ប្រមុខរាជរដ្ឋាភិបាលកម្ពុជាសម្តេចអគ្គមហាសេនាបតីតេជោ ហ៊ុន សែន នៅថ្ងៃទី២០ខែមករានេះ ត្រូវអញ្ជើញបំពេញទស្សនកិច្ចផ្លូវការទៅកាន់ប្រទេសចិនរយៈ៤ថ្ងៃពីថ្ងៃទី២០ដល់២៣ខែ មករា ឆ្នាំ២០១៩។ ក្នុងដំណើរទស្សនកិច្ចរបស់សម្តេចតេជោនៅចិននាពេលនេះក្រៅពីពង្រឹងនិងពង្រីកបន្ថែមនូវកិច្ចសហប្រតិបត្តិការក្នុងភាពជាដៃគូយុទ្ធសាស្ត្រគ្រប់ជ្រុងជ្រោយនិងក៏នៅមានកិច្ចពិភាក្សាទ្វេរភាគីដែលផ្តោតទៅលើការផ្តល់ជំនួយ និង កម្ចីសម្បទានបន្ថែមទៀតសម្រាប់កសាងហេដ្ឋារចនាសម្ព័ន្ធនៅកម្ពុជា។ ជាមួយនេះ ប្រមុខរាជរដ្ឋាភិបាលកម្ពុជាក៏និងជួបជាមួយក្រុមហ៊ុនធំៗរបស់ចិនមួយចំនួនទៀតដើម្បីទាក់ទាញវិនិយោគមកកាន់កម្ពុជា។
មុនមួយថ្ងៃនៃដំណើរទស្សនកិច្ចផ្លូវការទៅកាន់ប្រទេសចិន កាលពីព្រឹកថ្ងៃសៅរ៍ ទី១៩ ខែមករា សម្តេចតេជោនាយករដ្ឋមន្ត្រី ហ៊ុន សែន បានលើកឡើងនៅក្នុងសារតាមហ្វេសប៊ុករបស់សម្តេចថា នៅក្នុងដំណើរទស្សនកិច្ចនៅប្រទេសចិនលើកនេះ សម្តេចមានគម្រោងពិភាក្សាការងារជាមួយលោកប្រធានាធិបតីចិន ស៊ី ជិនពីង និង លោកនាយករដ្ឋមន្ត្រីចិន លី ឃឺឈាង ដើម្បីពង្រឹងនូវចំណងមិត្តភាព និងកិច្ចសហប្រតិបត្តិការ ក្នុងនាមជាប្រទេសដៃគូយុទ្ធសាស្ត្រគ្រប់ជ្រុងជ្រោយ។ យើងនឹងមានកិច្ចពិភាក្សាលើការពង្រឹងវិស័យសេដ្ឋកិច្ច ពាណិជ្ជកម្ម និង វិនិយោគផងដែរ ។ អនុស្សរណៈនិងកិច្ចព្រមព្រៀងមួយចំនួន ត្រូវបានពង្រាងរួចហើយ សម្រាប់ចុះហត្ថលេខាជាមួយភាគីមិត្តចិន។
ជាមួយនេះប្រមុខរាជរដ្ឋាភិបាលកម្ពុជាក៏បានបញ្ជាក់ថា មិត្តចិនមានទំនាក់ទំនងល្អដូចជាបងប្អូន និង បានជួយកម្ពុជាយើងយ៉ាងច្រើនចាប់តាំងពីជំនាន់សម្តេចតាមកទល់សព្វថ្ងៃនេះ ។ សម្តេចបានសូមអរគុណមិត្តចិនចំពោះការជួយជ្រោមជ្រែងទាំងឡាយ ដែលបានធ្វើអោយកម្ពុជារីកចម្រើនមកទល់សព្វថ្ងៃ។
