នាវាចម្បាំងកងទ័ពជើងទឹកចិនចំនួន៣គ្រឿង ចូលចតកំពង់ផែអន្តរជាតិ ក្រុងព្រះសីហនុ

ព្រះសីហនុ ៖ នាវាចម្បាំងកងទ័ពជើងទឹកចិនចំនួន៣គ្រឿង បានចូលចតដោយសុវត្ថិភាព នៅកំពង់ផែអន្តរជាតិក្រុងព្រះសីហនុ នៅព្រឹកថ្ងៃទី០៩ ខែមករា ឆ្នាំ២០១៩ ដើម្បីធ្វើទស្សនកិច្ចនៅព្រះរាជាណាចក្រកម្ពុជារយៈពេល៤ថ្ងៃ គឺចាប់ពីថ្ងៃទី០៩ ដល់ថ្ងៃទី១២ ខែមករា ឆ្នាំ២០១៩។

ក្នុងឱកាស នៃការចូលចតនេះដែរ ក៏មានការទទួលស្វាគមន៍ពីនាយ នាយរងកងទ័ពជើងទឹកមូលដ្ឋានសមុទ្ររាម ដឹកនាំដោយលោកឧត្ដមនាវីទោ រស់ វាសនា មេបញ្ជាការរងកងទ័ពជើងទឹកមូលដ្ឋានសមុទ្រនៅក្នុងខេត្តព្រះសីហនុផងដែរ។

មន្ត្រីកងទ័ពជើងទឹកមានឲ្យដឹងថា នាវាទី១.ឈ្មោះ PLANS WUHU (F.F.G-539) បណ្ដោយ១៣៥ម៉ែត្រ ទទឹង១៦ម៉ែត្រ ជម្រៅទឹក៦ម៉ែត្រ ទម្ងន់ផ្ទុក៤.១០០តោន ដឹកនាំដោយលោកវរនាវីឯក YANG KAI ។ នាវាទី២.ឈ្មោះ PLANS HANDAN (F.FG-579) បណ្ដោយ១៣៥ម៉ែត្រ ទទឹង១៦ម៉ែត្រ ជម្រៅទឹក៦ម៉ែត្រ ទម្ងន់ផ្ទុក4,100តោន ដឹកនាំដោយលោកវរនាវីទោ ZHAO SHU QIAN។ និងនាវាទី៣.ឈ្មោះ PLANS DONG PINGKAJE ( AOR 960) បណ្ដោយ១៧៩ម៉ែត្រ ទទឹង២៥ម៉ែត្រ ជម្រៅទឹក 10ម៉ែត្រ ទម្ងន់ផ្ទុក 20,500តោន ដឹកនាំដោយលោកវរនាវីទោ ZHOU XIAOHUI។

នាវាទាំង០៣គ្រឿង ដឹកនាំដោយឯកឧត្ដម ឧត្ដមនាវីទោ XU HAIHUA នាយសេនាធិការរង នៃកងនាវាសមុទ្រខាងជើង ដែលមាននាវឹកសរុបចំនួន៦៩៥នាក់។

លោកឧត្ដមនាវីទោ រស់ វាសនា បានមានប្រសាសន៍ថា វត្តមានរបស់គណៈប្រតិភូកងទ័ពជើងទឹកចិននៅកំពង់ផែអន្តរជាតិក្រុងព្រះសីហនុនៅពេលនេះ គោលបំណងដើម្បីរឹតចំណងសាមគ្គីភាព មិត្តភាព និងកិច្ចសហប្រតិបត្តិការរវាងកងទ័ពជើងទឹកប្រទេសទាំងពីរ ពិសេសចំណងការទូតរវាងប្រទេសទាំងពីរកាន់តែរឹងមាំថែមទៀតផង។

ក្នុងនាមមេបញ្ជាការរងកងទ័ពជើងទឹកមូលដ្ឋានសមុទ្ររាម និងសហការការពារសន្តិសុខ ការស្នាក់នៅលើទឹកដីនៃព្រះរាជាណាចក្រកម្ពុជា ពិសេសស្នាក់នៅខេត្តព្រះសីហនុ ទទួលបានសន្តិសុខ សុវត្ថិភាព ជូនដល់នាវិកក្នុងដំណើរកម្សាន្តនៅលើទឹកដីខេត្តព្រះសីហនុ ក៏ដូចជានៅក្នុងព្រះរាជាណាចក្រកម្ពុជាប្រកបដោយសុវត្ថិភាព។

ឯកឧត្ដម ឧត្ដមនាវីទោ XU HAIHUA នាយសេនាធិការរង នៃកងនាវាសមុទ្រខាងជើង បានថ្លែងអំណរគុណចំពោះកងទ័ពជើងទឹកកម្ពុជា អាជ្ញាធរខេត្ត និងប្រជាជនខេត្តព្រះសីហនុ ដែលបានទទួលស្វាគមន៍ការចូលចតរបស់នាវាកងទ័ពរំដោះប្រជាជនចិន នៅលើទឹកដីខេត្តព្រះសីហនុ ក្នុងគោលបំណងពង្រឹងពង្រីកទំនាក់ទំនងមិត្តភាព សាមគ្គីភាព កិច្ចសហប្រតិបត្តិការរវាងកងទ័ពជើងទឹក នៃប្រទេសទាំងពីរចិន កម្ពុជាឲ្យកាន់តែរឹងមាំ ព្រមទាំងបានស្វែងយល់ពីវប្បធម៌ ប្រពៃណី ទំនៀមទម្លាប់ និងវិស័យយោធានៃប្រទេសទាំងពីរ តាមរយៈដំណើរទស្សនកិច្ចនៅលើទឹកដីនៃព្រះរាជាណាចក្រកម្ពុជា ជាពិសេសការទំនាក់ទំនងទ្វេភាគីរវាងប្រទេសទាំងពីរប្រជាជនទាំងពីរកាន់តែស្និទ្ធស្នាលថែមទៀត៕