បន្ទាយមានជ័យ ៖ ផ្ទះចំនួន៥ល្វែង នៅខាងកើតផ្សារត្រី ក្នុងភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ត្រូវបានក្លាយជាចំណីព្រះអគ្គី កាលពីវេលាម៉ោង១២និង៤០នាទីរសៀល ថ្ងៃទី២៩ ខែមករា ឆ្នាំ២០១៩ សង្ស័យបណ្តាលមកពីសែនដកជើងធូប។
មូលហេតុដំបូង ដោយសារតែ ម្ចាស់ផ្ទះសែនដកជើងធូប ឆេះក្រណាត់ បណ្ដាលឲ្យកើតជាអគ្គិភ័យ ឆាបឆេះរាលដាលដល់ផ្ទះប្រជាពលរដ្ឋលក់ដូរ នៅជិតខាងក្បែរនោះ តៗមានចំនួន៥ល្វែង ក្នុងនោះ២ល្វែងខូចខាតទាំងស្រុង, ២ល្វែងទៀតអស់ប្រមាណ៨០ភាគរយ និង១ល្វែងទៀត ប្រហែល៥០ភាគរយ។
ផ្ទះដើមហេតុមានម្ចាស់១-ឈ្មោះ សៀក យ៉េន ភេទប្រុសអាយុ៧០ឆ្នាំ និងប្រពន្ធឈ្មោះ គឹម ហ៊ាង អាយុប្រហែល៥០ឆ្នាំ រស់នៅផ្ទះកើតហេតុខាងលើ តែក្រោយពេលកើតហេតុបានគេចខ្លួនបាត់។ ២- ស ប៊ុនអៀង ភេទ ប្រុស៣- ងី សាក់ ភេទ ប្រុស ៤- សាន យ៉ូន ភេទ ប្រុស ៥- ថាប់ សំអឿន ភេទ ប្រុស។ ផ្ទះទាំង៥ល្វែងនេះជាផ្ទះលក់អីវ៉ាន់ចាប់ហួយ ក្រណាត់។
លោកវរសេនីយ៍ឯក ធិន ស៊ីនដេត អធិការក្រុងប៉ោយប៉ែតប្រាប់ថា ការចុះប្រតិបត្តិការពន្លត់អគ្គិភ័យនេះ មានរថយន្តពន្លត់អគ្គិភ័យមានចំនួនជាង១០គ្រឿង មានរថយន្តស្នងការដ្ឋាននគរបាលខេត្តមានចំនួន៥គ្រឿង រថយន្តកាស៊ីណូត្រូពីកាណា២គ្រឿង រថយន្តកាស៊ីណូប៉ោយប៉ែតរីសត១គ្រឿង រួមជាមួយនឹងរថយន្តប្រជាពលរដ្ឋរកស៊ីដឹកទឹកលក់ ប្រមាណជា៣ទៅ៤គ្រឿងទៀតផងដែរ។
លោកអធិការបញ្ជាក់ថា ករណីនេះ បណ្តាលឲ្យមានពលរដ្ឋ និងសមត្ថកិច្ចរបួសចំនួន៤នាក់ តែរបួសបន្តិចបន្តួចប៉ុណ្ណោះ គឺមុតជើង មុតដៃ ក្នុងពេលដែលធ្វើសកម្មភាពពន្លត់អគ្គិភ័យ។
គួរបញ្ជាក់ថា ករណីអគ្គិភ័យឆាបឆេះអស់រយៈពេលជិត៣ម៉ោង ទើបសមត្ថកិច្ចអាចគ្រប់គ្រងពន្លត់បានទាំងស្រុង តែចំពោះទំហំ នៃការខូចខាតនេះ សមត្ថកិច្ច និងអាជ្ញាធរ នៅមិនទាន់អាចកំណត់បាននៅឡើយទេ៕
Source: Kampuchea Thmey Daily
0 Comments