ភ្នំពេញ ៖ សកម្មភាពអាវុធហត្ថរាជធានីភ្នំពេញ ក៏ដូចសមត្ថកិច្ចពាក់ព័ន្ធបានសហការការពារក្នុងពិធីបុណ្យជាតិ៧ មករាដែលជាថ្ងៃកំណើតទី២របស់ប្រជាជាតិខ្មែរគ្រប់ៗរូបដោយទទួលបានជោគជ័យពិសេសធ្វើឲ្យថ្នាក់ដឹកនាំចាប់អារម្មណ៍ទទួលបានការកោតសរសើរក្នុងការរក្សាសន្តិសុខសុវត្ថិភាពបានល្អប្រសើរជុំវិញបរិវេណនៃកន្លែងប្រារព្ធពិធីតែម្ដង ដែលមានវត្តមានចូលរួមពីសំណាក់ប្រមុខដឹកនាំគ្រប់ជាន់ថ្នាក់ក្នុងជួររាជរដ្ឋាភិបាលកម្ពុជា។
ការចូលរួមយ៉ាងសស្រាក់សស្រាំក្នុងសកម្មភាពរក្សាការពារសន្តិសុខសណ្តាប់ធ្នាប់ជុំវិញពិធីរំលឹកខួបលើកទី៤០ឆ្នាំ (៧មករា១៩៧៩-៧មករា២០១៩)ពីសំណាក់កម្លាំងសមត្ថកិច្ចចម្រុះនៅថ្ងៃទី ៧ខែ មករាឆ្នាំ២០១៩ នាពហុកីឡាដ្ឋាន ជាតិអូឡាំពិកបានសបញ្ជាក់ឲ្យឃើញពីការទទួលខុសត្រូវខ្ពស់ ដែលធានាបានទាំងស្រុងពីសន្តិសុខទូទៅប្រកបដោយជោគជ័យក្នុងការប្រារព្ធពិធីទាំងមូល។
មន្ត្រីជាន់ខ្ពស់អាវុធហត្ថរាជធានីភ្នំពេញបានឲ្យដឹងថា ក្រោយពីទទួលបានផែនការការពារដោយមានការប្រារព្ធខួបលើកទី៤០ឆ្នាំ (៧មករា១៩៧៩-៧មករា២០១៩) ដើម្បីអបអរជ័យជម្នះនៃការស្រោចស្រង់ប្រទេសជាតិ រំដោះអាយុជីវិត និងសិទ្ធិសេរីភាពរបស់ប្រជាពលរដ្ឋនៅកម្ពុជាចេញពីភពខ្មៅងងឹត សាហាវយងឃ្នង នៃរបបកម្ពុជាប្រជាធិបតេយ្យ ប្រល័យពូជសាសន៍ ប៉ុល ពតមកកម្លាំងអាវុធហត្ថទូទាំងរាជធានីនិងកម្លាំងសមត្ថកិច្ចចម្រុះពាក់ព័ន្ធបានចេញប្រតិបត្តិការការពារមុននិងក្រោយបញ្ចប់ពិធីទទួលបានជោគជ័យ។
ប្រភពបន្តថា ក្នុងកម្មវិធី អបអរសាទរនាពេលនោះ គឺមានការអញ្ជើញចូលរួមពីថ្នាក់ដឹកនាំកំពូលៗរបស់រាជរដ្ឋាភិបាល បណ្តាគណបក្សផ្សេងៗ មន្ត្រីអង្គទូតមកពីបណ្តាប្រទេសនានា និង មហាជនរាប់ម៉ឺននាក់ ព្រមទាំងមានការការពារសន្តិសុខសណ្តាប់ធ្នាប់យ៉ាងម៉ឺងម៉ាត់ហ្មត់ចត់ ពីកម្លាំងសមត្ថកិច្ចចម្រុះ អាជ្ញាធរមូលដ្ឋាន គ្រប់លំដាប់ថ្នាក់ ក្នុងនោះកម្លាំងអាវុធហត្ថរាជធានីភ្នំពេញ ក៏បានចូលរួមយ៉ាងសកម្មក្នុងការបំពេញតួនាទីភារកិច្ច របស់ខ្លួន លើការរក្សាសន្តិសុខសណ្តាប់ធ្នាប់ទាំងក្នុងនិងក្រៅបរិវេណប្រារព្ធពិធី ញ៉ាំងឲ្យកម្មវិធីបានប្រព្រឹត្តទៅ ប្រកបដោយភាពរលូននិងសុវត្ថិភាពល្អ៕
Source: Kampuchea Thmey Daily
0 Comments