ភ្នំពេញ ៖ រថយន្តសាំយ៉ុងមួយគ្រឿងដឹកឈើ សុក្រំ បើកបុកស្លាកសញ្ញាចរាចរណ៍ និង ស្លាកលេខផ្លូវ បណ្ដាលឲ្យបាក់ ត្រូវបានសមត្ថកិច្ចឃាត់ បន្ទាប់ពីបំផ្លាញទ្រព្យសម្បត្តិរដ្ឋ កាលពីវេលាម៉ោង០៩និង៣០នាទីព្រឹក ថ្ងៃអង្គារ ១០រោច ខែមិគសិរ ឆ្នាំច សំរឹទ្ធស័ក ពស២៥៦២ ត្រូវនឹងថ្ងៃទី១ ខែមករា ឆ្នាំ២០១៩ ចំណុចមុខកំពង់ផែស្ងួត ភ្នំពេញ តាមបណ្ដោយផ្លូវព្រះស៊ីសុវត្ថិ កែងផ្លូវលេខ៨០ សង្កាត់ស្រះចក ខណ្ឌដូនពេញ រាជធានីភ្នំពេញ។
បន្ទាប់ពីបើកបុកហើយម្ចាស់រថយន្តបង្កបានប្រាប់ឲ្យដឹងថា នៅមុនពេលកើតហេតុ គឺគាត់បានបើករថយន្តមួយម៉ាក សាំយ៉ុង ពណ៌ស ពាក់ស្លាកលេខ បាត់ដំបង ២B-២១៣២ បានដឹកឈើចេញពីខេត្តព្រះវិហា ជាប្រភេទឈើ សក្រំដោយធ្វើដំណើរតាមបណ្ដោយផ្លូវលេខ៨០ ទិសដៅពីលិចទៅកើត គោលបំណងយកទៅដាក់ឲ្យម៉ូយ នៅម្តុំបឹងត្របែក ខណៈពេលដែលមកដល់ចំណុចកើតហេតុ ស្រាប់តែរថយន្តជាន់ហ្វ្រាំងមិនស៊ី ក៏សម្រេចចិត្តបួងចង្កូត បុកមាត់លូ និង បង្គោលស្លាកសញ្ញាចរាចរណ៍ និង ស្លាកសញ្ញាប្រាប់ផ្លូវតែម្តងទៅ ដោយខ្លាចបង្កឲ្យមានគ្រោះថ្នាក់ដល់អ្នកដទៃដែលធ្វើដំណើតាមបណ្ដោយផ្លូវនោះ។
ក្រោយពេលកើតហេតុ សមត្ថកិច្ចខណ្ឌដូនពេញបានចុះមកដល់ចំណុចកើតហេតុ ទំនាក់ទំនងជំនាញចរាចរណ៍ក្រុងចុះមកវាស់វែងយករថយន្តបង្កទៅរក្សាទុកនូវការិយាល័យចរាចរណ៍ផ្លូវគោកនៃស្នងការនគរបាលរាជធានីភ្នំពេញ រង់ចាំដោះស្រាយតាមផ្លូវច្បាប់។
មជ្ឈដ្ឋានទូទៅបានលើកឡើងថា ពួកគាត់ឆ្ងល់ថា ហេតុអ្វីក៏អាជ្ញាធរពាក់ព័ន្ធ ក៏ដូចជារដ្ឋបាលព្រៃឈើ មើលមិនឃើញចំពោះរថយន្តមួយគ្រឿងនេះ ដែលដឹកឈើតាំងពីខេត្តព្រះវិហារ រហូតមកដល់ក្រុងភ្នំពេញបានយ៉ាងដូចនេះ ឬក៏មានលាភសក្ការៈ៕
Source: Kampuchea Thmey Daily
0 Comments