មេធាវី​សិទ្ធិមនុស្ស​ចិន​ ត្រូវបាន​ដាក់ពន្ធនាគារ​ពីបទ​ប៉ុនប៉ង​ផ្តួលរំលំ​រដ្ឋ​

តុលាការ​ចិន​ភាគ​ខាងជើង​បាន​និយាយថា មេធាវី​ការពារ​សិទ្ធិមនុស្ស​ចិន​ដ៏​ល្បីល្បាញ​ឈ្មោះ Wang Quanzhang ត្រូវបាន​កាត់ទោស​កាល​ពីថ្ងៃ​ចន្ទ​ឲ្យ​ជាប់ពន្ធនាគារ​រយៈពេល​៤​ឆ្នាំកន្លះ​ពីបទ​មានបំណង​ផ្តួលរំលំ​រដ្ឋ​។​

លោក Wang អាយុ​៤២​ឆ្នាំ​ដែល​បាន​ការពារ​ក្រុម​សកម្មជន​នយោបាយ​និង​ជនរងគ្រោះ​នៃ​ការ​រឹបអូស​យក​ដីធ្លី​បាន​បាត់​ខ្លួន​នៅក្នុង​ការ​បោសសម្អាត​ឆ្នាំ​២០១៥​ដែល​ត្រូវបាន​គេ​ស្គាល់​ថា​ជាការ​បង្ក្រាប “៧០៩”​។​

ដោយ​ត្រូវបាន​ចោទប្រកាន់​នៅក្នុង​ខែមករា​ឆ្នាំ​២០១៦​ពីបទ​ប៉ុនប៉ង​ផ្តួលរំលំ​រដ្ឋ លោក Wang គឺជា​មនុស្ស​ចុងក្រោយ​ក្នុងចំណោម​មេធាវី​និង​សកម្មជន​ជាង​២០០​នាក់​ដែល​ត្រូវបាន​ចាប់ខ្លួន​នៅក្នុង​ការបង្ក្រាប “៧០៩” ដែល​នឹងត្រូវ​កាត់ទោស​ឬ​ដោះលែង​។​

តុលាការ Tianjin Second Intermediate People បាន​និយាយ​នៅក្នុង​សេចក្តីថ្លែងការណ៍​មួយ​ថា លោក Wang ត្រូវបាន​គេ​រកឃើញថា​មានទោស​ពីបទ​ប៉ុនប៉ង​ផ្តួលរំលំ​រដ្ឋអំណាច​ហើយ​ត្រូវ​ផ្តន្ទាទោស​ឲ្យ​ជាប់ពន្ធនាគារ​៤​ឆ្នាំ​៦​ខែ​និង​ត្រូវបាន​ដកហូត​សិទ្ធិ​នយោបាយ​រយៈពេល​៥​ឆ្នាំ​។​

បន្ទាប់ពី​ត្រូវបាន​ឃុំខ្លួន​ដោយ​គ្មាន​កាលបរិច្ឆេទ​ជំនុំជម្រះ​រយៈពេល​ពីរ​ឆ្នាំ សវនាការ​របស់លោក Wang បានធ្វើ​ឡើង​នៅ​ពីក្រោយ​ការបិទទ្វារ​ក្នុង​ទីក្រុង Tianjin កាលពី​ថ្ងៃទី​២៦​ខែធ្នូ​។​

នៅពេលនោះ តុលាការ​បាន​និយាយថា ការកាត់ក្តី​នេះ​ត្រូវ​បិទ​ចំពោះ​សាធារណជន​ដោយសារតែ​ការសម្ងាត់​របស់​រដ្ឋ​មាន​ជាប់​ពាក់ព័ន្ធ​នៅក្នុង​នោះ​។​

ភរិយា​របស់លោក Wang គឺ​លោកស្រី Li Wenzu ត្រូវបាន​គេ​ដាក់​នៅក្រោម​ការឃុំ​ឃាំង​ក្នុងផ្ទះ​មួយថ្ងៃ​មុនពេល​ការកាត់ក្តី​ស្វាមី​របស់លោក​ស្រី​ដើម្បី​រារាំង​លោកស្រី​ពី​ការចូលរួម​។​

លោកស្រី Li បានធ្វើ​ការតវ៉ា​យ៉ាង​ស្វិតស្វាញ​ចំពោះ​ការឃុំ​ឃាំង​ស្វាមី​របស់លោក​ស្រី​។ កាលពី​ខែមេសា​ឆ្នាំមុន លោកស្រី​បាន​ព្យាយាម​ដើរ​ក្បួន​ចម្ងាយ​១០០​គីឡូម៉ែត្រ​ឆ្ពោះទៅ​កន្លែង​ឃុំឃាំង​ស្វាមី​របស់លោក​ស្រី​នៅក្នុង​ទីក្រុង Tianjin​។​

នៅក្នុង​ខែធ្នូ មុនពេល​កាលបរិច្ឆេទ​តុលាការ​របស់លោក Wang ត្រូវបាន​ប្រកាស​, លោក Li និង​អ្នកគាំទ្រ​ចំនួន​៣​នាក់​បាន​កោរសក់​ហើយ​ព្យាយាម​ដាក់​ញត្តិ​ទៅ​តុលាការក្រុង​ប៉េកាំង​ដើម្បី​តវ៉ា​ចំពោះ​ការឃុំខ្លួន​របស់លោក Wang៕ AFP

​

Source: Kampuchea Thmey Daily