សៀមរាប ៖ នៅក្នុងដំណើរទស្សនកិច្ចនៅខេត្តសៀមរាប រដ្ឋមន្ត្រីក្រសួងវប្បធម៌ និង ទេសចរណ៍ចិន វាយតម្លៃខ្ពស់ ចំពោះសក្តានុពលទេសចរណ៍វប្បធម៌-ប្រវត្តិសាស្ត្ររបស់កម្ពុជា និងថា បន្តពង្រឹងកិច្ចសហប្រតិបត្តិការចិន-កម្ពុជា លើវិស័យវប្បធម៌ និង ទេសចរណ៍ ឲ្យកាន់តែប្រសើរឡើងថែមទៀត។
គោលដៅសំខាន់ៗ នៃដំណើរទស្សនកិច្ចជាផ្លូវការនៅក្នុងតំបន់រមណីយដ្ឋានទេសចរណ៍ វប្បធម៌ប្រវត្តិសាស្ត្រ-អង្គរ របស់ឯកឧត្តម ឡ ស៊ូកាង រដ្ឋមន្ត្រីក្រសួងវប្បធម៌និងទេសចរណ៍ នៃ សាធារណរដ្ឋប្រជាមានិតចិន នាថ្ងៃទី២៨ ខែមករា ឆ្នាំ២០១៩នេះ រួមមាន ការទស្សនាព្រះអាទិត្យរះនៅប្រាសាទអង្គរវត្ត ទស្សនាប្រាសាទបាយ័ន ប្រាសាទចៅសាយទេវតា ប្រាសាទតាកែវ ប្រាសាទតាព្រហ្ម ប្រាសាទបន្ទាយស្រី និងទស្សនាព្រះអាទិត្យរៀបលិច លើខ្នងភ្នំនៃប្រាសាទបាខែង។
នៅក្នុងដំណើរទស្សនកិច្ចពេញមួយថ្ងៃនេះ ឯកឧត្តម ឡ ស៊ូកាង រដ្ឋមន្ត្រីក្រសួងវប្បធម៌និងទេសចរណ៍ នៃ សាធារណរដ្ឋប្រជាមានិតចិន បានបង្ហាញចំណាប់អារម្មណ៍ដោយក្តីមោទនភាព ចំពោះឱកាសដ៏មានតម្លៃនៃវត្តមានរបស់ឯកឧត្តម ថា ជា ភ័ព្វសំណាងមួយ នៅលើដែនដីកម្ពុជា ព្រះរាជាណាចក្រអច្ឆរិយៈ។
លោករដ្ឋមន្ត្រីក្រសួងវប្បធម៌និងទេសចរណ៍ចិន មានប្រសាសន៍ថា ប្រាង្គប្រាសាទកេរមរតកដូនតាខ្មែរ គឺពិតជាស្ថាបត្យកម្មដ៏កំពូលនៃមនុស្សជាតិ ហើយដែលបច្ចុប្បន្ននេះត្រូវបានក្លាយជាសក្តានុពលទេសចរណ៍វប្បធម៌-ប្រវត្តិសាស្ត្រនៃកម្ពុជា ដែលត្រូវបានពិភពលោកសម្លឹងមើលឃើញ និងជួយជ្រោមជ្រែង ឧបត្ថម្ភគាំពារ ថែរក្សា និង ជួសជុល ដែលក្នុងនោះភាគីចិនក៏មានចំណែកចូលរួមផងដែរ ដូចជាបានសម្រេចការជួសជុលប្រាសាទចៅសាយទេវតា និង ប្រាសាទតាកែវ ហើយដែលបច្ចុប្បន្ន ក៏កំពុងបន្តកិច្ចសហប្រតិបត្តិការ ដំណើរការជួសជុលប្រាសាទភិមានអាកាស។
លោក គូសបញ្ជាក់ឲ្យដឹងដែរថា ៖ ដំណើរទស្សនកិច្ចរបស់លោកមកកាន់កម្ពុជា ពិសេសការទស្សនាផ្ទាល់ប្រាង្គប្រាសាទមួយចំនួននៅក្នុងតំបន់នៃឧទ្យានអង្គរ(បេតិកភណ្ឌពិភពលោក) គឺដើម្បីពង្រឹងកិច្ចសហប្រតិបត្តិការកម្ពុជាចិនលើវិស័យវប្បធម៌និងទេសចរណ៍ ក្នុងនោះក៏មានបំណងសិក្សាស្វែងយល់អំពីបទពិសោធន៍ផងដែរ លើការងារថែទាំ ជួសជុលប្រាសាទ និងទទួលយកសំណូមពរចាំបាច់នានានៃភាគីកម្ពុជា ដែលក្នុងនោះរួមមានសំណើរបស់អាជ្ញាធរជាតិអប្សរា ។
លោកឡ ស៊ូកាង មានប្រសាសន៍ថា ៖ ភាគីចិន ត្រៀមខ្លួនជានិច្ចក្នុងការបន្ត ផ្តល់កិច្ចសហប្រតិបត្តិការជាមួយភាគីកម្ពុជា។ ពីមុន ថ្ងៃនេះ និងសម្រាប់ថ្ងៃអនាគត កម្ពុជាគឺជាដៃគូដ៏ល្អ និងជាអមតៈរបស់ប្រជាជន និង រដ្ឋាភិបាលចិន ក្រោមការគាំទ្រគ្នាទៅវិញទៅមកគ្រប់កាលៈទេសៈ។ សម្រាប់ឆ្នាំ២០១៩នេះ គឺជាការប្តេជ្ញាចិត្តចំពោះមុខរបស់ភាគីចិន ក្នុងការជំរុញឲ្យអ្នកទេសចរចិន ចូលមកទស្សនាកម្ពុជា ឲ្យបានច្រើនជាងឆ្នាំ២០១៨កន្លងមក និងបន្តកំណើនបន្ថែមទៀតនាបណ្តាឆ្នាំខាងមុខ ។
លោករំលឹកថា ក្នុងដំណើរទស្សនកិច្ចជាផ្លូវរដ្ឋរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ទៅកាន់សាធារណរដ្ឋប្រជាមានិតចិនកន្លងមកថ្មីៗនេះ ក៏បានពិភាក្សាឯកភាពគ្នាផងដែរ អំពីកិច្ចសហប្រតិបត្តិការលើវិស័យវប្បធម៌ និង ទេសចរណ៍។ នៅថ្ងៃទី៣០ ខែមករា ឆ្នាំ២០១៩ នឹងមានប្រារព្ធ ទិវា ឆ្នាំទេសចរណ៍និងវប្បធម៌ ចិន-កម្ពុជា ជាលើកដំបូង នៅព្រះរាជាណាចក្រកម្ពុជា៕
Source: Kampuchea Thmey Daily
0 Comments