អ្នកប្រដាល់កម្ពុជាពុទ្ធឆាយរិទ្ធី ក្លិបពុទ្ធសេរីវង្សកីឡា ត្រូវគេផ្គូអោយជួបសាកកណ្តាប់ដៃជាមួយថៃ Pit Salin ក្នុងកម្មវិធីប្រដាល់Knock Out Serie By K.cement នៅសង្វៀនTV5 ព្រែកកំពឹស នាយប់ថ្ងៃសៅរ៍ទី០២ ខែកុម្ភៈ ឆ្នាំ២០១៩នេះ។
ពុទ្ធឆាយរិទ្ធី ជួប Pit Salin ក្នុងទម្ងន់៦៧គីឡូក្រាម ។ សម្រាប់ជំនួបរវាងពុទ្ធ ឆាយរិទ្ធី និង Pit Salin នេះ ពួកគេទាំងពីរនាក់នេះ មិនធ្លាប់ជួបគ្នាទេកន្លងមក ព្រោះអ្នកប្រដាល់ថៃរូបនេះ ទើបតែមកស្រុកខ្មែរជាលើកទី២ប៉ុណ្ណោះ។
Pit Salin កាលពីមកលើកទី១ ថ្ងៃទី០៥មករា២០១៩ គេជួបជាមួយមឿន សុខហ៊ុចអ្នកប្រដាល់ក្លិបពុទ្ធសេរីវង្សកីឡា ដែលជាមិត្តរួមក្លិបជាមួយពុទ្ធ ឆាយរិទ្ធី ហើយវាយចាញ់សុខហ៊ុច ដោយពិន្ទុដាច់តែម្តង ។
អ្នកប្រដាល់ថៃរូបនេះ បើធៀបជាមួយពុទ្ធ ឆាយរិទ្ធីវិញនោះ Pit Salinក៏ប្រហែលជាពុំអាចឈ្នះពុទ្ធ ឆាយរិទ្ធី បានដែរ ដោយសារPit Salin វាយចាញ់មឿន សុខហ៊ុចដាច់ទៅហើយនោះ ។ ពុទ្ធ ឆាយរិទ្ធ ឥឡូវនេះគេមានការវិវត្តន៍ខាងក្បាច់គុនច្រើន គួបផ្សំនឹងការខំប្រឹងហ្វឹកហាត់ទៀត ឃើញថាគេខ្លាំងនិងល្អជាងមុន។
Pit Salin គេមានប្រវត្តិប្រកួតចំនួន៦៥លើក ឈ្នះ៥២លើក ចាញ់១២លើក និងស្មើ ០១លើក ខណះដែលពុទ្ធ ឆាយរិទ្ធី គេមានកំនត់ត្រាប្រកួត១១៦លើក ឈ្នះ៨៩លើក ចាញ់២៥លើក និងស្មើ០២លើក ។
ទោះជាយ៉ាងណាក្តី សម្រាប់ការជួបគ្នានេះ ពុំអាចសន្និដ្ឋានមុនថា អ្នកណាឈ្នះ អ្នកណាចាញ់នោះឡើយ ហើយពីរនាក់នេះ ក៏មិនអាចអ្នកណាមើលស្រាលអ្នកណាបានដែរ ។
គួរបញ្ជាក់ថា ពុទ្ធ ឆាយរិទ្ធី ប្រកួតជាមួយថៃលើកចុងក្រោយនេះ គឺវាយចាញ់Phat Phisanouk ដោយពិន្ទុ ។
ចំពោះការប្រកួតរវាងខ្មែរនិងខ្មែរវិញ សុខ សុវណ្ណ អ្នកប្រដាល់ក្លិបកងពលធំអន្តរាគមន៍លេខ២ ត្រូវគេផ្គូផ្គងអោយជួបប្រកួតជាមួយ អេលីត សាន់ (លិញ ភារម្យ) អ្នកប្រដាល់ក្លិបឆ្មាសសែនសុខគុនខ្មែរ ។
ពួកគេទាំងពីរ ប្រកួតគ្នាក្នុងប្រភេទទម្ងន់៥៧គីឡូក្រាម ។ ពីរនាក់នេះ មិនធ្លាប់ជួបគ្នាទេកន្លងមក ។ ដូច្នេះ ជំនួបលើកនេះ គឺជាការជួបគ្នាលើកដំបូង ។
