កំពង់ចាម ៖ កុមារាពិការអវយវៈ និងជាមនុស្សគថ្លង់ម្នាក់ អាយុ៧ឆ្នាំ បានបង្កឲ្យមានភាពភ្ញាក់ផ្អើលដល់សមត្ថកិច្ច និងប្រជាពលរដ្ឋ ដោយសារដើរពុំរួច ស្រាប់តែឃើញជាសព ចង.ក ទៅវិញ។ ទោះបីឃើញផ្ទាល់នឹងភ្នែកបែបនេះក៏ដោយ វាមិនអាចធ្វើឲ្យសមត្ថកិច្ចជំនាញជឿជាក់បានឡើយ រហូតមានការស៊ើបអង្កេត និងឈានទៅចាប់ខ្លួនជនសង្ស័យម្នាក់ ជាអនីតិជនដូចគ្នា។
ប៉ូលិសបានឲ្យដឹងថា នៅថ្ងៃទី២៥ ខែមករា ឆ្នាំ២០១៩ វេលាម៉ោង១២និង០០នាទី សមត្ថកិច្ចនគរបាលទទួលបានព័ត៌មាន និងបណ្ដឹងពី ឈ្មោះ ជឹម សាវឿន ភេទស្រី អាយុ៤៩ឆ្នាំ រស់នៅភូមិទ្រាន ឃុំទ្រាន ស្រុកកំពង់សៀម ខេត្តកំពង់ចាម បានឲ្យដឹងថា ឈ្មោះ ស៊ាក ម៉េងហ៊ាង ភេទប្រុសអាយុ០៧ឆ្នាំ (មនុស្សគថ្លង់) ដែលត្រូវជាចៅរបស់គាត់ បានចង.ក សម្លាប់ខ្លួននៅព្រៃខាងក្រោយផ្ទះកាលពីថ្ងៃ២៤ ខែមករា ឆ្នាំ២០១៩ វេលាម៉ោងប្រហែល១១និង០០។ បន្ទាប់ពីទទួលបានព័ត៌មាន និងបណ្ដឹងភ្លាម កម្លាំងសមត្ថកិច្ចជំនាញអធិការដ្ឋាននគរបាលស្រុកកំពង់សៀម ប៉ុស្តិ៍នគរបាលទ្រាន ជំនាញការិយាល័យព្រហ្មទណ្ឌកម្រិតធ្ងន់ ការិយាល័យបច្ចេកទេសវិទ្យាសាស្ត្រ បានសហការធ្វើការស្រាវជ្រាវសពឃើញថា ជាករណីឃាតកម្ម មិនមែនអត្តឃាតទេ។
ក្នុងហេតុការណ៍ខាងលើនោះដែរ ពេលសមត្ថកិច្ច បានចុះធ្វើការស្រាវជ្រាវ រហូតមកដល់ថ្ងៃ២៨ ខែមករា ឆ្នាំ២០១៩ បានកំណត់ជនសង្ស័យម្នាក់ ឈ្មោះ (ថធ) អាយុ១១ឆ្នាំ ភេទប្រុស សញ្ជាតិខ្មែរ មានទីលំនៅភូមិវាលគ្រៀល ឃុំទ្រាន ស្រុកកំពង់សៀម ខេត្តកំពង់ចាម និងហៅមកសួរនាំនៅចំពោះមុខអាណាព្យាបាល(ម្ដាយ)។
ជនសង្ស័យបានសារភាពថា នៅថ្ងៃទី២៤ ខែមករា ឆ្នាំ២០១៩ វេលាម៉ោង១១ ខ្លួនបានជិះកង់ចេញពីចម្ការរបស់ខ្លួន ចំណុចខាងលើ ទំនប់ត្រួយចេក ឆ្ពោះមកផ្ទះរបស់ខ្លួន នៅជាប់របងវត្តទ្រាន ក៏បានជួបជាមួយ ឈ្មោះ ស៊ាក ម៉េងហ៊ាង អាយុ០៧ឆ្នាំ ជាមនុស្សគថ្លង់ ស្វិតជើងទាំងពីរ ដើរដោយកង់រុញ ពេលនោះខ្លួន (ជនសង្ស័យ)ក៏បានឈប់កង់ ហើយបានធ្វើសកម្មភាពលើកបី ឈ្មោះ ស៊ាក ម៉េងហ៊ាង កាត់ព្រៃចុះទៅដល់ចំណុចកើតហេតុ ក៏យកខ្សែបំពង់ទឹកត្នោត ពណ៌ខ្មៅសរសៃតូច យកទៅចងរុំ ក ជនរងគ្រោះ ហើយអូសទៅចំណុចព្រៃ ក្រោមដើមសង្កែ រួចក៏ធ្វើសកម្មភាពកាន់កន្ទុយខ្សែឡើងលើ ដើមសង្កែ រឹត.ក ជនរងគ្រោះប្រកាច់ស្លាប់ភ្លាមៗ។
ជនសង្ស័យបានបញ្ជាក់ថា មូលហេតុបណ្ដាលឲ្យខ្លួនសម្លាប់ជនរងគ្រោះ ព្រោះខឹងនឹងឈ្មោះ ម៉េង ហា៑ង កាលពី៤ថ្ងៃមុន បានយកដុំថ្មគប់ជើងខ្លួន។
បន្ទាប់ពីសមត្ថកិច្ចបញ្ជូនសំណុំរឿងដល់ព្រះរាជអាជ្ញាអមតុលាការខេត្តកំពង់ចាមហើយ លោក ហួត វុទ្ធី ព្រះរាជអាជ្ញាអមសាលាដំបូងខេត្តកំពង់ចាម បានអនុញ្ញាតឲ្យជនសង្ស័យត្រឡប់ទៅមូលដ្ឋានវិញ ដោយជនសង្ស័យជាអនីតិជនមិនទាន់គ្រប់អាយុត្រូវឃុំខ្លួន៕
Source: Kampuchea Thmey Daily
0 Comments