ភ្នំពេញ ៖ ថ្នាក់ដឹកនាំក្រសួងឧស្សាហកម្ម និងសិប្បកម្ម បានជំរុញអោយមន្ត្រីជំនាញបន្តត្រួតពិនិត្យតាមសិប្បកម្មរោងចក្រសហគ្រាសទាំងអស់លើផលិតផលទំនិញម្ហូបអាហារដើម្បីអោយមានគុណភាពតាមស្តង់ដារសម្រាប់សុខភាពសាធារណៈអ្នកប្រើប្រាស់ជាកត្តាសំខាន់បំផុត។
ការជំរុញបែបនេះ ខណៈជួបគណៈកម្មការទី៩នៃរដ្ឋសភា ដើម្បីស្វែងយល់សកម្មភាពការងាររបស់ក្រសួងនៅរសៀលថ្ងៃច័ន្ទ ០៩ រោជ ខែបុស្ស ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៩ ខែមករា ឆ្នាំ២០១៩។ ថ្នាក់ដឹកនាំក្រសួង ដឹកនាំដោយ លោកកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម បើកកិច្ចប្រជុំជាមួយប្រតិភូនៃគណៈកម្មការទី៩ នៃរដ្ឋសភា ដឹកនាំដោយ លោកស្រីនិន សាផុន ប្រធានគណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ ដើម្បីជួបសំណេះសំណាល និងស្វែងយល់ពីសកម្មភាពការងាររបស់ក្រសួងឧស្សាហកម្ម និងសិប្បកម្ម ដែលបានអនុវត្តកន្លងមក និងជាពិសេសសម្រាប់រាជរដ្ឋាភិបាលអាណត្តិទី៦ នេះ។
លោកកិត្តិសេដ្ឋាបណ្ឌិតទេសរដ្ឋមន្ត្រី ចម ប្រសិទ្ធ បានសម្តែងការស្វាគមន៍ និងធ្វើរបាយការណ៍សង្ខេបជូនប្រតិភូសភា ស្តីពីការងារ និងលទ្ធផលសម្រេចបានរបស់ក្រសួង ក្នុងនោះរួមមាន ការងារឧស្សាហកម្ម គឺបានលើកឡើងពីសមិទ្ធផលសំខាន់ៗដែលសម្រេចបានដោយការងារឧស្សាហកម្ម បានចូលរួមចំណែកក្នុងផលទុនសរុបក្នុងស្រុក(ផសស)ប្រមាណ៣២.៤% ដែលក្នុងនោះឆ្នាំ២០០០ ចូលរួមត្រឹមតែ២២%ប៉ុណ្ណោះ។
លោកកិត្តិសេដ្ឋាបណ្ឌិតបានបន្តថា មានរោងចក្រសរុបចំនួន ១.៥២៨ រោងចក្រ ដោយនៅក្នុងឆ្នាំ២០១៨ កើនលើសឆ្នាំ២០១៧ ចំនួន ២៨ រោងចក្រហើយ វិស័យសហគ្រាសធុនតូច និងមធ្យម និងសិប្បកម្ម បានលើកឡើងពីការចុះបញ្ជី គ្រប់គ្រងត្រួតពិនិត្យសហគ្រាសធុនតូច និងមធ្យម និងសិប្បកម្ម និងការអភិវឌ្ឍគាំទ្រវិស័យសហគ្រាសធុនតូច និងមធ្យម និងសិប្បកម្មបម្រើឲ្យខឿនសេដ្ឋកិច្ចជាតិជាដើម។ ជាមួយគ្នានេះ លោកកិត្តិសេដ្ឋាបណ្ឌិត ក៏បានសង្កត់ធ្ងន់លើការរៀបចំផែនការយុទ្ធសាស្ត្រគ្រប់គ្រង អភិវឌ្ឍ និងអភិរក្សតំបន់ការពារសម្រាប់ដីស្រែអំបិល និងតំបន់សក្តានុពលផលិតផលអំបិល ក្នុងគោលដៅគ្រប់គ្រង អភិវឌ្ឍនិងលើកកម្ពស់ផលិតកម្មអំបិល។
