ភ្នំពេញ ៖ មុនអញ្ជើញទៅបំពេញទស្សនកិច្ចផ្លូវការទៅកាន់សាធារណរដ្ឋប្រ ជាមានិតចិន ប្រមុខរាជរដ្ឋាភិបាលកម្ពុជាសម្តេចអគ្គមហាសេនាបតីតេជោ ហ៊ុន សែន បានផ្ញើសារនៅលើហ្វេសប៊ុកនា ថ្ងៃទី១៩ ខែមករានេះ ដោយបានគូសបញ្ជាក់អំពីដំណើរទស្សនកិច្ចនេះថា ដើម្បីពង្រឹងចំណងមិត្តភាពនិងកិច្ចសហប្រតិបត្តិការក្នុងនាមជាប្រទេសដៃគូយុទ្ធសាស្ត្រគ្រប់ជ្រុងជ្រោយ និងពង្រឹងវិស័យសេដ្ឋកិច្ច ពាណិជ្ជកម្ម និងវិនិយោគផងដែរ។ សម្តេចក៏បានអរគុណមិត្តចិនចំពោះការជួយជ្រោមជ្រែងទាំងឡាយដែលបានធ្វើអោយកម្ពុជារីកចម្រើនមកទល់សព្វថ្ងៃ។
ក្រៅពីនេះជំនួបទ្វេភាគីជាមួយមេដឹកនាំចិន ក៏នឹងមានការចុះហត្ថលេខាលើអនុស្សរណៈនិងកិច្ចព្រមព្រៀងមួយចំនួនផងដែរ។ សម្តេចថ្លែងថា មិត្តចិនមានទំនាក់ទំនងល្អដូចជាបងប្អូននិងបានជួយកម្ពុជាយើងយ៉ាងច្រើនចាប់តាំងពីជំនាន់សម្តេចតាមកទល់សព្វថ្ងៃនេះ។ កម្ពុជាសូមអរគុណមិត្តចិនចំពោះការជួយជ្រោមជ្រែងទាំងឡាយដែលបានធ្វើឲ្យកម្ពុជារីកចម្រើនមកទល់សព្វថ្ងៃ។
សារទាំងស្រុងរបស់ប្រមុខរាជរដ្ឋាភិបាលមានខ្លឹមសារថា «នៅថ្ងៃអាទិត្យទី២០ ខែមករា ស្អែកនេះខ្ញុំនឹងទៅបំពេញទស្សនកិច្ចផ្លូវការនៅប្រទេសចិនរយៈពេល៣ថ្ងៃ(២០-២៣ មករា ២០១៩)។នៅក្នុងដំណើរទស្សនកិច្ចលើកនេះខ្ញុំមានគម្រោងពិភាក្សាការងារជាមួយលោកប្រធានាធិបតីចិន ស៊ី ជិនពីង និង លោកនាយករដ្ឋមន្ត្រីចិន លី ឃឺឈាង ដើម្បីពង្រឹងនូវចំណងមិត្តភាពនិងកិច្ចសហប្រតិបត្តិការ ក្នុងនាមជាប្រទេសដៃគូយុទ្ធសាស្ត្រគ្រប់ជ្រុងជ្រោយ។ នៅក្នុងឱកាសនោះយើងនឹងមានកិច្ចពិភាក្សាលើការពង្រឹងវិស័យសេដ្ឋកិច្ច ពាណិជ្ជកម្ម និងវិនិយោគផងដែរ។
អនុស្សរណៈនិងកិច្ចព្រមព្រៀងមួយចំនួនត្រូវបានពង្រាងរួចហើយសម្រាប់ចុះហត្ថលេខាជាមួយភាគីមិត្តចិន។ មិត្តចិនមានទំនាក់ទំនងល្អដូចជាបងប្អូន និងបានជួយកម្ពុជាយើងយ៉ាងច្រើនចាប់តាំងពីជំនាន់សម្តេចតាមកទល់សព្វថ្ងៃនេះ។ កម្ពុជាសូមអរគុណមិត្តចិនចំពោះការជួយជ្រោមជ្រែងទាំងឡាយដែលបានធ្វើអោយកម្ពុជារីកចម្រើនមកទល់សព្វថ្ងៃ។
