ភ្នំពេញ ៖ ជប៉ុន គ្រោងនឹងបង្កើតមជ្ឈមណ្ឌលបណ្តុះបណ្តាលជំនាញផ្សេងៗដល់យុវជនកម្ពុជាដើម្បីបញ្ជូនទៅធ្វើការនៅប្រទេសជប៉ុនដោយស្របច្បាប់នាពេលខាងមុខនេះ ដែលជួយឆ្លើយតបទៅនឹងតម្រូវការទីផ្សារពលកម្មបច្ចុប្បន្ននៅប្រទេសជប៉ុន។
លោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈបានមានប្រសាសន៍ថានាពេលខាងមុខនេះ អង្គការក្រៅរដ្ឋាភិបាលសាលា អេត ជប៉ុន គ្រោងនឹងសាងសង់មជ្ឈមណ្ឌលមួយនៅរាជធានីភ្នំពេញ ដើម្បីជ្រើសរើសនិស្សិត និងយុវជនវ័យក្មេងកម្ពុជាយកមកបណ្តុះបណ្តាលលើជំនាញឧស្សាហកម្ម និងសេវាកម្ម មុននឹងបញ្ជូនទៅធ្វើការនៅប្រទេសជប៉ុន។
ថ្លែងក្រោយជំនួបការងាររវាង លោក មីគី វ៉ាត់តាណាបេ អគ្គនាយកអង្គការក្រៅរដ្ឋាភិបាលសាលា អេត ជប៉ុននិងជាប្រធានគណៈកម្មាធិការអចិន្ត្រៃយ៍កិច្ចការបរទេស និងការពារជាតិជប៉ុន កាលពីព្រឹកថ្ងៃទី១០ ខែមករា ឆ្នាំ២០១៩ នៅទីស្ដីការក្រសួង បណ្ឌិត អ៊ិត សំហេង បានបន្តថា ពលករខ្មែរដែលទៅធ្វើការនៅជប៉ុននាពេលខាងមុខនេះ នឹងទទួលបានលក្ខខណ្ឌការងារ អត្ថប្រយោជន៍ផ្សេងៗ និងប្រាក់ខែខ្ពស់ដូចជា ប្រជាជនជប៉ុនដែរ ព្រោះថារដ្ឋាភិបាលជប៉ុន បានកែប្រែច្បាប់ថ្មីខណៈពីមុនកម្ពុជាបញ្ជូនត្រឹមកម្រិតកម្មសិក្សាការីប៉ុណ្ណោះ។
លោករដ្ឋមន្ត្រីបានបន្ថែមថា ប៉ុន្តែមុននឹងបញ្ជូនទៅត្រូវធ្វើការបំពាក់បំប៉នទៅលើភាសាជប៉ុនជាមុនសិន ដោយបណ្តុះបណ្តាលចាប់ពី៣ ទៅ៦ខែ សម្រាប់អ្នកចេះខ្លះៗ និងចាប់ពី៦ខែ ទៅ១០ខែសម្រាប់អ្នកដែលអត់ចេះភាសាជប៉ុនសោះតែម្តង និងជំនាញផ្សេងៗ ព្រមទាំងលក្ខខណ្ឌការងារជាដើម។
លោករដ្ឋមន្ត្រីសង្ឃឹមថា តាមរយៈច្បាប់ថ្មីនេះ កម្ពុជានឹងអាចបញ្ជូនយុវជនខ្មែរកាន់តែច្រើនថែមទៀតទៅធ្វើការស្របច្បាប់នៅជប៉ុន ដែលនឹងជួយលើកស្ទួយដល់ជីវភាពរស់នៅកាន់តែប្រសើរឡើងផងដែរ។
លោករដ្ឋមន្ត្រីបានឲ្យដឹងទៀតថា ដើម្បីអនុវត្តច្បាប់ថ្មីនេះ រាជរដ្ឋាភិបាលប្រទេសទាំងពីរ កម្ពុជា-ជប៉ុន នឹងរៀបចំឲ្យមានចុះកិច្ចព្រមព្រៀងសហប្រតិបត្តិការជាមួយក្រសួងពាក់ព័ន្ធដើម្បីសម្រួលដល់ការបញ្ជូនពលករទៅធ្វើការនៅជប៉ុនប្រកបដោយសុវត្ថិភាព និងប្រសិទ្ធភាពខ្ពស់។
