ផ្ទះកាកបាទក្រហមកម្ពុជាចំនួន១ខ្នង ត្រូវបានប្រគល់ជូនទុរគតជន ចាស់ជរាទីទាល់ក្រ នៅក្រុងប៉ៃលិន

ប៉ៃលិន ៖ កាលពីរសៀលថ្ងៃទី២៩ ខែមករា ឆ្នាំ២០១៩ លោកជំទាវ បាន ស្រីមុំ ប្រធានសាខាកាកបាទក្រហមកម្ពុជាខេត្តប៉ៃលិន អមដំណើរដោយ សមាជិកសមាជិកាគណៈកម្មាធិការសាខាកាកបាទក្រហមកម្ពុជាខេត្ត អនុគណកម្មការសាខាកាកបាទក្រហមក្រុងប៉ៃលិន និងក្រុមយុវជនកាកបាទក្រហម បានអញ្ជើញប្រគល់ផ្ទះកាកបាទក្រហមកម្ពុជា ចំនួន ១ខ្នង ដែលជាអំណោយ របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនដល់លោកយាយចាស់ជរាទីទាល់ក្រម្នាក់ ដែលមានកូនស្រីអាយុ១៣ឆ្នាំម្នាក់ក្នុងបន្ទុក រស់នៅភូមិអូរតាពុកលើ សង្កាត់ប៉ៃលិន ក្រុងប៉ៃលិន ខេត្តប៉ៃលិន។

ថ្លែងក្នុងឱកាសប្រគល់ផ្ទះកាកបាទក្រហមកម្ពុជា នាពេលនោះលោកជំទាវ បាន ស្រីមុំ ប្រធានគណៈកម្មាធិការសាខាកាកបាទក្រហមកម្ពុជាខេត្តប៉ៃលិន មានប្រសាសន៍ពាំនាំនូវការផ្ដាំផ្ញើសួរសុខទុក្ខពី សំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលសម្តេចតែងតែព្រួយបារម្ភ និងយកចិត្តទុកដាក់គិតគូរ ចំពោះបងប្អូនប្រជាពលរដ្ឋគ្រប់ពេលវេលា គ្រប់ទីកន្លែង។

លោកជំទាវប្រធានសាខា មានប្រសាសន៍បន្តថា ៖ កាកបាទក្រហមកម្ពុជា ក្រោមការដឹកនាំ របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បានគិតគូរខ្ពស់ពីសុខភាព ជីវភាព និងការរស់នៅ របស់បងប្អូនប្រជាពលរដ្ឋគ្រប់ស្រទាប់វណ្ណៈ ដោយមិនប្រកាន់ពូជសាសន៍ ពណ៌សម្បុរ សាសនា ឬនិន្នាការនយោបាយអ្វីឡើយ ឱ្យតែជួបប្រទះនូវឧប្បត្តិហេតុផ្សេងៗ ជាពិសេសជនរងគ្រោះគ្រប់ប្រភេទ រួមមាន៖ ភ្លើងឆេះផ្ទះ ខ្យល់កន្ត្រាក់ អ្នកផ្ទុកមេរោគអេដស៍ ចាស់ជរាគ្មានទីពឹង ស្ត្រីមេម៉ាយមានកូនច្រើន និងជនពិការជាដើម។ ចំពោះ ការប្រគល់ផ្ទះ ១ខ្នង នាពេលនេះ គឺជាការបង្ហាញនូវការយកចិត្ត ទុកដាក់ចំពោះប្រជាពលរដ្ឋគ្រប់រូប ពីសំណាក់ថ្នាក់ដឹកនាំ កាកបាទក្រហមកម្ពុជាគ្រប់ជាន់ថ្នាក់ ដូចដែលបានលើកឡើងថា «កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា» និង «ទីណាមានទុក្ខលំបាក ទីនោះមានកាកបាទក្រហមកម្ពុជា»។ ជាមួយគ្នានេះដែរលោកជំទាវប្រធានសាខា ក៏ផ្តាំផ្ញើឲ្យបងប្អូនទាំងអស់ ឲ្យមានការប្រុងប្រយ័ត្នខ្ពស់ ចំពោះការថែរក្សាសុខភាព ហើយកត្តាដែលសំខាន់នោះ គឺការរស់នៅត្រូវប្រកាន់យកនៅចំណុចបីល្អគឺ រស់នៅស្អាត ផឹកស្អាត ហូបស្អាត និងឆ្លើយថាទេចំពោះគ្រឿងញៀន ជាពិសេសគោរពច្បាប់ចរាចរណ៍ ឲ្យបានខ្ជាប់ខ្ជួនទាំងអស់គ្នាផងដែរ។

នាឱកាសទទួលបានអំណោយផ្ទះថ្មី នេះដែរលោកយាយ ហុល ម៉ាលី អាយុ៦៧ឆ្នាំ ក៏បានថ្លែងអំណរគុណយ៉ាងជ្រាលជ្រៅ ចំពោះសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និងក្រុមការងារសាខាកាកបាទក្រហមកម្ពុជាខេត្តប៉ៃលិនទាំងអស់ ដែលបានសាងសង់ផ្ទះថ្មី ជូនរូបគាត់ និងកូនស្រី បានរស់នៅសមរម្យនឹងគេ ព្រោះគាត់ចាស់ជរាក្រីក្រ គ្មានលទ្ធភាពធ្វើផ្ទះបាននោះឡើយ។

សូមបញ្ជាក់ថា ៖ ផ្ទះដែលជាអំណោយរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនលោកយាយទីទាល់ក្រ គឺមានបណ្តោយ ៧ម៉ែត្រ និងទទឹង ៥ម៉ែត្រ សង់អំពីថ្ម ប្រក់ស័ង្កសី ដោយចំណាយថវិកាអស់ ចំនួន ៤៥០០ដុល្លារសហរដ្ឋអាមេរិក ហើយក្នុងឱកាសនោះផងដែរ លោកជំទាវ បាន ស្រីមុំ ប្រធានសាខាកាកបាទក្រហមកម្ពុជាខេត្តប៉ៃលិន ក៏បានឧបត្ថម្ភថវិកាចំនួន ៥០ម៉ឺនរៀល និងគ្រឿងឧបភោគបរិភោគ និងសម្ភារៈប្រើប្រាស់ប្រចាំថ្ងៃ១ចំនួន ដូចជា៖ អង្ក៥០គ.ក្រ កន្ទេល១ ឆ្នាំងបាយ១ ឆ្នាំងសម្ល១ ខ្ទះ១ ចាន១០ ខ្ទះ១ ស្លាបព្រា១០ វែក៣ ចានស្រាក់១ ផ្តិល១ ធុងទឹកកក១ ចានដែក១ ប្រេងឆា២ដប ទឹកស៊ីអ៊ីវ១យួរ ទឹកត្រី១យួរ ត្រីខ១ឡូ មី១កេស ទឹកសុទ្ធ២កេះ ស្កស២កញ្ចប់ ប៊ីចេង១កញ្ចប់ អំបិល១កញ្ចប់ និងឃីត១ (មុង ភួយ ក្រមា សារុង និងអាវយឺត) ព្រមទាំងប្រជាពលរដ្ឋដែលបានចូលរួមចំនួន ១៥នាក់ ក្នុងម្នាក់ៗទទួលបានថវិកា២ម៉ឺនរៀលផងដែរ៕