សូមជូនពរបងប្អូនជនរួមជាតិបានសប្បាយរីករាយថ្ងៃសម្រាកចុងសប្តាហ៍ និងជួបតែសេចក្តីសុខចម្រុងចម្រើនគ្រប់ៗគ្នា»។
តាមកម្មវិធីគ្រោងទុកប្រមុខរាជរដ្ឋាភិបាលកម្ពុជានឹងដឹកនាំគណៈប្រតិភូរាជរដា្ឋភិបាលកម្ពុជាទៅបំពេញទស្សនកិច្ចផ្លូវការ នៅសាធារណរដ្ឋប្រជាមានិតចិននៅវេលាម៉ោង ៨ ព្រឹកថ្ងៃទី ២០ ខែ មករានេះ តាមជើងយន្តហោះពិសេសរបស់ព្រះរាជាណាចក្រកម្ពុជា។
យោងតាមសេចក្ដីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ នាថ្ងៃទី១៨ ខែមករា ឆ្នាំ២០១៩ បានឲ្យដឹងថា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងដឹកនាំគណៈប្រតិភូជាន់ខ្ពស់ អញ្ជើញ ទៅបំពេញទស្សនកិច្ចផ្លូវការនៅសាធារណរដ្ឋប្រជាមានិតចិន ពីថ្ងៃទី២០ ដល់ថ្ងៃទី ២៣ ខែមករា ឆ្នាំ២០១៩ តបតាមការអញ្ជើញរបស់ លោកលី ខឺឈាង (Li Keqiang) នាយករដ្ឋមន្ត្រីនៃសាធារណរដ្ឋប្រជាមានិតចិន។
អញ្ជើញអមដំណើរសម្តេចតេជោនាយករដ្ឋមន្ត្រី រួមមានលោក ហោ ណាំហុង ឧបនាយករដ្ឋមន្ត្រី លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម លោក ថោង ខុន រដ្ឋមន្ត្រីក្រសួងទេសចរណ៍ ព្រមទាំងឥស្សរជនជាន់ខ្ពស់នៃរាជរដ្ឋាភិបាល និងថ្នាក់ដឹកនាំធុរកិច្ចនៃសភាពាណិជ្ជកម្មកម្ពុជាផងដែរ។
ក្នុងអំឡុងពេលទស្សនកិច្ចសម្តេចតេជោនាយករដ្ឋមន្ត្រី នឹងជួបសម្ដែងការគួរសមជាមួយ លោក ស៊ី ជីនពីង (Xi Jinping) ប្រធានាធិបតីចិន ,លោក លីចាន់ស៊ូ (LiZhanshu) ប្រធានគណៈកម្មាធិការអចិន្ត្រៃយ៍នៃសភាប្រជាជនចិន ,លោក វ៉ាង យ៉ាង (Wang Yang) ប្រធានសភាប្រឹក្សានយោបាយចិននិងជួបពិភាក្សាទ្វេភាគីជាមួយលោក លី ខឺឈាង (Li Keqiang) នាយករដ្ឋមន្ត្រីចិន។ ការជួបពិភាក្សានឹងផ្តោតទៅលើការពង្រឹងនិងពង្រីកបន្ថែមទៀតនូវកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយរវាងកម្ពុជានិងចិនដើម្បីផលប្រយោជន៍នៃប្រជាជាតិទាំងពីរ។ក្នុងអំឡុងពេលទស្សនកិច្ចនេះរំពឹងថានឹងមានការចុះហត្ថលេខាលើឯកសារនិងកិច្ចព្រមព្រៀងកិច្ចសហប្រតិបត្តិការមួយចំនួនផងដែរ។
