ភ្នំពេញ ៖ នៅវេលាម៉ោង៧និង៣០នាទីព្រឹក ថ្ងៃទី០៩ ខែមករា ឆ្នាំ២០១៩ នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានបន្តចុះជួបសំណេះសំណាលជាមួយកម្មករ កម្មការិនី សម្រាប់ឆ្នាំ២០១៩ ដូចអ្វីដែលសម្ដេចធ្លាប់បានសន្យាថា នឹងជួបជាមួយបងប្អូន កម្មករ កម្មការិនី និយោជិត ឲ្យអស់នៅទូទាំងប្រទេស។
ក្នុងឆ្នាំ២០១៨ កន្លងទៅ សម្ដេចបានជួបជាមួយកម្មករ កម្មការិនី ចំនួន៣៦លើក ដោយមានកម្មករ-កម្មការិនី និងនិយោជិតចូលរួមសរុបប្រមាណ៥៩៦.១១៩នាក់ មាននៅទីក្រុងភ្នំពេញ ខេត្តកណ្តាល ខេត្តកំពង់ស្ពឺ ខេត្តតាកែវ ខេត្តកំពង់ឆ្នាំង ខេត្តកំពង់ចាម ខេត្តស្វាយរៀង និង ក្រុងព្រះសីហនុ។
សម្រាប់ថ្ងៃទី៩មករានេះ សម្តេចតេជោនាយករដ្ឋមន្ត្រី បានចាប់ផ្តើមសម្រាប់ឆ្នាំថ្មីដោយជួបកម្មករ-កម្មការិនីសរុបប្រមាណ១៨.២៧៣នាក់ មកពីរោងចក្រ សហគ្រាសចំនួន១២នៅក្នុងខេត្តតាកែវ។ជំនួបនេះធ្វើឡើងនៅក្នុងភូមិចមពល ឃុំពពេល ស្រុកត្រាំកក់ ខេត្តតាកែវ។
យោងតាមការឲ្យដឹងរបស់ក្រសួងការងារ និង បណ្តុះបណ្តាលវិជ្ជាជីវៈ បញ្ជាក់រោងចក្រ សហគ្រាសទាំង១២នេះ មកពីរោងចក្រ សហគ្រាស ក្នុងស្រុកចំនួន៣រួមមាន ៖ ស្រុកសំរោង ស្រុកបាទី និងស្រុកត្រាំកក់ ខេត្តតាកែវ។ រោងចក្រសហគ្រាសទាំងនោះមានរោងចក្រ កាត់ដេរសំលៀកបំពាក់ចំនួន៥, ផលិតស្បែកជើងចំនួន៤, ផលិតកាបូបចំនួន១, ផលិតគ្រឿងបន្លាស់បន្សំសម្រាប់ទូរស័ព្ទចល័តចំនួន១ និងផលិតសក់សិប្បនិម្មិតចំនួន១។ ផលិតផលទាំងនេះសម្រាប់នាំចេញទៅកាន់ទីផ្សារអន្តរជាតិ និងផ្គត់ផ្គង់ទីផ្សារក្នុងប្រទេស។
គួរជម្រាបជូនថា ខេត្តតាកែវមានសហគ្រាស គ្រឹះស្ថាន រោងចក្រ សរុប១៦៤ មានកម្មករនិយោជិត ៤៨.១៦៨នាក់ ទទួលបានប្រាក់ឈ្នួលសរុប១៦៣លានដុល្លារក្នុងមួយឆ្នាំ។ ក្នុងនោះរោងចក្រកាត់ដេរសំលៀកបំពាក់ និងផលិតស្បែកជើងមានចំនួន៥១ មានកម្មករ និយោជិតចំនួន៣៩.៩៤៣នាក់ ដែលមានប្រាក់ឈ្នួលសរុបជិត១៣៥លានដុល្លារក្នុងមួយឆ្នាំ។ នេះជាជោគជ័យនៃគោលនយោបាយទាក់ទាញវិនិយោគ,ការពង្រាយរោងចក្រទៅតាមបណ្តាខេត្ត, គោលនយោបាយជាតិស្តីពីមុខរបរ និងការងារ, គោលនយោបាយអភិវឌ្ឍន៍វិស័យឧស្សាហកម្មកម្ពុជា, គោលនយោបាយស្តីពីការអប់រំបណ្ដុះបណ្ដាលបច្ចេកទេស និងវិជ្ជាជីវៈ និងក្របខណ្ឌគោលនយោបាយជាតិគាំពារសង្គមរបស់រាជរដ្ឋាភិបាលកម្ពុជា ដឹកនាំដោយសម្ដេចតេជោ ហ៊ុន សែន។
