មន្ទីរពេទ្យកាល់ម៉ែត បើកវគ្គបណ្ដុះបណ្ដាល ស្តីអំពី “បច្ចេកទេសព្យាបាល និងថែទាំផ្នែកប្រពោធនកម្ម”

ភ្នំពេញ ៖ ដោយយោងតាមអនុសារណៈយោគយល់គ្នារវាង ក្រសួងសុខាភិបាលកម្ពុជា តាមរយៈមន្ទីរពេទ្យកាល់ម៉ែត និងមូលនិធិតេម៉ាសិក និងមន្ទីរពេទ្យតាន់តុកសេង ប្រទេសសិង្ហបុរី វគ្គបណ្តុះបណ្តាលបន្តកម្រិតជំនាញសង្គ្រោះបន្ទាន់ ស្តីពី “បច្ចេកទេសព្យាបាល និងថែទាំផ្នែកប្រពោធនកម្ម”ត្រូវបានបន្តរៀបចំឡើងនៅមន្ទីរពេទ្យកាល់ម៉ែត។

គួរបញ្ជាក់ផងដែរថា វគ្គបណ្ដុះបណ្ដាលជាមួយដៃគូមន្ទីរពេទ្យតាន់តុកសេង ប្រទេសសិង្ហបុរី នេះចាប់ផ្តើមតាំងពី២០១៤ និងបន្តកិច្ចសហប្រតិបត្តិការគម្រោងបណ្ដុះបណ្ដាល ដែលមានរយៈពេល ៣ឆ្នាំ ដោយក្នុងមួយឆ្នាំមានវគ្គសិក្សាមួយវគ្គ ហើយក្នុង១វគ្គមាន ២កម្រិត។ ថ្នាក់មូលដ្ឋាន មានរយៈពេល៣ថ្ងៃ និងថ្នាក់ជាន់ខ្ពស់គឺបន្ថែម២ថ្ងៃទៀត។ នេះជាវគ្គទី២ ដែលចាប់ផ្ដើមពីថ្ងៃទី២១ ដល់ ថ្ងៃទី២៣ ខែមករា ឆ្នាំ២០១៩ សម្រាប់ថ្នាក់មូលដ្ឋាន និងចាប់ពីថ្ងៃទី ២៤ ដល់ ២៥ ខែមករា ឆ្នាំ២០១៩ សម្រាប់ថ្នាក់ជាន់ខ្ពស់។

ក្នុងវគ្គបណ្តុះបណ្តាលនេះ មានការចូលរួមពីក្រុមគ្រូពេទ្យ នៃប្រទេសសិង្ហបុរី ជាពិសេសពីមន្ទីរពេទ្យតាន់តុកសេង និងសិក្ខាកាម ជាគ្រូពេទ្យ និងគិលានុបដ្ឋាក-យិកា ដែលមកពីមន្ទីរពេទ្យកាល់ម៉ែត មន្ទីរពេទ្យមិត្តភាពកម្ពុជាសូវៀត មន្ទីរពេទ្យព្រះកុសមៈ និងមន្ទីរពេទ្យខេត្តមួយចំនួនទៀត។

វគ្គទី២នេះ មានឈ្មោះថា TITAN ដែលមានគោលដៅបន្តលើកកម្ពស់សមត្ថភាពជំនាញកម្រិតស្តង់ដារសាកល ទាំងបច្ចេកទេស ទាំងជំនាញគ្រប់គ្រង លើផ្នែកសង្គ្រោះកម្រិតធ្ងន់ ឬ ប្រពោធនកម្ម ( Critical Care) ដោយមានទាំងទ្រឹស្ដី និងការធ្វើអនុវត្តន៍ផ្ទាល់៕