ចន ច័ន្ទលក្ខិណា ផ្ទុះប្រតិកម្មលើករណីគេរិះគន់ខ្លួន នាថ្ងៃបូជាសព ខេមរៈ ស្រីពៅ

ភ្នំពេញ ៖ តារាសម្ដែង និងជាប្រធានសមាគមសិល្បករខ្មែរ អ្នកនាង ចន ច័ន្ទលក្ខិណា បានផ្ទុះប្រតិកម្ម និងធ្វើការ Live វីដេអូ បញ្ជាក់លើករណី ដែលមានបុគ្គលមួយចំនួនធ្វើការរិះគន់ខ្លួន អំឡុងពេលជិះម៉ូតូឌុបចូលរួមពិធីដង្ហែសព កញ្ញា ខេមរៈ ស្រីពៅ ទៅបូជាកាលពីរសៀលថ្ងៃទី២៨ ខែមករា ឆ្នាំ២០១៩ នៅវត្តសំរោងអណ្តែត។

ការផ្ទុះប្រតិកម្មរបស់តារាស្រី អ្នកនាង ចន ច័ន្ទលក្ខិណា នាពេលនេះ បានធ្វើឡើងភ្លាមៗ បន្ទាប់ពីមានការរិះគន់ថា ការជិះម៉ូតូឌុបដើម្បីចូលរួមពិធីបុណ្យសពរបស់ កញ្ញា ខេមរៈ ស្រីពៅ ត្រឹមជាការសម្តែង និងហេតុផលមួយទៀត គឺនាងខ្ជិលដើរតែប៉ុណ្ណោះ។ ប៉ុន្តែករណីនេះ ត្រូវបាន អ្នកនាង ចន ច័ន្ទលក្ខិណា ចាត់ទុកថាបុគ្គលដែលនិយាយនោះ ជាមនុស្សគ្មានការគិត និងពិចារណា។

អ្នកនាង ចន ច័ន្ទលក្ខិណា បានសរសេរភ្ជាប់ជាមួយសាររិះគន់នោះថា តាមចិត្ត គឺចង់បកស្រាយជូនលោកអ្នកនាងខួរអគតិ និយាយដោយមិនអានអក្សរពីសាច់រឿង និង អត្ថបទ នៃការសរសេរចុះផ្សាយ តែសូមមិននិយាយទុកឲ្យមនុស្សទាំងនោះបន្តភាពងងឹត និងងងើលពោរពេញដោយភាពឈ្នានីសទៀតចុះ។

តារាស្រីចាស់វស្សា អ្នកនាង ចន ច័ន្ទលក្ខិណា បាននិយាយទៀតថា ព័ត៌មានទុក្ខសោកហែសព ក៏នាំគ្នាទើសជ្រេញវាយប្រហារដែរ។ ទំនេរខ្ញុំLive បកស្រាយជូនពួកជ្រេញទាំងឡាយ។ បន្ថែមពីលើនេះ អ្នកនាង ចន ច័ន្ទលក្ខិណា បានលើកឡើងថា អ្វីដែលនាងបានធ្វើឡើងនោះ គឺកើតចេញពីទឹកចិត្តស្រលាញ់រាប់អានរវាងខ្លួន និងក្រុមគ្រួសារ លោក ខេមរៈ សិរីមន្ត។ ម្យ៉ាងទៀតពេលវេលានោះ (បុណ្យសព) គឺនាងបានដឹងច្បាស់ថា ក្នុងនាមខ្លួនជាអ្នករាប់អានគ្នាជាមួយក្រុមគ្រួសារ ស្រីពៅ និងជាប្រធានសមាគម ត្រូវមានតួនាទី ឬភារកិច្ចជួយចាត់ចែងបុណ្យសព។

តារាស្រី អ្នកនាង ចន ច័ន្ទលក្ខណា បាននិយាយទៀតថា ចាប់តាំងពីពេលត្រូវទៅទទួលសពនៅឯព្រលានយន្តហោះ និងថ្ងៃ នៃពិធីបុណ្យរហូតពេលយកសពស្រីពៅ ទៅបូជា គឺនាង និងក្រុមគ្រួសារលោក ខេមរៈ សិរីមន្ត គឺមានការទាក់ទងគ្នាជាប្រចាំ។ ដូច្នេះហើយ រាល់កិច្ចការទាំងអស់ គឺខ្លួនបានដឹង និងរៀបចំចាត់ចែងតាមគម្រោង រីឯរឿងថាជិះម៉ូតូឌុប ព្រោះខ្លាចយឺតពេលហើយគ្រាន់តែជាការសម្តែងនោះ គឺគ្មានការពិតនោះឡើយ៕