បន្ទាយមានជ័យ ៖ នៅព្រឹក ថ្ងៃទី២៣ ខែមករា ឆ្នាំ២០១៩នេះ សមត្ថកិច្ចចំរុះ ដឹកនាំដោយលោកព្រះរាជអាជ្ញារងខេត្ត និងមន្ត្រីនគរបាលសេដ្ឋកិច្ចចុះត្រួតពិនិត្យនិងឆែកឆេរបង្ក្រាបទីតាំងមួយកន្លែងផលិតផលិតស្ករត្នោតក្លែងក្លាយផ្សំចេញពីវត្ថុ៤យ៉ាង ទី១ស្ករត្នោតពិត ទី២ស្ករស ទី៣សាច់ជូរ កូររំងាស់បញ្ចូលគ្នាជាង២ម៉ោង ទើបក្លាយជាស្ករត្នោត ដឹកយកទៅលក់ចែកចាយតាមតម្រូវការរបស់អាជីវករតាមទីផ្សារ ស្ថិតក្នុងភូមិចាន់គិរី សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
សមត្ថកិច្ចបានធ្វើការឃាត់ខ្លួន ម្ចាស់ផ្ទះនាំយកទៅសាកសួរបន្ត នៅការិយាល័យជំនាញនៃស្នងការដ្ឋាននគរបាលខេត្ត ដោយឡែកស្ត្រីជាប្រពន្ធដោយសារសរសៃខ្ចី មានកូនតូច ត្រូវបានលោកព្រះរាជអាជ្ញារង មិនឲ្យហៅទៅសាកសួរនោះទេ ប៉ុន្តែត្រូវរកកន្លែងឲ្យស្នាក់ជាបណ្តោះអាសន្ន។
លោកចាប សុផាឫទ្ធិ ស្នងការរងខេត្តបន្ទាយមានជ័យទទួលផ្នែកបង្ក្រាបបទល្មើសសេដ្ឋកិច្ចបានប្រាប់អ្នកយកព័ត៌មានឲ្យដឹងថា ម្ចាស់សិប្បកម្មមានឈ្មោះផៃ សំណាង ភេទប្រុស អាយុ២៦ឆ្នាំ ជាប្តី និងប្រពន្ធឈ្មោះសុខ ម៉ី អាយុ២៥ឆ្នាំ រស់នៅភូមិចាន់គិរី សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។ លោកចាប សុផាឫទ្ធិ បានបញ្ជាក់ឲ្យដឹងទៀតថា មុននឹងចុះបង្ក្រាបនោះមានអ្នកនៅជិតខាងបានរាយការណ៍មកសមត្ថកិច្ចថា មានសិប្បកម្មផលិតស្ករត្នោតក្លែងក្លាយ១កន្លែងម្ចាស់ទីតាំងតែងតែចាក់បំពងសម្លេងបទចម្រៀងដើម្បីឮសម្លេងរំខានដល់អ្នកជិតខាងដើម្បីបំភ័ន្តភ្នែកសមត្ថកិច្ចរាល់សកម្មភាពផលិតស្ករត្នោតក្លែងក្លាយរបស់គេ ទើបសមត្ថកិច្ចចុះបង្ក្រាបតែម្តង។
លោកបានបញ្ជាក់ឲ្យដឹងទៀតថា នៅក្នុងផ្ទះផលិតស្ករត្នោតនោះគេឃើញមានខ្ទះសម្រាប់រំងាស់ស្ករ និងឧបករណ៍ផ្សេងៗរួមទាំងគ្រឿងផ្សំមួយចំនួនទៀតទីតាំងផលិតហាក់ពុំមានអនាម័យត្រឹមត្រូវទេ។ ក្នុងនោះម្ចាស់សិប្បកម្មបានសារភាពថា ខ្លួនបានផលិតស្ករត្នោតនេះប្រហែល៨ឆ្នាំមកហើយ ពោលគឺបន្តរបរនេះពីឪពុកម្តាយតមកហើយការផលិតស្ករត្នោតក្លែងក្លាយនេះ ផ្សំចេញពីវត្ថុ៤យ៉ាង ទី១ស្ករត្នោតពិត ទី២ស្ករស ទី៣សាច់ជូរ កូររំងាស់បញ្ចូលគ្នាជាង២ម៉ោង ទើបក្លាយជាស្ករត្នោត ដឹកយកទៅលក់ចែកចាយតាមតម្រូវការរបស់អាជីវករតាមទីផ្សារតែម្តង។
លោកបានបញ្ជាក់ឲ្យដឹងទៀតថា ទីតាំងផលិតស្ករត្នោតនេះក្រោយពីសមត្ថកិច្ចធ្វើការបង្ក្រាបហើយបានធ្វើកំណត់ហេតុបិទទីតាំងនេះតែម្តង ហើយម្ចាស់ត្រូវបានបញ្ជូនមកតុលាការដើម្បីចាត់ការទៅតាមនីតិវិធីច្បាប់ផងដែរ៕
Source: Kampuchea Thmey Daily
0 Comments