ក្រៅពីជំនួបខាងលើសម្តេចតេជោនាយករដ្ឋមន្ត្រីនឹងទទួលការចូលជួបសម្តែងការគួរសមដាច់ដោយឡែកពីគ្នាដោយលោករដ្ឋមន្ត្រី សុង តាវ ប្រធានមន្ទីរទំនាក់ទំនងអន្តរជាតិរបស់គណៈកម្មធិការមជ្ឈិមបក្សកុម្មុយនីស្តចិននិងលោកស្រី គូ សៀវលៀន ប្រធានសមាគមមិត្តភាពចិន-កម្ពុជា និងថ្នាក់ដឹកនាំធុរកិច្ចចំនួន៤រូបទៀតពីធនាគារចិន ,សាជីវកម្មស្ពានថ្នល់ចិន, ក្រុមហ៊ុនវិស្វកម្ម និងដែកថែបចិន និងក្រុមហ៊ុនហួណេងគ្រុប។
ក្នុងអំឡុងពេលស្នាក់នៅប្រទេសចិនសម្តេចតេជោនាយករដ្ឋមន្ត្រីនឹងអញ្ជើញទៅ ទស្សនាការតាំងពិព័រណ៍ខួបអនុស្សាវរីយ៍លើកទី៤០ នៃ «កំណែទម្រង់ និងការបើកទូលាយ» ប្រទេសចិន អញ្ជើញចូលរួមជាអធិបតីក្នុងពិធីបើកវេទិកាសេដ្ឋកិច្ចនិងពាណិជ្ជកម្ម កម្ពុជា-ចិន ឆ្នាំ២០១៩ និងជួបសំណេះសំណាល ជាមួយនិស្សិតកម្ពុជា ដែលកំពុងសិក្សានៅ ប្រទេសចិន ផងដែរ។
កម្ពុជា និងចិន បានបង្កើតទំនាក់ទំនងការទូតជាផ្លូវការនៅថ្ងៃទី ១៩ កក្កដា ១៩៥៨ បន្ទាប់ពីជំនួបទ្វេភាគីលើកទី ១ រវាងព្រះករុណាព្រះបាទសម្តេចព្រះ នរោត្តម សីហនុ ព្រះបរមរតនកោដ្ឋ និងលោក ជូ អេនឡាយ អតីតនាយករដ្ឋមន្ត្រីចិនក្នុងអំឡុងពេលចូលរួមសន្និសីទទីក្រុងបានឌុងនៅខែមេសា ១៩៥៥ នៅទីក្រុងបានឌុងប្រទេសឥណ្ឌូនេស៊ី និងការបំពេញទស្សនកិច្ចទៅវិញទៅមករវាងថ្នាក់ដឹកនាំជាន់ខ្ពស់ នៃប្រទេសទាំងពីរក្នុងអំឡុងឆ្នាំ១៩៥៦។ទំនាក់ទំនងមិត្តភាពជាប្រវត្តិសាស្ត្រនេះបានកសាងឡើងរួមគ្នាដោយព្រះករុណាព្រះបាទសម្តេចព្រះ នរោត្តម សីហនុ ព្រះបរមរតនកោដ្ឋ និងលោកប្រធាន ម៉ៅ សេទុង លោកនាយករដ្ឋមន្ត្រី ជូ អេនឡាយ ព្រមទាំងថ្នាក់ដឹកនាំចិនជំនាន់មុនៗដែលធ្វើឱ្យមានការរីកចម្រើនជាបន្តបន្ទាប់រហូតក្លាយទៅជាកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយនៅថ្ងៃទី ១៣ ខែ ធ្នូ ឆ្នាំ ២០១០។
