ភ្នំពេញ ៖ បុរស២នាក់ ក្នុងចំណោម៣នាក់ ត្រូវបានសមត្ថកិច្ចនគរបាលខណ្ឌសែនសុខ ឃាត់ខ្លួនពីបទសង្ស័យថា បានជាប់ពាក់ព័ន្ធក្នុងអំពើលួចយកម៉ូតូគេ១គ្រឿង នៅក្នុងផ្សារអ៊ីអន២ ក្នុងខណ្ឌសែនសុខ កាលពីម៉ោង១០យប់ថ្ងៃទី៧ ខែមករា ឆ្នាំ២០១៩ ដែលជនសង្ស័យទាំង២នោះម្នាក់ជាអ្នករត់តាក់ស៊ី ម្នាក់ជាជាងធ្វើសោ។
បើតាមសេចក្តីរាយការណ៍របស់សមត្ថកិច្ចមូលដ្ឋានបានឲ្យដឹងថា នៅមុនពេលកើតហេតុជនរងគ្រោះម្នាក់ឈ្មោះ ស៊ាម ហុងសាត ភេទប្រុស អាយុ២៣ឆ្នាំ មានទីលំនៅម្តុំខាងទឹកដីមូលដ្ឋានខណ្ឌជ្រោយចង្វា មុខរបរជាបុគ្គលិកនៅផ្សារអ៊ីអន២ បានជិះម៉ូតូម៉ាកNec ពាក់ស្លាកលេខខេត្តកណ្តាល 1AA.3435 របស់គាត់ ចេញពីផ្ទះចូលមកធ្វើការងារនៅផ្សារអ៊ីអន២។ នៅពេលមកដល់គោលដៅគាត់បានចតម៉ូតូនៅកន្លែងចំណតម៉ូតូសម្រាប់បុគ្គលិក ដោយភ្លេចចាក់សោ.ក រួចបានឡើងទៅជាន់ទី២ជាកន្លែងធ្វើការរបស់គាត់ដូចសព្វមួយដង។
ប្រភពដដែលបានបញ្ជាក់ថា ក្រោយមកជនសង្ស័យម្នាក់ដែលពុំស្គាល់ឈ្មោះគេចខ្លួនបាត់ បានទូរស័ព្ទហៅបក្ខពួករបស់គេម្នាក់ឈ្មោះ សំ រិទ្ឋ ហៅធី អាយុ៣៥ឆ្នាំ មុខរបរបើកឡានតាក់ស៊ីឲ្យមកដឹកខ្លួនពីម្តុំណាហ្គាវើល បន្ទាប់មកគេក៏បានហៅបក្ខពួកគេម្នាក់ឈ្មោះ ហេង សំណាង អាយុ២៥ឆ្នាំ មុខរបរជាងធ្វើសោ ឲ្យឡើងជិះឡាននេះមកធ្វើសោម៉ូតូ។
នៅពេលមកដល់ផ្សារអ៊ីអន២ត្រង់ចំណតម៉ូតូបុគ្គលិក ជនទាំង៣នាក់បានធ្វើសកម្មភាពឆ្កឹះឆ្កៀលសោម៉ូតូរបស់ជនរងគ្រោះឈ្មោះ ស៊ាម ហុងសាត រហូតបានសម្រេចបញ្ឆេះជិះបាន ជនសង្ស័យដែលមិនស្គាល់ឈ្មោះក៏បានជិះម៉ូតូនោះចេញបាត់ទៅ ដោយមិនឈប់ឲ្យសន្តិសុខត្រួតពិនិត្យឡើយ។
ចំណែកសន្តិសុខយាមច្រកទ្វាររបងផ្សារអ៊ីអន២ នៅពេលឃើញសភាពហេតុការណ៍មិនល្អ ក៏បានបើកកាមេរ៉ាសុវត្ថិភាពឆែកឆេរមើលឃើញ ពួកគេទាំង៣នាក់កំពុងតែធ្វើសកម្មភាពលួចម៉ូតូ ដោយនៅសល់បក្ខពួកគេ២នាក់ក៏ឃាត់ទុកសួរនាំ តែខណៈនោះ ជនរងគ្រោះដល់វេនបញ្ចប់ការងារចុះមកយកម៉ូតូរបស់ខ្លួនជិះទៅផ្ទះវិញមិនឃើញក៏មកសួរនាំសន្តិសុខ ទើបខាងសន្តិសុខហៅប៉ូលិសមូលដ្ឋានឲ្យមកទទួលយកជនសង្ស័យទាំង២នាក់ទីចាត់ការតាមច្បាប់ ដោយនាំទាំងជនរងគ្រោះជាម្ចាស់ម៉ូតូឲ្យមកដាក់ពាក្យបណ្តឹងផងដែរ។
រីឯក្រុមជនសង្ស័យទាំង២នាក់ ដែលគេបានឃាត់ខ្លួនខាងលើនោះវិញ បានបដិសេដថា ពួកខ្លួនបានមានគំនិតចូលរួមលួចម៉ូតូនេះទេ ប៉ុន្តែដោយសារចាញ់បោកជនសង្ស័យម្នាក់នោះ ដែលបានលួចយកម៉ូតូគេទៅបាត់ ស្មានតែជាម៉ូតូរបស់វា ទើបពួកខ្លួនធ្វើសោម៉ូតូឲ្យដូច្នេះ ដូចមកឲ្យគេដាក់ខ្នោះ។
នៅក្នុងការឃាត់ជនសង្ស័យទាំង២នាក់ខាងលើនោះ ប៉ូលិសបានដកហូត រថយន្តម៉ាក់កាមរី បាឡែនមួយគ្រឿង ពាក់ស្លាកលេខ ភ្នំពេញ 2AD-9910 ដែលមានបំពាក់ស្លាកសញ្ញារថយន្តតាក់ស៊ីនៅលើដំបូល ដែលឈ្មោះ សំ រិទ្ឋ បានបើកបរមកចូលរួមធ្វើសកម្មភាពប្រព្រឹត្តបទល្មើសខាងលើ៕
Source: Kampuchea Thmey Daily
0 Comments