ភ្នំពេញ ៖ បន្ទាប់ពីគណៈកម្មាធិការជាតិរៀបចំការបោះឆ្នោត (គ.ជ.ប) បានបញ្ជូនសេចក្តីព្រាងបទបញ្ជា និងនីតិវិធីសម្រាប់ការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ (ប.ន.ក) អាណតិ្តទី៣ ទៅកាន់ភាគីពាក់ព័ន្ធ ចំនួន៣៣ ស្ថាប័ន ដើម្បីពិនិត្យ និងផ្តល់យោបល់រួចមក គ.ជ.ប បានទទួលអនុសាសន៍ត្រលប់មកវិញពីស្ថាប័នចំនួន៨ គិតត្រឹមថ្ងៃទី២៩ ខែមករា ឆ្នាំ២០១៩។
ស្ថាប័នទាំងនោះរួមមាន ទី១, អគ្គលេខាធិការដ្ឋានព្រឹទ្ធសភា ទី២, ក្រសួងមហាផ្ទៃ ទី៣, ក្រសួងព័ត៌មាន ទី៤, គណបក្សប្រជាជនកម្ពុជា ទី៥, គណបក្សយុវជនកម្ពុជា ទី៦, គណបក្សមាតុភូមិយើង ទី៧, សហគមន៍គ្រួសារអភិវឌ្ឍន៍កសិកម្ម និងទី៨, សមាគមជ័យលាភីបញ្ញាជនកម្ពុជា ។
រាល់អនុសាសន៍ទាំងអស់របស់ស្ថាប័នទាំងនេះ អគ្គលេខាធិការដ្ឋាន គ.ជ.ប នឹងរៀបចំដាក់តាមជំពូកនីមួយៗ ដើម្បីយកទៅពិភាក្សាក្នុងកិច្ចប្រជុំ គ.ជ.ប នៅពេលខាងមុខ មុននឹងដាក់ឱ្យប្រើប្រាស់ជាផ្លូវការ ហើយការបោះឆ្នោតជ្រើសរើសក្រុមប្រឹក្សានឹងប្រព្រឹត្តទៅនៅថ្ងៃទី២៦ ខែឧសភា ឆ្នាំ២០១៩។
សូមបញ្ជាក់ថា គណៈកម្មាធិការជាតិរៀបចំការបោះឆ្នោត (គ.ជ.ប) បានបញ្ជូនសំណើពិនិត្យ និងផ្តល់យោបល់ លើសេចក្តីព្រាងបទបញ្ជា និងនីតិវិធីសម្រាប់ការបោះឆ្នោតជ្រើសក្រុមប្រឹក្សារាជធានី-ខេត្ត-ក្រុង-ស្រុក-ខណ្ឌ ហៅកាត់ថា ការបោះឆ្នោតជ្រើសរើសក្រុមប្រឹក្សា ទៅឲ្យភាគីពាក់ព័ន្ធ កាលពីថ្ងៃទី១៥ ខែមករា ឆ្នាំ២០១៩ ដើម្បីជួយពិនិត្យពិចារណា និងកែតម្រូវ មុន គ.ជ.ប អនុម័តដាក់ឲ្យប្រើប្រាស់ជាផ្លូវការ ហើយភាគីពាក់ព័ន្ធ ដែលទទួលបានសេចក្តីព្រាងបទបញ្ជា និងនីតិវិធីរួមមាន ទី១, អគ្គលេខាធិការដ្ឋានក្រុមប្រឹក្សាធម្មនុញ្ញ ទី២, អគ្គលេខាធិការដ្ឋានព្រឹទ្ធសភា ទី៣, អគ្គលេខាធិការដ្ឋានរដ្ឋសភា ទី៤, ក្រសួងមហាផ្ទៃ ទី៥, ក្រសួងយុត្តិធម៌ ទី៦, ក្រសួងការពារជាតិ ទី៧, ក្រសួងព័ត៌មាន ទី៨, គណបក្សនយោបាយ ចំនួន២០ ទី៩, ស្ថានទូតជប៉ុន ប្រចាំនៅកម្ពុជា ទី១០, ស្ថានទូតសហភាពអឺរ៉ុបប្រចាំនៅកម្ពុជាទី១១, អង្គការមិនមែនរដ្ឋាភិបាលជាតិ និងសមាគមចំនួន២០។
ជាមួយគ្នានោះ គណៈកម្មាធិការជាតិរៀបចំការបោះឆ្នោតបានប្រាប់ឲ្យភាគីពាក់ព័ន្ធទាំងអស់ត្រូវបញ្ជូនការផ្តល់យោបល់លើសេចក្តីព្រាងបទបញ្ជា និងនីតិវិធីនេះ មក គ.ជ.ប វិញយ៉ាងយូរត្រឹមថ្ងៃទី២៥ ខែមករា ឆ្នាំ២០១៩។ សេចក្តីព្រាងបទបញ្ជា និងនីតិវិធីសម្រាប់ការបោះឆ្នោតជ្រើសរើសក្រុមប្រឹក្សា មាន៣ជំពូក ១៣ផ្នែក និងឧបសម្ព័ន្ធចំនួន៧ ស្មើនឹង៣២៥ ទំព័រ មានបង្ហោះនៅលើគេហទំព័ររបស់គ.ជ.ប៕
Source: Kampuchea Thmey Daily
0 Comments