ភ្នំពេញ ៖ ប្រជាពលរដ្ឋ ចំនួន១៩២គ្រួសារ ដែលបានស្ម័គ្រចិត្តរស់នៅក្នុងបុរីរុងរឿងតំបន់អភិវឌ្ឍន៍ជ្រោយចង្វា រាជធានីភ្នំពេញ បានជួបជុំគ្នា និងទទួលអំណោយសប្បុរសធម៌ពីអ្នកឧកញ៉ា ពុង ឃាវសែ ដើម្បីត្រៀមអបអរក្នុងឧិកាសបុណ្យចូលឆ្នាំប្រពៃណីចិនខាងមុខនេះនិងមានការចូលរួមផងដែរ ពីសំណាក់ អាជ្ញាធរដែនដីសង្កាត់ជ្រោយចង្វាផងដែរ។
អំណោយដែលបានចែកជូនដល់ប្រជាពលរដ្ឋចំនួន១៩២គ្រួសារនាពេលនោះ រួមមានក្នុងមួយគ្រួសារទទួលបាន អង្ករ១០គីឡូក្រាម មីយើង២កេស សារ៉ុង១ នំធុង១ នំតែលៀវ១កញ្ចប់ កូកាកូឡា ១ដបធំនិងទឹកប្រាក់ចំនួន១០ម៉ឺនរៀលផងដែរ។
អ្នកឧកញ៉ា ពុង ឃាវសែ អគ្គនាយកក្រុមហ៊ុន OCIC ដែលតែងតែយកចិត្តទុកដាក់ចំពោះសុខទុក្ខរបស់បងប្អូនប្រជាពលរដ្ឋដែលស្ម័គ្រចិត្តមករស់នៅក្នុងបុរីរុងរឿងនេះ បានប្តេជ្ញាថានឹងធ្វើឲ្យប្រជាពលរដ្ឋដែលរស់នៅក្នុងតំបន់អភិវឌ្ឍន៍នេះមានភាពងាយស្រួលនិងជីវភាពល្អប្រសើរឡើងរួមជាមួយនឹងគំរោងអភិវឌ្ឍន៍ផ្សេងៗទៀតដូចជាមានផ្សារ សាលារៀននិងមន្ទីរពេទ្យជាដើម។
គួររំលឹកថា តំបន់អភិវឌ្ឍន៍ជ្រោយចង្វាបុរីរុងរឿង ដែលបងប្អូនរស់នៅសព្វថ្ងៃនេះ កាលពីដើមឡើយ ជាតំបន់ស្ងាត់ មិនមានមនុស្សឆ្លងកាត់កុះករ មិនមានទឹកភ្លើង សម្រាប់បងប្អូនប្រើប្រាស់ដូចពេលបច្ចុប្បន្ននោះទេ ហើយជាដីកសិកម្ម តែក្រោយពីមានការអភិវឌ្ឍន៍ តំបន់នេះក្លាយជាតំបន់ដែលមានសក្ដានុពល មានហេដ្ឋារចនាសម្ព័ន្ធល្អ សម្រួលដល់ការធ្វើអាជីវកម្មរបស់ប្រជាពលរដ្ឋដែលរស់នៅទីនោះ៕
Source: Kampuchea Thmey Daily
0 Comments