ភ្នំពេញ ៖ រទេះគោពីបរមបុរាណរបស់ខ្មែរយើង តាំងពីដូនតាមកកំពុងត្រូវបានម្ចាស់សណ្ឋាគារធំៗនិងម្ចាស់ភូមិគ្រឹះជាច្រើនទិញយកទៅតាំងលំអនៅតាមសួនច្បាររបស់គេ។
យោងតាមប្រភពពីបងប្រុសសុខ គឹមសាន ដែលជាអ្នករស់នៅស្រុកថ្មពួក ខេត្តឧត្តមានជ័យបាននិយាយថា សព្វថ្ងៃនេះបងប្រុសជាអ្នកធ្វើរទេះគោសម្រាប់ដាក់លក់ឲ្យបណ្តាអ្នកមានទ្រព្យសម្បត្តិយកទៅដាក់លំអនៅតាមបណ្តាសណ្ឋាគារនិងភូមិគ្រឹះភោជនីយដ្ឋានរបស់គេ។
បើប្រជាពលរដ្ឋទិញយកទៅប្រើប្រាស់នោះ គឺមានភាគតិចណាស់ ហើយលក់មិនបានថ្លៃទៀត។ បងប្រុសបញ្ជាក់ថា រទេះគោដែលអ្នកមានទ្រព្យសម្បត្តិទិញយកទៅតាំងលំអនោះគឺជារទេះសំឡីដែលមានរាងតូចច្រឡឹងនិងស្រាលដែលគេនិយមយកទៅប្រណាំងលេងនៅរដូវបុណ្យជាតិធំៗ។ ចំពោះតម្លៃវិញគឺមួយគ្រឿងថ្លៃ៧៦០ដុល្លារ តែបើឈ្មួញដឹកយកទៅលក់ដល់ទីក្រុងភ្នំពេញនិងបណ្តាទីរួមខេត្តធំៗ ដូចជាខេត្តសៀមរាប កំពង់សោមនិងកោះកុងគេអាចលក់បានរហូតដល់១០០០ដុល្លារក្នុង១គ្រឿង។ ហើយសព្វថ្ងៃនេះ មានអ្នកកុម្ម៉ង់ទិញច្រើនសឹងរកធ្វើជូនម៉ូយមិនទាន់៕
Source: Kampuchea Thmey Daily
0 Comments