ភ្នំពេញ ៖ នៅរសៀលថ្ងៃទី១៩ ខែមករា ឆ្នាំ២០១៩ សាលាប៊ែលធី អន្តរជាតិ បានប្រារព្ធពិធីបើកការប្រកួតកីឡាបាល់ទាត់ ពានរង្វាន់សាលា ប៊ែលធី អន្តរជាតិ ឆ្នាំ២០១៩ (BELTEI CHAMPIONSTROPHY 2019) ដែលមានក្រុមប្រកួត U-13 ចំនួន ១៩និងU-16 ចំនួន ១៧ក្រុម មកពីសាលា ប៊ែលធី ទាំង ១៩សាខា និងមានសិស្សានុសិស្ស ចូលរួមគាំទ្រ ចំនួនជាង៥.៦២៩នាក់ នៅទីលានវិមានពហុកីឡដ្ឋានជាតិ អូឡាំពិកក្រោមអធិបតីភាពលោកបណ្ឌិត លី ឆេង តំណាងរាស្ត្រមណ្ឌលរាជធានីភ្នំពេញ និងជាអគ្គនាយក ប៊ែលធីគ្រុប និងលោកស្រី។
លោកលី ប៊ុនឆៃ អគ្គនាយករង ប៊ែលធី គ្រុប និងជាប្រធានគណៈគ្រប់គ្រងនាយកសាខា បានឲ្យដឹងថា ការប្រកួតកីឡាបាល់ទាត់ ពានរង្វាន់សាលា ប៊ែលធី អន្តរជាតិ ឆ្នាំ២០១៩ (BELTEI CHAMPIONS TROPHY 2019)នេះ ត្រូវបានរៀបចំឡើងដើម្បីឆ្លើយតបទៅនឹងគោលនយោបាយ ក្នុងការពង្រឹងលើវិស័យកីឡាគ្រប់ប្រភេទរបស់រាជរដ្ឋាភិបាល ដែលមាន សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងស្របតាមកម្មវិធីសិក្សារបស់ក្រសួងអប់រំ យុវជន និងកីឡា ដែលបានដាក់បញ្ចូលកម្មវិធីកីឡានេះ ទៅក្នុងកម្មវិធីសិក្សានៅទូទាំងប្រទេស។
សាលា ប៊ែលធី អន្តរជាតិ បានបញ្ចូលកម្មវិធីកីឡា ៤ប្រភេទ រួមមាន៖១-អប់រំកាយសម្រាប់សិស្សថ្នាក់ទី១-៦ ។២-កីឡា តៃក្វាន់ដូសម្រាប់សិស្សថ្នាក់ទី៧&៨ ។៣-កីឡា Futsal(U-13)សម្រាប់សិស្សថ្នាក់ទី៧&៨ ។ ៤-កីឡា Futsal (U-16)សម្រាប់សិស្សថ្នាក់ទី១០ និង ១១។
ក្រុមកីឡាករដែលទទួលបានជ័យលាភី ជើងឯកពានរង្វាន់សាលាប៊ែលធីអន្តរជាតិឆ្នាំ២០១៩ចែកចេញជា ២ក្រុម គឺ ក្រុមU-13 និង ក្រុមU-16 នឹងទទួលរង្វាន់ ដូចខាងក្រោម ៖
ទី១ក្រុមជើងឯក (The Winner) ត្រូវទទួលពានរង្វាន់ជើងឯកសាលា ប៊ែលធី អន្តរជាតិមេដាយមាស និង ថវិកាចំនួន 3,000,000 រៀល ទី២ ក្រុមជើងឯករង (Runner-up)មេដាយប្រាក់ និងថវិកាចំនួន 2,000,000 រៀល ទី៣ក្រុមលេខ៣មេដាយសំរិទ្ធ និងថវិកាចំនួន 1,000,000 រៀល ទី៤ ក្រុមគំរូ (Fair Play Team)ថវិកាចំនួន 500,000 រៀល ចំណែកឯក្រុមកីឡាករ ទាំង ២៨ក្រុម ដែលមិនបានជាប់ជ័យលាភី ក៏ទទួលបានថវិកាលើកទឹកចិត្ត ក្នុង ១ក្រុម 200,000រៀលផងដែរ។