ពាណិជ្ជកម្មទ្វេភាគីរវាងកម្ពុជានិងចិនក៏មានការកើនឡើងគួរឲ្យកត់សម្គាល់ក្នុងរយៈពេលមួយទសវត្សរ៍ចុងក្រោយនេះដោយបានកើនឡើងដល់ ៥,៨ ប៊ីលានដុល្លារតាមស្ថិតិឆ្នាំ ២០១៧ គឺកើនឡើងប្រមាណ ២២% ធៀបនឹងឆ្នាំកន្លងទៅ។ សម្រាប់ការវិនិយោគពីប្រទេសចិនមានការកើនឡើងគួរឲ្យកត់សម្គាល់រយៈពេលបីឆ្នាំកន្លងទៅនេះដោយបានកើនឡើងពីប្រមាណ ៩០០ លានដុល្លារនៅឆ្នាំ ២០១៦ ដល់ ១,៦ ប៊ីលានដុល្លារនៅឆ្នាំ ២០១៧ និងក្នុងរយៈពេល ៧ ខែដើមឆ្នាំ ២០១៨ នេះបានកើនដល់ ២,៨ ប៊ីលានដុល្លារ។ អ្នកទេសចរចិនទៅទស្សនាកម្ពុជាវិញបានកើនឡើងដល់ ១,៦ លាននាក់ ហើយមានក្រុមហ៊ុនអាកាសចរណ៏ចិនចំនួន ១៦ ក្រុមហ៊ុនកំពុងប្រតិបត្តិការហោះហើរត្រង់ពីចិនទៅកម្ពុជា។ លើសពីនេះទៀតដើម្បីឆ្លើយតបទៅនឹងកំណើនទំនាក់ទំនងពាណិជ្ជកម្មនិងទេសចរណ៏រវាងប្រទេសទាំងពីរក្រុមហ៊ុនអាកាសចរណ៍ AirChina បានបើកជើងហោះហើរត្រង់ពីប៉េកាំងទៅភ្នំពេញ ដោយចាប់ផ្តើមនៅថ្ងៃទី ០១ ខែវិច្ឆិកា ឆ្នាំ២០១៨ ។
ប្រទេសចិនបានក្លាយទៅជាដៃវិនិយោគធំបំផុតរបស់កម្ពុជាមកដល់ឆ្នាំ២០១៨ ក្រុមហ៊ុនចិនបានដាក់វិនិយោគទុននៅកម្ពុជាមានទុនសរុបជាង ២០ពាន់លានដុល្លារហើយក្រុមហ៊ុនចិន ៧០ភាគរយ ជាក្រុមហ៊ុនផលិតសម្លៀកបំពាក់និងស្បែកជើង។ ក្រុមហ៊ុនទាំងនេះបានផ្តល់ការងារដល់ប្រជាពលរដ្ឋកម្ពុជារាប់សែននាក់។ ជាពិសេសនៅក្នុងខេត្តព្រះសីហនុក្នុងតំបន់សេដ្ឋកិច្ចពិសេសបានផ្តល់ការងារជូនប្រជាពលរដ្ឋខ្មែរប្រមាណ ២ម៉ឺន២ពាន់នាក់។ចិនក៏បានពង្រីកការវិនិយោគទុនកាន់តែច្រើនក្នុងវិស័យអគ្គិសនីនៅកម្ពុជាដើម្បីដោះស្រាយបញ្ហាខ្វះខាតអគ្គិសនីប្រើប្រាស់របស់ប្រជាពលរដ្ឋកម្ពុជា។ ក្រុមហ៊ុនចិនបានដំឡើងខ្សែបណ្តាញអគ្គិសនីបានលើសពី ៨ពាន់គីឡូម៉ែត្រហើយទំហំនៃការផលិតថាមពលអគ្គិសនីនៅកម្ពុជាគឺ ៨០ភាគរយផលិតដោយក្រុមហ៊ុនចិន។ ថាមពលអគ្គិសនីនេះបានជួយកាត់បន្ថយតម្លៃដើមនៃផលិតកម្មរបស់ក្រុមហ៊ុននិងជួយកាត់បន្ថយតម្លៃប្រើប្រាស់អគ្គិសនីរបស់ប្រជាពលរដ្ឋកម្ពុជា។ ចិនបាន ផ្តល់នូវកម្ចីសម្បទានដើម្បីកសាងផ្លូវលើសពី ៣ពាន់គីឡូម៉ែត្រហើយក៏បានកសាងស្ពានជាច្រើនហើយគម្រោងធារាសាស្ត្រក៏មានទំហំធំប្រហែល៤៥,៦ម៉ឺនហិកតាសម្រាប់ផ្តល់ការស្រោចស្រពដល់ដំណាំរបស់ប្រជាពលរដ្ឋ៕
Source: Kampuchea Thmey Daily
0 Comments