បាល់ទាត់ ៖ ក្លិបបាល់ទាត់ព្រះខ័នរាជស្វាយរៀង សមាជិកពានរង្វាន់លីគកំពូលកម្ពុជា (Metfone Cambodian League) នៅថ្ងៃច័ន្ទ សប្ដាហ៍នេះ បានប្រកាសបង្ហាញមុខកីឡាករបរទេសថ្មីម្នាក់ទៀត គឺជនជាតិកាម៉េរ៉ូន Privat Mbarga ក្រោយក្លិបបានចែកផ្លូវជាមួយខ្សែប្រយុទ្ធជនជាតិអង់គ្លេស Harley Williard កាលពីពេលថ្មីៗ មុនរដូវកាលឆ្នាំ២០១៩ មកដល់នៅពេលខាងមុខ។
យោងតាមការកំណត់របស់សហព័ន្ធកីឡាបាល់ទាត់កម្ពុជា (ស.ប.ក) បានបញ្ជាក់ថា ក្លិបជាសមាជិករបស់លីគខ្លួនមានសិទ្ធិចុះបញ្ជីកីឡាករបរទេសចំនួន៥នាក់ ប៉ុន្តែដាច់ខាត ក្នុងនោះត្រូវតែមានកីឡាករជាជនជាតិសមាជិកទ្វីបអាស៊ី១រូប។
គិតត្រឹមពេលនេះ កីឡាករ Privat គឺជាកីឡាករបរទេសទី៥ របស់ក្លិបដែលមានមូលដ្ឋាន នៅខេត្តស្វាយរៀង មួយនេះ បន្ទាប់ពី Charlie Machell ជនជាតិអង់គ្លេស, Jonathan Campbell ជនជាតិអាមេរិក, Yeon Gisung កូរ៉េខាងត្បូងនិង Daisuke Kobayashiជនជាតិជប៉ុន។
កីឡាករ Privat បានធ្វើដំណើរមកកាន់ប្រទេសកម្ពុជា កាលពីឆ្នាំ២០១៤ ដោយចូលរួមជាមួយក្រុមបឹងកេតអែហ្វស៊ី ខណៈនៅឆ្នាំ២០១៥ បានផ្ទេរទៅចូលរួមជាមួយក្រុមវេស្ទើនភ្នំពេញ ហើយនៅឆ្នាំ២០១៦ ចេញទៅក្លិបអង្គរថាយហ្គឺរ ហើយនៅឆ្នាំ២០១៧ ចេញទៅចូលជាមួយក្រុមថៃ Samut Prakan FC និងចុងក្រោយត្រឡប់មកកាន់កម្ពុជា វិញនៅឆ្នាំ២០១៨ ដោយចូលរួមជាមួយក្រុមអាស៊ីអឺរ៉ុប។
ជុំវិញដំណើរមកដល់របស់កីឡាករវ័យ២៨ឆ្នាំខាងលើ លោក Conor Nestor គ្រូបង្វឹករបស់ក្រុមព្រះខ័នរាជស្វាយរៀង បានលើកឡើងថា ៖ «កាលពីរដូវកាលមុន Privat បានទាត់ចូលក្រុមយើង៤គ្រាប់ ហើយបង្កើតឱកាសចំនួន៣លើក ដល់មិត្តរួមក្រុម(អាស៊ីអឺរ៉ុប)។
អីចឹង យើងពិតជារីករាយក្នុងការនាំយករូបគេមកចូលរួមជាមួយក្រុមយើង ព្រោះគេមិនត្រឹមតែមានគុណបញ្ចប់ទីល្អនោះទេ Privat ក៏មានល្បឿនលឿនដែរ ដែលអាចបង្កគ្រោះថ្នាក់ និងក្ដីបារម្ភដល់គូប្រជែង ហើយវាក៏ជារឿងចំណេញសម្រាប់យើងដែរ»។
ក្រុមព្រះខ័នរាជស្វាយរៀង ដែលដឹកនាំដោយ លោក Conor Nestor ទទួលចំណាត់ថ្នាក់មិនសូវបានល្អនោះទេ ប្រចាំរដូវកាលឆ្នាំ២០១៨ ទាំងក្នុងពានរង្វាន់លីគកំពូលកម្ពុជា និងពានរង្វាន់ សម្ដេចតេជោ ហ៊ុន សែន បើធៀបនឹងលទ្ធផលតាមឆ្នាំកន្លងមក។ យ៉ាងណានៅរដូវកាលឆ្នាំ២០១៩ ខាងមុខក្លិប បានរៀបចំស្រួលបួលជាបណ្តើរៗហើយ។ ចំពោះលីគកំពូលកម្ពុជា វិញក្រោយប្រកួតបាន២២លើក ឈ្នះបាន១០លើក ហើយស្មើគ្នាបាន៣លើក និងបរាជ័យរហូតដល់៩លើក ឈរចំណាត់ថ្នាក់លេខ៦បណ្ដោះអាសន្ន ក្នុងចំណោមក្លិបជាសមាជិកទាំង១២។ ចំណែកពានរង្វាន់សម្ដេចតេជោ ហ៊ុន សែន វិញ ក្រុមនេះ បានធ្លាក់ត្រឹមវគ្គ៨ក្រុមចុងក្រោយ បន្ទាប់ពីចាញ់អង្គរថាយហ្គឺរ៕
Source: Kampuchea Thmey Daily
0 Comments