ទាក់ទង និងការងារទឹកស្អាត លោកកិត្តិសេដ្ឋាបណ្ឌិត បានលើកឡើងអំពីការខិតខំរបស់ក្រសួងដើម្បីឈានទៅសម្រេចបានគោលនយោបាយស្តីពីទឹកស្អាត គឺពង្រីកវិសាលភាពនៃការផ្គត់ផ្គង់ទឹកស្អាតនៅទីក្រុងនិងទីប្រជុំជនឲ្យបាន៩០% ដល់ឆ្នាំ២០២៣ និង១០០%ត្រឹមឆ្នាំ២០២៥ ហើយក្នុងនោះលើកទឹកចិត្តការចូលរួមពីវិស័យឯកជន និងអ្នកវិនិយោគធំៗ ទាំងក្នុងនិងក្រៅស្រុក ។
ពាក់ព័ន្ធការងារស្តង់ដារនីយកម្ម លោកកិត្តិសេដ្ឋាបណ្ឌិត បានលើកឡើងពីការងារត្រួតពិនិត្យការវាយតម្លៃភាពអនុលោមស្របតាមបញ្ញត្តិច្បាប់ស្តីពីស្តង់ដារកម្ពុជា និងការងារចុះបញ្ជីផលិតផលបញ្ជាក់ភាពអនុ លោមសម្រាប់ផលិតផលម្ហូបអាហារ ទំនិញ សារធាតុគីមី សម្ភារៈ និងបរិក្ខារប្រើប្រាស់ ដើម្បីបង្កើនការគ្រប់គ្រងបរិមាណ និងគុណភាពផលិតផល ធានាសុវត្ថិភាពអ្នកប្រើប្រាស់ បរិស្ថាន និងសុខភាពសាធារណៈ។ ការអភិវឌ្ឍវិស័យស្តង់ដារកម្ពុជាលោកបានបង្ហាញនូវការកត់សំគាល់ថា នៅឆ្នាំ២០១៣ការអនុម័តស្តង់ដារទំនិញនិងផលិតផលបានចំនួនតែ៣៨ ប៉ុណ្ណោះ រហូតដល់ឆ្នាំ២០១៨ បានកើនឡើងរហូតដល់៨៩៥ ស្តង់ដារ។
ដោយឡែកទាក់ទងនឹងការងារមាត្រាសាស្ត្រជាតិ លោកកិត្តិសេដ្ឋាបណ្ឌិត បានបញ្ជាក់ពីសកម្មភាពត្រួតពិនិត្យការប្រើប្រាស់ឧបករណ៍មាត្រាសាស្ត្ររួមមាន ៖ កូនទម្ងន់ ជញ្ជីង ម៉ែត្រ ចំណុះ ឧបករណ៍វាស់សម្ពាធ សីតុណ្ហភាព ដើម្បីធានាការធ្វើពាណិជ្ជកម្មមានភាពត្រឹមត្រូវយុត្តិធម៌ និងការប្រកួតប្រជែងដោយស្មោះត្រង់។
លោកស្រី និន សាផុន បានថ្លែងអំណរគុណ និងវាយតម្លៃខ្ពស់ចំពោះសមិទ្ធផលដែលក្រសួងសម្រេចបាន និងបានកោតសរសើរចំពោះភាពដឹកនាំដ៏វាងវៃរបស់ លោកកិត្តិសេដ្ឋាបណ្ឌិតទេសរដ្ឋមន្ត្រី ចម ប្រសិទ្ធ ដែលជាឥស្សរជនក្នុងប្រទេសមួយរូបមានគុណសម្បត្តិជាច្រើន ក្នុងការចូលរួមបម្រើជាតិ និងសេដ្ឋកិច្ចសង្គម។
ចំណែកលោកសុខ សូកាន ជាអនុប្រធានគណៈកម្មការទី០៩ នៃរដ្ឋសភា ក៏បានចាត់ទុក លោកកិត្តិសេដ្ឋាបណ្ឌិត គឺជាស្ថាបនិកគន្លឹះម្នាក់ក្នុងប្រទេស ក្នុងការជំរុញរបបទីផ្សារសេរីនៅកម្ពុជា។
ទន្ទឹមនឹងនេះលោកក៏មានការចាប់អារម្មណ៍ និងផ្តល់សារៈសំខាន់ទៅលើការអភិវឌ្ឍវិស័យសហគ្រាសធុនតូច និងមធ្យម ព្រមទាំងគាំទ្រចំពោះការលើកឡើងរបស់ លោកកិត្តិសេដ្ឋាបណ្ឌិតទេសរដ្ឋមន្ត្រី ចម ប្រសិទ្ធ ពីគម្រោងនិងដំណើរការបង្កើតតំបន់ចង្កោមសហគ្រាសធុនតូចនិងមធ្យម (SMEs Cluster Zone)នៅកម្ពុជាផងដែរ៕
Source: Kampuchea Thmey Daily
0 Comments