ជុំវិញដំណើរទស្សនកិច្ចផ្លូវការរបស់សម្តេចតេជោ ហ៊ុន សែន ទៅកាន់ប្រទេសចិននេះផង ក្រសួងការបរទេស និង សហប្រតិបត្តិការអន្តរជាតិក៏បានប្រកាសកាលពីថ្ងៃទី១៨ ខែមករាថា ក្រៅពីជួបមេដឹកនាំកំពូលៗរបស់ប្រទេសចិនសម្តេចតេជោនាយករដ្ឋមន្ត្រីនឹងទទួលជួបជាមួយថ្នាក់ដឹកនាំធុរៈកិច្ចចិនចំនួន៤រូបពីធនាគារចិន សាជីវកម្មស្ពានថ្នល់ចិន ក្រុមហ៊ុនវិស្វកម្ម និងដែកថែបចិន និងក្រុមហ៊ុនហួណេងគ្រុប។
ក្រសួងការបរទេស បានគូសបញ្ជាក់ថា ក្នុងអំឡុងពេលស្នាក់នៅប្រទេសចិន សម្តេចតេជោនាយករដ្ឋមន្ត្រី ហ៊ុន សែន នឹងអញ្ជើញទៅទស្សនាការតាំងពិព័រណ៍ខួបអនុស្សាវរីយ៍ លើកទី៤០ នៃ «កំណែទម្រង់ និងការបើកទូលាយ» ប្រទេសចិនអញ្ជើញចូលរួមជាអធិបតីក្នុងពិធីបើកវេទិកាសេដ្ឋកិច្ចនិងពាណិជ្ជកម្ម កម្ពុជា-ចិន ឆ្នាំ២០១៩ ផងដែរ។
កម្ពុជា និងចិន បានបង្កើតទំនាក់ទំនងការទូតជាផ្លូវការនៅថ្ងៃទី១៩ កក្កដា ១៩៥៨ បន្ទាប់ពីជំនួបទ្វេភាគីលើកទី១ រវាងព្រះករុណាព្រះបាទសម្តេចព្រះ នរោត្តម សីហនុ ព្រះបរមរតនកោដ្ឋ និងលោក ជូ អេនឡាយ អតីតនាយករដ្ឋមន្ត្រីចិនក្នុងអំឡុងពេលចូលរួមសន្និសីទទីក្រុងបានឌុងនៅខែមេសា ១៩៥៥ នៅទីក្រុងបានឌុងប្រទេសឥណ្ឌូនេស៊ី និងការបំពេញទស្សនកិច្ចទៅវិញទៅមករវាងថ្នាក់ដឹកនាំជាន់ខ្ពស់នៃប្រទេសទាំងពីរក្នុងអំឡុងឆ្នាំ១៩៥៦ ។ ទំនាក់ទំនងមិត្តភាពជាប្រវត្តិសាស្ត្រនេះបានកសាងឡើងរួមគ្នាដោយព្រះករុណាព្រះបាទសម្តេចព្រះ នរោត្តម សីហនុ ព្រះបរមរតនកោដ្ឋ និងលោកប្រធាន ម៉ៅ សេទុង លោកនាយករដ្ឋមន្ត្រី ជូ អេនឡាយ ព្រមទាំងថ្នាក់ដឹកនាំចិនជំនាន់មុនៗដែលធ្វើឱ្យមានការរីកចម្រើនជាបន្តបន្ទាប់រហូតក្លាយទៅជាកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយនៅថ្ងៃទី១៣ ខែ ធ្នូ ឆ្នាំ ២០១០។
