ភ្នំពេញ ៖ នៅលើបណ្ដាញទំនាក់ទំនងសង្គម កាលពីថ្ងៃទី២៩ ខែមករា ឆ្នាំ២០១៩នេះ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា បានប្រកាសយ៉ាងជាក់លាក់ថា ប្រទេសកម្ពុជា ត្រូវតែមានសន្តិភាពជានិច្ច ទោះបីស្ថិតក្នុងកាលៈទេសៈណាក៏ដោយ។
ដោយភ្ជាប់ជាមួយនឹងរូបថតជាច្រើនសន្លឹក ដែលមានទាំងរូបថត សខ្មៅ ពីអតីតកាល និងរូបថត នៃការអភិវឌ្ឍ នៅក្នុងរាជធានីភ្នំពេញសព្វថ្ងៃនេះ សម្ដេចតេជោ បានលើកឡើងថា កម្ពុជា ត្រូវតែមានសន្តិភាពជាដរាបតទៅ។
រូបថតសខ្មៅមួយសន្លឹក ដែលយើងបានឃើញ គឺជាទិដ្ឋភាពមួយផ្នែក នៃទីក្រុងភ្នំពេញ ដែលត្រូវបានបំផ្លាញ និងបោះបង់ចោល ដោយសារសង្គ្រាម និងរបបប្រល័យពូជសាសន៍ប៉ុលពត នាអំឡុងឆ្នាំ ១៩៧៥-១៩៧៩។
នៅលើបណ្ដាញទំនាក់ទំនងសង្គម សម្ដេចតេជោ ហ៊ុន សែន បានសរសេរទៀតថា កម្ពុជា មានសន្តិភាពពេញលេញជាង២០ឆ្នាំមកនេះ ទីក្រុងភ្នំពេញ ត្រូវបានអភិវឌ្ឍន៍ឲ្យរីកលូតលាស់ទៅមុខឥតឈប់ឈរ។ ដូច្នេះ យើងត្រូវរួមគ្នាថែរក្សា ការពារសន្តិភាពឲ្យខាងតែបាន ដើម្បីកុំឲ្យប្រទេសជាតិវិលធ្លាក់ទៅក្នុងភ្នក់ភ្លើង នៃសង្គ្រាម និងការបំផ្លិចបំផ្លាញសាជាថ្មី។ សូមជូនពរបងប្អូនជនរួមជាតិ ជួបតែសេចក្តីសុខ និងសំណាងល្អគ្រប់ទីកន្លែង។
ការសរសេរក្រើនរំលឹក និងលើកឡើងរបស់ប្រមុខរាជរដ្ឋាភិបាលនេះ ខៈណៈដែលបណ្តាប្រទេស មួយចំនួននៅលើពិភពលោក បាននិងកំពុងដែលមានអសន្តិសុខ ចលាចល ច្របូកច្របល់ ដោយភ្លើងសង្គ្រាម ការហួងហែងរើសអើង បណ្ដាលឲ្យប្រជាពលរដ្ឋស្លូតត្រង់ស្លាប់ជារៀងរាល់ថ្ងៃ ប្រទេសជាតិ ដែលធ្លាប់រុងរឿង បែរជាខ្ទេចខ្ទាំ ដោយសារគ្រាប់បែករបស់អាមេរិក ដូចជានៅប្រទេសស៊េរីជាដើម។ ហើយឥឡូវនេះ ស្រមោលភ្លើងសង្គ្រាម និងការបែកបាក់កំពុងអង្រួនប្រទេសវេណេស៊ុយអេឡា ដោយសារសហរដ្ឋអាមេរិក និងប្រទេសជាសម្ព័ន្ធមិត្តមួយចំនួនទៀតរបស់អាមេរិកកំពុងលូកដៃចូលកកូរកកាយកិច្ចផ្ទៃក្នុងប្រទេសដ៏ឆើតឆាយមួយនេះ ក្រោមរូបភាពលើកបន្តុបមេបក្សនយោបាយប្រឆាំង ធ្វើជាប្រធានាធិបតី តាមរបៀបដែលអាមេរិកចង់បាន៕
Source: Kampuchea Thmey Daily
0 Comments