អេលីត សាន់ ជាអ្នកប្រដាល់មិនមានឈ្មោះបោះសំឡេងនោះទេ តែគេជាអ្នកប្រដាល់ចាស់វស្សាដែរ ។ ជាទម្លាប់របស់អេលីត សាន់ គេឡើងប្រកួតច្រើនវ៉ៃមិនយោគយល់អ្វីនោះទេ ។ គេឡើងប្រកួតចុងក្រោយនេះ (២៧មករា២០១៩)កន្លងទៅនេះ បានផ្តួលអ្នកប្រដាល់ថៃវីហ្គោអោយសន្លប់មុនទឹក៥ ។
ចំពោះសុខ សុវណ្ណ វិញ គេជាអ្នកប្រដាល់ជើងចាស់ ដោយត្រូវបានអ្នកស្នេហាកីឡាប្រដាល់ចាប់អារម្មណ៍ ដោយសារតែការប្រកួតរបស់គេល្អ ហើយលទ្ធផលឈ្នះច្រើនជាងចាញ់ ។
ទោះជាគេមានវ័យច្រើនជាង អេលីត សាន់ បន្តិចក្តី សម្រាប់ស្នៀតប្រដាល់របស់សុខ សុវណ្ណ មិនជាចាញ់អេលីត សាន់ នោះទេ។ សំរាប់ការជួបគ្នានេះ បើសិនជាសុខ សុវណ្ណ ពុំមានបញ្ហាអ្វីកើតឡើងទេនោះ អេលីត សាន់ គឺពិបាកហើយ ព្រោះសុខសុវណ្ណ មានទិចនិចល្អជាង ។
សុខសុវណ្ណ យ៉ាប់តែបញ្ហាកម្លាំកាយសម្បទាមួយមុខប៉ុណ្ណោះ ឯស្នៀតប្រដាល់របស់គេមានផ្លែល្អ។តែយ៉ាងណា អេលីត សាន់ ក៏មានផ្លែល្អដែរ។ដូច្នេះក្នុងការជួបប្រកួតគ្នាលើកនេះ គឺមិនអាចទាយមុនថា សុខ សុវណ្ណ ឈ្នះ ឬអេលីត សាន់ ឈ្នះនោះឡើយ ? ។
សុវណ្ណ ប្រកួតលើកចុងក្រោយនេះ(៣០ធ្នូ២០១៨) គេបានផ្តួលអ្នកប្រដាល់ថៃKong Sayam អោយបោះបង់ការប្រកួតក្នុងទឹកទី១ ។
ម៉ន ភីរម្យ អ្នកប្រដាល់ក្លិបការិយាល័យទី៥ កងទ័ពជើងគោក នឹងត្រូវជួបប្រកួតជាមួយ សល់ ស្រស់ អ្នកប្រដាល់ក្លិបសាលវ័ន្តកីឡា ដោយប្រកួតគ្នាក្នុងទម្ងន់៥១គីឡូក្រាម ។
សល់ ស្រស់ ជាអ្នកប្រដាល់ស្រករក្រោយ ហើយម៉ន ភីរម្យ ជាអ្នកប្រដាល់ចាស់វស្សា ។ពួកគេទាំងពីរនេះ ពុំធ្លាប់ដែលប៉ះគ្នាម្តងណានៅឡើយទេ ពីមុនមក ។តែយ៉ាងណា
សម្រាប់ការជួបគ្នានេះ មិនដឹងថាម៉ន ភីរម្យ គេអាចយកឈ្នះជើងថ្មីស្រករក្រោយសល់ ស្រស់ បានឬអត់នោះទេ? ។
គៀន ធារ៉ា អ្នកប្រដាល់ក្លិបរស្មីកុមារកំព្រា ត្រូវជួបប្រកួតជាមួយឆោម ប៊ុនឡុង អ្នកប្រដាល់ក្លិបគុហារព្រហ្មជ័យ ក្នុងប្រភេទទម្ងន់៦៥គីឡូក្រាម ហើយប្រាក់ ភារម្យ ក្លិបយុវជនកីឡា ជួបប្រកួតជាមួយ អេ ពិសី ក្លិបអេភូថងកីឡា ក្នុងទម្ងន់៥៤គីឡូក្រាម៕
Source: Kampuchea Thmey Daily
0 Comments