ក្នុងនាមជានាយករដ្ឋមន្ត្រីនៃព្រះរាជាណាចក្រកម្ពុជាសម្តេចតេជោ ហ៊ុន សែន បានអញ្ជើញទៅបំពេញទស្សនកិច្ចផ្លូវការនៅប្រទេសចិនចាប់ពីខែកុម្ភៈ ឆ្នាំ ១៩៩៩ និង ជាបន្តបន្ទាប់នៅខែ មេសា ឆ្នាំ២០០៤ និង ឆ្នាំ២០១៣ ឆ្នាំ២០១៥ ឆ្នាំ២០១៧ និងនៅឆ្នាំ២០១៨ គឺតាំងពីជំនាន់ប្រធានាធិបតីចិនគឺលោក ចាង ហ្សេមិន ( Jiang Zemin) បន្តដល់ប្រធានាធិបតីចិន លោក ហ៊ូ ជិនតាវ ( Hu Jintao) នៅរហូតដល់ជំនាន់លោក ស៊ី ជិនពីង (Xi Jinping )ជាប្រធានាធិបតី ។
ពាណិជ្ជកម្មទ្វេភាគីរវាងកម្ពុជានិងចិនក៏មានការកើនឡើងគួរឲ្យកត់សម្គាល់ក្នុងរយៈពេលមួយទសវត្សរ៍ចុងក្រោយនេះ ដោយបានកើនឡើងដល់ ៥,៨ ប៊ីលានដុល្លារតាមស្ថិតិឆ្នាំ ២០១៧ គឺកើនឡើងប្រមាណ ២២% ធៀបនឹងឆ្នាំកន្លងទៅ ។ សម្រាប់ការវិនិយោគពីប្រទេសចិនមានការកើនឡើងគួរឲ្យកត់សម្គាល់រយៈពេលបីឆ្នាំកន្លងទៅនេះដោយបានកើនឡើងពីប្រមាណ ៩០០ លានដុល្លារនៅឆ្នាំ ២០១៦ ដល់ ១,៦ ប៊ីលានដុល្លារនៅឆ្នាំ ២០១៧ និងក្នុងរយៈពេល ៧ ខែដើមឆ្នាំ ២០១៨ នេះបានកើនដល់ ២,៨ ប៊ីលានដុល្លារ។ អ្នកទេសចរចិនទៅទស្សនាកម្ពុជាវិញបានកើនឡើងដល់ ១,៦ លាននាក់ ហើយមានក្រុមហ៊ុនអាកាសចរណ៏ចិនចំនួន ១៦ ក្រុមហ៊ុនកំពុងប្រតិបត្តិការហោះហើរត្រង់ពីចិនទៅកម្ពុជា ។ លើសពីនេះទៀតដើម្បីឆ្លើយតបទៅនឹងកំណើនទំនាក់ទំនងពាណិជ្ជកម្មនិងទេសចរណ៍រវាងប្រទេសទាំងពីរក្រុមហ៊ុនអាកាសចរណ៍ AirChina បានបើកជើងហោះហើរត្រង់ពីប៉េកាំងមកភ្នំពេញ ដោយចាប់ផ្តើមនៅថ្ងៃទី ០១ ខែវិច្ឆិកា ឆ្នាំ២០១៨ ។
ប្រទេសចិនបានក្លាយទៅជាដៃវិនិយោគធំបំផុតរបស់កម្ពុជាមកដល់ឆ្នាំ ២០១៨ ក្រុមហ៊ុនចិនបានដាក់វិនិយោគទុននៅកម្ពុជាមានទុនសរុបជាង ២០ ពាន់លានដុល្លារ ហើយក្រុមហ៊ុនចិន ៧០ភាគរយ ជាក្រុមហ៊ុនផលិតសម្លៀកបំពាក់និងស្បែកជើង។ ក្រុមហ៊ុនទាំងនេះបានផ្តល់ការងារដល់ប្រជាពលរដ្ឋកម្ពុជារាប់សែននាក់ ។ ជាពិសេសនៅក្នុងខេត្តព្រះសីហនុក្នុងតំបន់សេដ្ឋកិច្ចពិសេសបានផ្តល់ការងារជូនប្រជាពលរដ្ឋខ្មែរប្រមាណ ២ ម៉ឺន២ពាន់នាក់។ ចិនក៏បានពង្រីកការវិនិយោគទុនកាន់តែច្រើនក្នុងវិស័យអគ្គិសនីនៅកម្ពុជាដើម្បីដោះស្រាយបញ្ហាខ្វះខាតអគ្គិសនីប្រើប្រាស់របស់ប្រជាពលរដ្ឋកម្ពុជា ។ ក្រុមហ៊ុនចិនបានដំឡើងខ្សែបណ្តាញអគ្គិសនីបានលើសពី ៨ ពាន់គីឡូម៉ែត្រ ហើយទំហំនៃការផលិតថាមពលអគ្គិសនីនៅកម្ពុជាគឺ ៨០ភាគរយផលិតដោយក្រុមហ៊ុនចិន។ ថាមពលអគ្គិសនីនេះបានជួយកាត់បន្ថយតម្លៃដើមនៃផលិតកម្មរបស់ក្រុមហ៊ុននិងជួយកាត់បន្ថយតម្លៃប្រើប្រាស់អគ្គិសនីរបស់ប្រជាពលរដ្ឋកម្ពុជា។ ចិនបានផ្តល់នូវកម្ចីសម្បទានដើម្បីកសាងផ្លូវលើសពី ៣ ពាន់គីឡូម៉ែត្រ ហើយក៏បានកសាងស្ពានជាច្រើនហើយគម្រោងធារាសាស្ត្រក៏មានទំហំធំប្រហែល ៤៥,៦ ម៉ឺនហិកតាសម្រាប់ផ្តល់ការស្រោចស្រប់ដល់ដំណាំរបស់ប្រជាពលរដ្ឋ ។
នៅរាល់ដំណើរទស្សនកិច្ចរបស់សម្តេចតេជោ ហ៊ុន សែន ទៅកាន់ប្រទេសចិន តែងនាំត្រឡប់មកវិញនូវជំនួយយ៉ាងច្រើនសន្ធឹកសន្ធាប់សម្រាប់អភិវឌ្ឍប្រទេសព្រមទាំងទាក់ទាញអ្នកវិនិយោគចិន មកកាន់កម្ពុជាកាន់តែច្រើន ។ ដូចជានៅក្នុងដំណើរទស្សនកិច្ចលើកដំបូងរបស់សម្តេច ហ៊ុន សែន ទៅកាន់ប្រទេសចិន កម្ពុជាទទួលបានប្រាក់កម្ចីសម្បទានពីចិន២០០ លានដុល្លារ ហើយចិនក៏បានផ្តល់ជំនួយបន្ថែមដល់កម្ពុជា ១៨,៣ លានដុល្លារថែមទៀត ។ រាល់ដំណើរទស្សនកិច្ចរបស់ប្រមុខរាជរដ្ឋាភិបាលទៅកាន់ប្រទេសចិនម្តងៗគឺក្រៅតែពីពង្រឹងនិងពង្រីកទំនាក់ទំនងកិច្ចសហប្រតិបត្តិការយុទ្ធសាស្ត្រគ្រប់ជ្រុងជ្រោយរវាងកម្ពុជានិងចិន គឺកម្ពុជាតែងតែទទួលបានជំនួយជាកម្ចីសម្បទាននិងជាជំនួយឥតសំណដើម្បីអភិវឌ្ឍន៍ប្រទេសកម្ពុជាដូចជា ផ្លូវ និងស្ពាន ជាដើម។ ក្រៅពីនោះ ក៏នៅមានកិច្ចព្រមព្រៀង អនុស្សរណៈជាច្រើនទៀត ដែលអនុញ្ញាតឲ្យអ្នកវិនិយោគចិន ចូលមកបោះទុននៅកម្ពុជាយ៉ាងច្រើន ។ ដូច្នេះទស្សនកិច្ចរបស់សម្តេចតេជោ ហ៊ុន សែន ទៅកាន់ប្រទេសលើកនេះ ក៏មិនខុសពីដំណើរទស្សនកិច្ចលើកមុនៗកន្លងមកឡើយ៕
Source: Kampuchea Thmey Daily
0 Comments