បាត់ដំបង ៖ លុយកាក់ និងទ្រព្យសម្បត្តិមួយចំនួន ដែលជារបស់ម្ចាស់ផ្ទះសំណាក់ យីហោ សោរ យឹម ត្រូវបានជនមិនស្គាល់មុខលួចយក ហើយគេចខ្លួនចេញទៅបាត់អស់ តាមរយៈ នៃការបបួលគ្នាផឹកស្រាបៀ ដោយជនសង្ស័យបានលបលួចដាក់ថ្នាំសណ្តំចូលក្នុងស្រាបៀនោះ។
ហេតុការណ៍ដ៏កម្រមួយនេះ បានកើតឡើងកាលពីថ្ងៃទី២៧ ខែមករា ឆ្នាំ២០១៩ វេលាម៉ោង៩និង ៣០នាទីយប់ ត្រង់ចំណុចភូមិពោធិ១ ឃុំគារ ស្រុកមោងឫស្សី ខេត្តបាត់ដំបង ដែលបង្កឡើងដោយជនសង្ស័យជាស្ត្រី មានគ្នា២នាក់ បានធ្វើសកម្មភាពបបួលជនរងគ្រោះ ឈ្មោះ សោរ យឹម ភេទប្រុស អាយុ៦៣ឆ្នាំ ( ជាម្ចាស់ផ្ទះសំណាក់ យីហោសោរ យឹម ) ផឹកស្រាបៀABC ជាមួយគ្នា។
លុះការផឹកស៊ី និង ជជែកគ្នាលេងបានតែបន្តិច ជនរងគ្រោះក៏បានដួលសន្លប់លែងដឹងខ្លួន រួចជនសង្ស័យ បាននាំគ្នាលួចយកទ្រព្យសម្បត្តិមួយចំនួនក្នុងនោះមាន លុយខ្មែរចំនួន៦០០.០០០រៀល ខ្សែកប្លាទីន១ខ្សែ ទម្ងន់២តម្លឹង បន្តោងមាសទម្ងន់៥ជី ទូរស័ព្ទអាយហ្វូនX ១គ្រឿង នាឡិកាដៃ២ គ្រឿង។
ក្រោយពីបានសិក្សាទៅលើករណីនេះ តាមរយៈការងារជំនាញរួចមក នៅថ្ងៃទី២៨ ខែមករា ឆ្នាំ២០១៩ កម្លាំងស្នងការដ្ឋាននគរបាលខេត្តបាត់ដំបង បានសហការជាមួយ កម្លាំងនគរបាលខេត្តបន្ទាយមានជ័យ ធ្វើការឃាត់ខ្លួនជនសង្ស័យបានចំនួន៣នាក់។
ជនទាំងនេះមាន ១-ឈ្មោះ ជា ចិន្តា ភេទស្រី អាយុ៥៤ឆ្នាំ ,២. ឈ្មោះ ឡុង ស្រីយ៉ា ភេទស្រី អាយុ ១៦ឆ្នាំ អ្នកទាំង២ រស់នៅភូមិ៤ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ,និងឈ្មោះ ឆេង សីហា ភេទប្រុស អាយុ២៤ឆ្នាំ រស់នៅភូមិតាសិត ឃុំពេល ស្រុកត្រាំកក់ ខេត្តតាកែវ ដោយសមត្ថកិច្ចបានដកហូតវត្ថុតាង គឺ ទូរស័ព្ទដៃ១គ្រឿង និង នាឡិកាដៃ ចំនួន២គ្រឿង ហើយពួកគេបានសារភាពថា ថ្នាំសណ្តំដែលពួកគេបានដាក់លាយនៅក្នុងស្រាបៀនោះ គឺជាប្រភេទថ្នាំងងុយដេកតែប៉ុណ្ណោះ។
បច្ចុប្បន្ន ជនសង្ស័យទាំងអស់ ត្រូវបានកម្លាំងជំនាញនាំខ្លួនមកកាន់ស្នងការដ្ឋាននគរបាលខេត្តបាត់ដំបងវិញហើយ ដើម្បីកសាងសំណុំរឿង និងបញ្ជូនទៅកាន់សាលាដំបូង៕
Source: Kampuchea Thmey Daily
0 Comments