ភ្នំពេញ ៖ សកម្មភាពកាត់បណ្ដាញខ្សែកាបអាកាសតាមដងផ្លូវ នៅពេលកន្លងមកក៏ដូចជាសព្វថ្ងៃនេះឃើញថា រដ្ឋបាលរាជធានីភ្នំពេញ បាននឹងកំពុងជំរុញឲ្យអាជ្ញាធរខណ្ឌ ស្ថាប័នពាក់ព័ន្ធនិងក្រុមហ៊ុនឯកជន ចូលរួមសហការ ដើម្បីធ្វើយ៉ាងណាកាត់បណ្ដាញខ្សែកាបលើអាកាសតាមដងផ្លូវ បញ្ជូនទៅក្រោមដីឲ្យអស់។
យោងតាមសេចក្ដីជូនដំណឹងរបស់រដ្ឋបាលរាជធានីភ្នំពេញ លេខ ០២៥/១៦ ដែលបានចេញកាលពីពេលកន្លងមកនេះ បានឲ្យដឹងថា ក្រុមការងារចម្រុះរដ្ឋបាលរាជធានីភ្នំពេញ នឹងរៀបចំសណ្ដាប់ធ្នាប់បណ្ដាញខ្សែកាបអាកាសតាមដងផ្លូវ ដែលត្រូវកាត់ទម្លាក់ជាជំហានៗ។ សកម្មភាពនេះ គឺដើម្បីរៀបចំសណ្ដាប់ធ្នាប់ សុវត្ថិភាពនៃបណ្ដាញខ្សែកាប និងដើម្បីលើកកម្ពស់សោភ័ណភាពរាជធានីផងដេរ។
ដើម្បីអនុវត្តន៍យុទ្ធនាការនេះ ឲ្យបានប្រសើរ រដ្ឋបាលរាជធានីភ្នំពេញបានតម្រូវឲ្យអង្គភាពរដ្ឋ និងបណ្ដាក្រុមហ៊ុនឯកជនដែលមានបណ្ដាញខ្សែកាបលើអាកាសទាំងអស់ ត្រូវចូលរួមសហការ ដើម្បីកាត់ទម្លាក់ខ្សែកាបមកដាក់ចូលបំពង់បណ្ដាញក្រោមដីវិញ។
រដ្ឋបាលរាជធានីភ្នំពេញ ប្រកាសបញ្ជាក់ថា ក្រុមការងារចម្រុះរបស់រដ្ឋបាលរាជធានីភ្នំពេញ នឹងធ្វើការរៀបចំសណ្ដាប់ធ្នាប់ បណ្ដាញខ្សែកាបអាកាស តាមដងមហាវិថីធំៗ ចំនួន៦ ដោយធ្វើការកាត់ទម្លាក់ជាជំហានៗ ដាក់ចូលក្នុងបំពង់ក្រោមដីវិញ ដើម្បីពង្រឹងសុវត្ថិភាពជូនប្រជាពលរដ្ឋ លើកកម្ពស់សោភ័ណភាពរាជធានី ក៏ដូចជាការរក្សាសណ្ដាប់ធ្នាប់ និងរបៀបរៀបរយ សំដៅកាត់បន្ថយគ្រោះថ្នាក់ផ្សេងៗ។
តាមសេចក្ដីប្រកាសបានឲ្យដឹងថា រដ្ឋបាលរាជធានីបានស្នើឲ្យអង្គភាពរដ្ឋ ស្ថាប័ន ក្រុមហ៊ុនឯកជននានា ប្រជាពលរដ្ឋទាំងអស់ ត្រូវរួមសហការ និងផ្ដល់ភាពងាយស្រួលដល់ក្រុមការងារ ដែលមានក្រសួងប្រៃសណីយ៍ និងទូរគមនាគមន៍ អគ្គិសនីកម្ពុជា ក្រុមហ៊ុន CFOCN ក្រុមហ៊ុន PPCTV និងស្ថាប័នពាក់ព័ន្ធមួយចំនួនទៀត ដើម្បីឲ្យដំណើរនេះ ប្រព្រឹត្តទៅបានជោគជ័យ ជៀសវាងមាន បញ្ហាផ្សេងៗ។
សេចក្ដីប្រកាសបានបញ្ជាក់ថា មហាវិថីធំៗដែលត្រូវអនុវត្តការងារខាងលើ រួមមាន មហាវិថីព្រះនរោត្តម, មហាវិថីសហព័ន្ធរុស្ស៊ី, មហាវិថីព្រះមុនីវង្ស, មហាវិថីម៉ៅសេទុង, មហាវិថីកម្ពុជាក្រោម, និងមហាវិថីព្រះសីហនុ៕
Source: Kampuchea Thmey Daily
0 Comments