ក្នុងឱកាសនោះផងដែរ លោកបណ្ឌិត លី ឆេងតំណាងរាស្ត្រមណ្ឌលរាជធានីភ្នំពេញ និងជាអគ្គនាយក ប៊ែលធី គ្រុប បានណែនាំដល់ក្មួយៗសិស្សានុសិស្សទាំងអស់ ឲ្យនាំគ្នាលេងកីឡាដែលអាចឲ្យសិស្សទទួលបាននូវសុខភាពល្អ មានទំនាក់ទំនងល្អ មានមេត្រីភាព និងមានសាមគ្គីភាពព្រមទាំងដើម្បីជៀសឲ្យផុតពីគ្រឿងញៀន ព្រោះគ្រឿងញៀននាំឲ្យមានគ្រោះថ្នាក់ដល់សុខភាព បោះបង់ការសិក្សា កើតមានអំពើហិង្សា លួច ឆក់ ប្លន់ ដែលបង្កឲ្យមានអសន្តិសុខដល់សង្គម និងធ្វើឲ្យបាត់បង់នូវកម្លាំងធនធានមនុស្សក្នុងការអភិវឌ្ឍប្រទេសជាតិ ព្រមទាំងបណ្តាលឲ្យប៉ះពាល់ដល់ កំណើនសេដ្ឋកិច្ចជាតិទៀតផង។
លោកបណ្ឌិតក៏បានផ្តាំផ្ញើដល់ក្មួយៗ ក្រុមកីឡាករទាំង ៣៦ក្រុមឲ្យប្រកួតជាមួយគ្នា តាមលក្ខណៈបច្ចេកទេស សីលធម៌ យុត្ដិធម៌ និងប្រកបដោយឆន្ទៈមុតមាំ ហើយចេះគោរពដៃគូប្រកួតរបស់ខ្លួន ព្រោះការប្រកួតនេះ ជាលក្ខណៈគ្រួសារប៊ែលធី បើទោះបី ឈ្នះ ឬចាញ់ ក៏នៅតែជាគ្រួសារប៊ែលធីដែរ។ឯកឧត្តមបណ្ឌិតក៏បានជូនពរដល់ក្មួយៗកីឡាករតាមក្រុមនីមួយៗទទួលបានជោគជ័យ ក្នុងការប្រកួតកីឡាបាល់ទាត់ ពានរង្វាន់សាលា ប៊ែលធី អន្តរជាតិ ឆ្នាំ២០១៩នាពេលនេះផងដែរ។
បន្ទាប់មក លោកបណ្ឌិតប្រធានគណៈអធិបតីបានប្រគល់បាល់ជូនក្រុមអាជ្ញាកណ្តាល ជានិមិត្តរូបនៃការបើកកម្មវិធីប្រកួតបាល់ទាត់ U-13 និងU-16។
សូមរំលឹកថា សាលា ប៊ែលធី អន្តរជាតិ ចាប់ទទួលចុះឈ្មោះសិស្សពីថ្ងៃនេះតទៅ នៅគ្រប់ទីតាំងប៊ែលធី ទាំង ១៩សាខា ថ្នាក់ចំណេះទូទៅ ឆមាសទី២ ចូលរៀនថ្ងៃទី ១៨ មីនា ២០១៩ និង ថ្នាក់ភាសាអង់គ្លេស វគ្គថ្មីចូលរៀនថ្ងៃទី ៤ ខែមីនា ២០១៩ ។ចំពោះការបង់ថ្លៃសិក្សា ១វគ្គ ផ្តល់ជូន សៀវភៅគូល័រច្បាប់ដើម ១ឈុត ផងដែរ៕
Source: Kampuchea Thmey Daily
0 Comments