វិស័យឧស្សាហកម្ម ជាវិស័យដ៏ចម្បងមួយសម្រាប់ជំរុញកំណើនសេដ្ឋកិច្ចរបស់កម្ពុជា ជាពិសេសបានរួមចំណែកផ្តល់ការងារជូនប្រជាពលរដ្ឋកម្ពុជាបានយ៉ាងច្រើន និងធ្វើឲ្យជីវភាពរបស់ពួកគេបានល្អប្រសើរផងដែរ។
សម្តេចតេជោ ហ៊ុន សែន បានសម្រេចបើកយុទ្ធនាការចុះជួបជាមួយកម្មករ-កម្មការិនី នៅតាមបណ្តារោងចក្រ តាំងពីថ្ងៃទី២០ ខែសីហា ឆ្នាំ២០១៧។ គិតមកដល់ត្រឹមថ្ងៃទី០៩ ខែមករា ឆ្នាំ២០១៩នេះ សម្តេចតេជោ ហ៊ុន សែន បានជួបជាមួយកម្មករ-កម្មការិនី ប្រធានរដ្ឋបាល ប្រធានផ្នែក ប្រធានក្រុម សរុប៦២លើក មានកម្មករ-កម្មការិនីចូលរួមសរុប៨៩៤.៧៤៧នាក់។
សម្រាប់រយៈពេលពេញមួយឆ្នាំ២០១៨ កន្លងទៅ សម្តេចតេជោ ហ៊ុន សែន បានអញ្ជើញជួបសំណេះសំណាលជាមួយកម្មករ-កម្មការិនីសរុបចំនួន៣៦លើក មានកម្មករ-កម្មការិនីចូលរួមសរុបប្រមាណ ៥៩៦.១១៩នាក់។
តាមរយៈដំណើរចុះជួបជាបន្តបន្ទាប់នោះ មានបញ្ហាប្រឈមជាច្រើនដែលពាក់ព័ន្ធការចំណាយរបស់កម្មករត្រូវបានដោះស្រាយ ហើយអត្ថប្រយោជន៍ជាច្រើនពាក់ព័ន្ធប្រាក់ចំណូល បញ្ហាសុខភាព និង សុវត្ថិភាពការងារត្រូវបានយកចិត្តទុកដាក់។
សម្តេចតេជោ ហ៊ុន សែន ក៏បានប្រកាសដាក់ចេញនូវអនុសាសន៍១០ចំណុច ដើម្បីឲ្យក្រសួងពាក់ព័ន្ធក៏ដូចជារោងចក្រ សហគ្រាស អនុវត្តឲ្យមានប្រសិទ្ធភាពសម្រាប់កម្មករ និយោជិត។
អនុសាសន៍ទាំង១០ របស់សម្ដេចតេជោ រួមមាន ៖
ទី១-ត្រូវអនុវត្តបើកប្រាក់ខែអប្បបរមាដល់កម្មករកាត់ដេរ ចាប់ពីខែមករា ឆ្នាំ២០១៩ គឺ១៨២ដុល្លារ បើក្រុមហ៊ុនផ្តល់ជូនកម្មករលើសនេះ គឺរឹតតែល្អប្រសើរ។
ទី២-ត្រូវអនុវត្តការចុះពិនិត្យនៅតាមមន្ទីរពេទ្យរដ្ឋចំពោះការពិនិត្យសុខភាព និង ការព្យាបាលកម្មករ-កម្មការិនីរោងចក្ររួមទាំងកីឡាករ កីឡាការិនី ក្រុមប្រឹក្សាភូមិឃុំ ក៏ត្រូវបានអនុវត្តដូចគ្នា ជាពិសេសរដ្ឋមន្ត្រីក្រសួងសុខាភិបាល និងក្រសួងការងារ ត្រូវធ្វើឲ្យបានម៉ត់ចត់។
