេខ៧៨A ទល់មុខចម្ការឈ្មោះ ហឿង ស្ថិតក្នុងភូមិទូយ ឃុំទីងចាក់ ស្រុកបរកែវ។
មន្ត្រីនគរបាលស្រុកបរកែវបានឲ្យដឹងថា ជនរងគ្រោះឈ្មោះ មាត់ មៃនាង ភេទស្រី អាយុ១៩ឆ្នាំ ជនជាតិខ្មែរឥស្លាម រស់នៅភូមិ/ឃុំកើតហេតុខាងលើ ជាកម្មករជៀរជ័រឲ្យឈ្មោះ ម៉ៅ។ បើកបរម៉ូតូមួយគ្រឿងម៉ាក សងកូរ៉េ ពណ៌ក្រហម គ្មានស្លាកលេខ បានរងរបួសធ្ងន់។
ចំណែកអ្នកបើកបររថយន្តបង្ក ឈ្មោះ ចាន់ ភេទប្រុស អាយុ៣៤ឆ្នាំ ជនជាតិខ្មែរ រស់នៅភូមិភ្នំស្វាយ សង្កាត់បឹងកន្សែង ក្រុងបានលុង ខេត្តរតនគិរី បើកបររថយន្តមួយគ្រឿងម៉ាកសាំយ៉ុង ពណ៌ស អត់ស្លាកលេខ ក្រោយកើតហេតុចុះរត់គេចខ្លួនបាត់។
ក្រោយកើតហេតុសមត្ថកិច្ចមូលដ្ឋានចុះមកអន្តរាគមន៍ធ្វើការវាស់វែង និង ដឹកបញ្ជូនជនរងគ្រោះទៅព្យាបាលនៅមន្ទីរពេទ្យបង្អែកខេត្ត។
បច្ចុប្បន្នមធ្យោបាយទាំង២គ្រឿង ត្រូវបានកម្លាំងរឹបអូសយកមករក្សាទុកនៅប៉ុស្តិ៍ទីងចាក់ដើម្បីរង់ចាំធ្វើការដោះស្រាយទៅតាមនីតិវិធីច្បាប់៕
Source: Kampuchea Thmey Daily
0 Comments