ច្បាប់របស់ជប៉ុនថ្មីដែលត្រៀមចូលជាធរមាននាខែមេសា ឆ្នាំ២០១៩ខាងមុខនេះ ត្រូវបានព្រឹទ្ធសភាជប៉ុន អនុម័តកាលពីថ្ងៃទី៨ ខែធ្នូ ឆ្នាំ២០១៨កន្លងទៅនេះ ដោយអនុញ្ញាតឲ្យរាជរដ្ឋាភិបាលជប៉ុនទទួលយកពលករបរទេសរាប់ម៉ឺននាក់មករស់នៅ និងបម្រើការងារនៅប្រទេសជប៉ុនបន្ថែមទៀតដើម្បីជួយដោះស្រាយបញ្ហាកង្វះកម្លាំងពលកម្មដែលបណ្តាលមកពីការថយចុះ នៃកំណើតប្រជាជននិងការកើនឡើង នៃចំនួនមនុស្សចាស់ជរា។
នៅក្នុងច្បាប់នោះបានបង្កើតជាទិដ្ឋាការថ្មីចំនួនពីរប្រភេទសម្រាប់ពលករបរទេស គឺទី១. ផ្តល់សុពលភាព៥ឆ្នាំសម្រាប់ពលករបរទេសដែលអាចនិយាយភាសាជប៉ុនបានល្អ និងទី២.ពលករមានជំនាញខ្ពស់ត្រូវបានអនុញ្ញាតឲ្យនាំគ្រួសារទៅរស់នៅជាមួយដោយមានសិទ្ធិរស់នៅក្នុងប្រទេសជប៉ុនជារៀងរហូតថែមទៀតផង។
លោកស្រី អ៊ឹង ស៊ាងរិទ្ធី ប្រធានសមាគមជ្រើសរើសពលករកម្ពុជាបានមានប្រសាសន៍ថា ច្បាប់គ្រប់គ្រងអន្តោប្រវេសន៍ថ្មីរបស់ជប៉ុននេះនឹងផ្តល់ឱកាសដល់ពលករខ្មែរទៅធ្វើការនៅប្រទេសជប៉ុនកាន់តែច្រើនថែមទៀតខណៈបច្ចុប្បន្ននេះមានពលករខ្មែរកំពុងធ្វើការនៅប្រទេសជប៉ុន មានចំនួនតិចតួចនៅឡើយ។
លោកស្រីអ៊ឹង ស៊ាងរិទ្ធី បានប្ដេជ្ញាថា នឹងខិតខំបណ្តុះបណ្តាលដល់ពលករដែលមានបំណងទៅធ្វើការនៅជប៉ុនបន្ថែមទៀតទៅលើជំនាញភាសាជប៉ុន ច្បាប់ និងលក្ខខណ្ឌការងារ និងវប្បធម៌ប្រពៃណីរបស់ជប៉ុនដើម្បីឲ្យពលករអាចសម្របខ្លួនរស់នៅ និងធ្វើការជាមួយជនជាតិជប៉ុនបាន។
ជាមួយគ្នានេះដែរ លោកស្រី បានណែនាំដល់ពលករខ្មែរដែលកំពុងធ្វើការនៅប្រទេសជប៉ុន ត្រូវគោរពច្បាប់ វិន័យ និងលក្ខខណ្ឌការងាររបស់ជប៉ុនឲ្យបានខ្ជាប់ខ្ជួនដើម្បីឲ្យថៅកែពេញចិត្ត និងបង្កើនការជ្រើសរើសពលករខ្មែរទៅធ្វើការឲ្យបានច្រើនថែមទៀតជួយលើកស្ទួយជីវភាពគ្រួសារព្រោះពលករធ្វើការនៅជប៉ុនទទួលបានប្រាក់ខែ ទាបបំផុតជិត១ពាន់ដុល្លារអាមេរិក និងខ្ពស់បំផុតជិត២ពាន់ដុល្លារអាមេរិក។
សូមបញ្ជាក់ថា បច្ចុប្បន្ននេះ មានពលករបរទេសកំពុងធ្វើការងារនៅប្រទេសជប៉ុនចំនួន១លាន២សែននាក់ ស្មើនឹងចំនួន១៥ប្រទេស ហើយកម្ពុជាឈរលើលេខរៀងទី៧ ដោយមានកម្មសិក្សាការីជាង៩ពាន់នាក់ ធ្វើការទៅលើវិស័យឧស្សាហកម្ម កសិកម្ម សេវាកម្ម និងថែទាំមនុស្សចាស់ជាដើម ៕
Source: Kampuchea Thmey Daily
0 Comments