ភ្នំពេញ ៖ ក្នុងកិច្ចប្រជុំ នាព្រឹកថ្ងៃទី២៩ ខែមករា តាមរយៈ អាជ្ញាធរ មូលដ្ឋានភូមិ សង្កាត់ អាជ្ញាធរខណ្ឌព្រែកព្នៅ បានផ្សព្វផ្សាយសេចក្ដីជូនដំណឹងសម្រាប់ ប្រជាពលរដ្ឋដែលរស់នៅលើផ្ទៃបឹងកប់ស្រូវឬបឹងតាមោគ និងប្រជាពលរដ្ឋ១ចំនួនទៀតដែលមានចេតនា រំលោភទន្ទ្រាន កាន់កាប់ លើផ្ទៃបឹងកប់ស្រូវ ថែមទៀតនោះ ត្រូវរុះរើបង្គោលដែលបានដាំ និងរោងឬផ្ទះដែលបានសាងសង់លើផ្ទៃបឹងកប់ស្រូវ នោះចេញវិញជាបន្ទាន់។ អាជ្ញាធរ ខណ្ឌមិនអនុញ្ញាត ឲ្យដាក់ស៊ងចិញ្ចឹមត្រី សាងសង់រោង លំនៅដ្ឋាន ចាក់ដីចូលចំណីរបឹង និងធ្វើសកម្ម ភាពគ្រប់រូបភាព ដែលអាចធ្វើឲ្យប៉ះពាល់ដល់បឹងកប់ស្រូវ ដែលជាបឹងរបស់រដ្ឋជាដាច់ខាត។
ដូចនេះសូមបងប្អូនប្រជាពលរដ្ឋ ដែលពាក់ព័ន្ធទៅនឹងសកម្មភាពខាងលើ ត្រូវអនុវត្តដោយដកបង្គោល និងរុះរើរោងនិងផ្ទះ ឲ្យអស់ពីផ្ទៃបឹង កប់ស្រូវ ជាកំហិតដោយទុករយៈពេល៧ថ្ងៃ គិតចាប់ពីថ្ងៃជូនដំណឹងនេះតទៅ។ ក្នុង ករណី ប្រជាពលរដ្ឋណាមិនអនុវត្តតាមសេចក្ដីជូនដំណឹងនេះទេ សាលាខណ្ឌនឹងចាត់វិធានការរដ្ឋបាល ធ្វើការរុះរើ ដោយមិនទទួលខុសត្រូវចំពោះការខូចខាតឬបាត់បង់សម្ភារៈរបស់បងប្អូន ឡើយ។
នេះជាវិធានការដែលធ្វើឡើង តាមការកំណត់នៃ អនុក្រឹត្យរបស់រាជរដ្ឋាភិបាលកម្ពុជា ក្នុងគោលដៅថែរក្សាមុខងារបឹងកប់ស្រូវ សម្រាប់ ជាអាងស្ដុកទឹក និងជាប្រព័ន្ធរំដោះទឹក១ភាគធំ ពីក្នុងរាជធានីភ្នំពេញ។
លោក សុខ សម្បត្តិ ប្រធានគណៈបញ្ជាការឯកភាពខណ្ឌព្រែកព្នៅ បានធ្វើការកត់សម្គាល់ថា បន្ទាប់ពីរដ្ឋបាលរាជធានីភ្នំពេញ និងរដ្ឋបាលខណ្ឌព្រែកព្នៅ បានរៀបចំផ្ទៃបឹងសំរោង សកម្មភាពរំលោភ ទន្ទ្រាន កាន់កាប់បឹងកប់ស្រូវ ពិសេស មាត់បឹង តាមបណ្ដោយផ្លូវ១៥១ បានលេចចេញនូវសកម្មភាពទន្ទ្រានកាន់តែច្រើនឡើង។ ទន្ទឹមគ្នានេះ លោកបានស្ដីបន្ទោសទៅ មេភូមិចៅសង្កាត់ ដែលជាប់ពាក់ព័ន្ធពីការធ្វេសប្រហែសមិនយកចិត្តទុក ដាក់តាមដានទប់ស្កាត់ និងរាយការណ៍ មកខណ្ឌ ឲ្យបានទាន់ពេលវេលា។ លោក សុខ សម្បត្តិបានបញ្ជាក់ថា ការរំលោភបំពាននេះ គឺខណ្ឌទុកពេលឲ្យ១សប្ដាហ៍ បើមិនព្រមរុះរើ កម្លាំងចម្រុះរបស់ខណ្ឌនឹងចុះ រុះរើដោយគ្មានលក្ខខណ្ឌ ឡើយ។
លោក បានបញ្ជាទៅ អភិបាលរង ការិយាល័យជំនាញ និង សង្កាត់ពាក់ព័ន្ធ ត្រូវរួមគ្នាធ្វើកិច្ចការនេះ ត្រូវផ្សព្វផ្សាយសេចក្ដីជូនដំណឹងនេះ ដល់ ប្រជាពលរដ្ឋឲ្យបានទូលំទូលាយ។ ដោយឡែកសង្កាត់ដែលពាក់ព័ន្ធ សង្កាត់ណា ធ្វើមានស្នាដៃ នឹងទទួលបានការលើកសរសើរ ហើយសង្កាត់ ដែលមិនធ្វើលោកនឹងរាយការណ៍ទៅលើហើយ៕
Source: Kampuchea Thmey Daily
0 Comments