ប្រទេសអូស្ត្រាលីបានបង្ហើបនៅថ្ងៃពុធថា ស្ត្រីសញ្ជាតិអារ៉ាប៊ីសាអ៊ូឌីតអាយុ១៨ឆ្នាំម្នាក់ដែលកំពុងស្ថិតនៅក្នុងទីក្រុងបាងកកនឹងត្រូវបានផ្តល់សិទ្ធិជ្រកកោនមនុស្សធម៌បើទោះបីជាមានកិច្ចខិតខំប្រឹងប្រែងរបស់ទីក្រុងរីយ៉ាដនិងក្រុមគ្រួសាររបស់នាងបង្ខំឲ្យនាងវិលត្រលប់ទៅស្រុកកំណើតវិញក៏ដោយ។
នាង Rahaf Mohammed al-Qunun បានរៀបរាប់អំពីការប៉ុនប៉ងរបស់នាងដើម្បីគេចចេញពីគ្រួសារដែលមានការរំលោភបំពានហើយករណីរបស់នាងបានបង្កឲ្យមានការយកចិត្តទុកដាក់ជាសកលលើកំណត់ត្រាសិទ្ធិមនុស្សរបស់ប្រទេសអារ៉ាប៊ីសាអ៊ូឌីត។
ខណៈដែលសម្ពាធជាសាធារណៈកាន់តែខ្លាំងឡើងនោះ រដ្ឋមន្ត្រីអូស្ត្រាលីមួយរូបបានលើកឡើងថា នឹងពិចារណាលើករណីរបស់នាងប្រសិនបើនិងនៅពេលដែលអ្នកជំនាញអង្គការសហប្រជាជាតិយល់ឃើញអំពីភាពភ័យខ្លាចរបស់នាងលើការធ្វើបាបដោយមិនយុត្តិធម៌។
រដ្ឋមន្ត្រីសុខាភិបាលលោក Greg Hunt បានប្រាប់ទូរទស្សន៍ ABC ថា “ប្រសិនបើនាងត្រូវបានរកឃើញថាជាជនភៀសខ្លួននោះ យើងនឹងផ្តល់ការពិចារណាយ៉ាងប្រុងប្រយ័ត្នបំផុតចំពោះទិដ្ឋាការមនុស្សធម៌”។
លោក Hunt បាននិយាយថា លោកបាននិយាយទៅកាន់រដ្ឋមន្ត្រីក្រសួងអន្តោប្រវេសន៍លោក David Coleman អំពីករណីរបស់នាង Qunun កាលពីយប់ថ្ងៃអង្គារ។
ស្ត្រីវ័យក្មេងរូបនេះបាននិយាយថា នាងបានភៀសខ្លួនចេញពីប្រទេសអារ៉ាប៊ីសាអ៊ូឌីតទៅកាន់ប្រទេសអូស្ត្រាលីប៉ុន្តែត្រូវបានបញ្ឈប់តាមផ្លូវដោយមន្ត្រីថៃនិងអារ៉ាប៊ីសាអ៊ូឌីត។
ស្ថានភាពរបស់នាងត្រូវបានគេយកចិត្តទុកដាក់ជាសាធារណៈនៅពេលនាងបានបង្ខាំងខ្លួនឯងនៅក្នុងបន្ទប់សណ្ឋាគាររបស់ព្រលានយន្តក្រុងហោះបាងកកដើម្បីចៀសវាងការនិរទេស។
ពីដំបូងអាជ្ញាធរថៃបាននិយាយថា នាង Qunun នឹងត្រូវបញ្ជូនត្រលប់ទៅវិញប៉ុន្តែពួកគេបានប្តូរគំនិតយ៉ាងឆាប់រហ័សនៅពេលដែលរឿងនេះត្រូវបានចែករំលែកតាមប្រព័ន្ធផ្សព្វផ្សាយសង្គម។
គួរបញ្ជាក់ថា ប្រទេសអារ៉ាប៊ីសាអ៊ូឌីតមានការដាក់កម្រិតតឹងតែងបំផុតលើស្ត្រីបើប្រៀបធៀបទៅនឹងប្រទេសដទៃទៀតនៅលើពិភពលោក។ ការដាក់កម្រិតគឺរួមមានទាំងប្រព័ន្ធអាណាព្យាបាលផងដែរដែលអនុញ្ញាតឲ្យសមាជិកគ្រួសារជាបុរសធ្វើការសម្រេចចិត្តជំនួសសាច់ញាតិរបស់ស្ត្រី៕ AFP
Source: Kampuchea Thmey Daily
0 Comments