ទី៣-ត្រូវអនុវត្តចំពោះស្ត្រីកម្មករកាត់ដេរដែលមានផ្ទៃពោះសម្រាលកូន គឺនឹងទទួលបានពេលវេលាឈប់សម្រាកពីការងាររយៈពេល៣ខែ ហើយទទួលបានប្រាក់ខែ១២០% (៥០% ដោយក្រុមហ៊ុន និង ៧០%ដោយបេឡាជាតិ) ក្រសួងពាក់ព័ន្ធ ត្រូវតាមដានការងារឲ្យបានដិតដល់ចំពោះការអនុវត្តសកម្មភាពនេះ។
ទី៤-ត្រូវអនុវត្តចំពោះកម្មការិនីសម្រាលបានកូនម្នាក់ គឺទទួលថវិកា៤០ម៉ឺនរៀល និងពិនិត្យផ្ទៃពោះដោយឥតគិតថ្លៃ។ បើសម្រាលបានកូនភ្លោះ២នាក់ គឺទទួលបានថវិកា៨០ម៉ឺនរៀល។ បើសម្រាលបានកូនភ្លោះ៣នាក់ គឺទទួលបានថវិកា១លាន២សែនរៀល ហើយបូកប្រាក់ឧបត្ថម្ភចំនួន៥លានរៀលទៀតពីសម្ដេចតេជោ។
ទី៥-និយោជកបានអនុវត្តកាតព្វកិច្ចបង់ភាគទានរបបសន្តិសុខសង្គមផ្នែកថែទាំសុខភាព១០០ភាគរយ ជំនួសកម្មករ និយោជិត។
ទី៦-រដ្ឋបាលថ្នាក់ក្រោមជាតិ បានត្រួតពិនិត្យជាប្រចាំនូវថ្លៃឈ្នួលផ្ទះ ថ្លៃទឹក និងថ្លៃអគ្គិសនីនៅតាមផ្ទះជួល និងកំពុងបន្តជំរុញការតភ្ជាប់បណ្តាញអគ្គិសនី និងទឹកស្អាតនៅតាមតំបន់ផ្ទះជួលរបស់កម្មករនិយោជិត។
ទី៧-រៀបចំច្បាប់ ស្តីពីរបបសន្តិសុខសង្គមដើម្បីអនុវត្តផ្នែកសោធននិវត្តន៍សម្រាប់កម្មករ និយោជិត និងផ្នែករបបហានិភ័យការងារសម្រាប់មន្ត្រីសាធារណៈនៅឆ្នាំ២០១៩។
ទី៨-អនុវត្តច្បាប់ ស្តីពីការងារ ដើម្បីកំណត់ការបើកប្រាក់ដំណាច់អតីតភាពការងារ បើកប្រាក់បំណាច់អតីតភាពការងារជូនកម្មករនិយោជិត៦ខែម្តង។
ទី៩-បន្តសហការជាមួយក្រសួងពាក់ព័ន្ធបន្តដោះស្រាយបញ្ហាសុវត្ថិភាពក្នុងការដឹកជញ្ជូន និងការធ្វើដំណើររបស់កម្មករនិយោជិតការរៀបចំកែសម្រួលមធ្យោបាយដឹកជញ្ជូន និងពង្រឹងការអនុវត្តច្បាប់ចរាចរណ៍ផ្លូវគោក។
ទី១០-បន្តពង្រឹងកិច្ចសហការជាមួយប្រទេសជាដៃគូរួមមាន ៖ ថៃ ម៉ាឡេស៊ី កូរ៉េ ជប៉ុន ហុងកុង សិង្ហបុរី និងប្រទេសមួយចំនួនទៀត ដើម្បីផ្តល់ឱកាសការងារជូនពលករ ការពារសិទ្ធិ និងផលប្រយោជន៍ពលករ ដែលកំពុងបម្រើការងារនៅប្រទេសទាំងនោះ បង្កលក្ខណៈសម្បត្តិឲ្យពួកគេទទួលបានរបបគាំពារសង្គមទាំងពេលបច្ចុប្បន្ន និងពេលត្រឡប់មកវិញ៕
Source: Kampuchea Thmey Daily
0 Comments