ភ្នំពេញ ៖ ដើម្បីពង្រឹងសមត្ថភាព និងតម្លាភាពយុត្តិធម៌ក្នុងការប្រឡងជ្រើសរើសនាយទាហាន នៃកងយោធពលខេមរភូមិន្ទ នៅឆ្នាំ២០១៩នេះ លោកឧត្ដមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទមេបញ្ជាការកងទ័ពជើងគោក និងជាប្រធានអនុគណៈកម្មការប្រឡង បានហាមដាច់ខាតមិនឲ្យមានកិច្ចអន្តរាគមន៍ណាមួយ ទោះថ្នាក់ណាក៏ដោយចូលកិច្ចការប្រកបដោយយុត្តិធម៌របស់គណៈកម្មការប្រឡងនោះឡើយ។
លោកឧត្ដមសេនីយ៍ឯក ហ៊ុន ម៉ាណែត បានលើកឡើងថា ការជ្រើសរើសបេក្ខជនឲ្យចូលបម្រើកងទ័ព តាមរយៈគណៈកម្មការប្រលងជ្រើសរើសនាយទាហាននេះធ្វើយ៉ាងណារើសឲ្យបានសុក្រឹត រើសឲ្យបានត្រឹមត្រូវ។ និយាយរួម គឺមានតែគោលការណ៍មួយគត់ឲ្យអ្នកជាប់ជាប់ដោយសមត្ថភាព និងមានមោទនភាព ហើយអ្នកធ្លាក់ធ្លាក់ដោយអស់ចិត្ត។ ចំណែកគណៈកម្មការដែលមានភាពត្រឹមត្រូវនោះ នឹងមិនរងនូវការរិះគន់ ឬវាយប្រហារ ហើយនេះ គឺជាជោគជ័យនៅក្នុងរយៈពេល៤ឆ្នាំនេះ នៃសកម្មភាពបំពេញភារកិច្ចរបស់យើង។ មិនតែប៉ុណ្ណោះ ការអនុវត្តគោលការណ៍ប្រកបដោយយុត្តិធម៌ និងតម្លាភាពនេះ នឹងក្លាយជាបទពិសោធន៍ នឹងបន្តជោគជ័យនៅឆ្នាំនេះ និងឆ្នាំក្រោយៗទៀត។
លោកឧត្ដមសេនីយ៍ឯក ហ៊ុន ម៉ាណែត បានសង្កត់ធ្ងន់ថា ភារកិច្ចចម្បងរបស់យើងនៅក្នុងការជ្រើសរើសនាយទាហាននេះ គឺយើងជ្រើសរើសនាយទាហានដែលមានសមត្ថភាពពិតប្រាកដទៅតាមវិធានការវិធីសាស្ត្រតម្លាភាពប្រសិទ្ធភាព យុត្តិធម៌ ហើយនេះ គឺជាគោលដៅធំ ដែលថ្នាក់ដឹកនាំប្រគល់ឲ្យ។ លោកសង្ឃឹមថា គណៈកម្មការ នឹងទទួលបានជោគជ័យបន្ថែមទៀត ដោយសិក្សាអំពីចំណុចខ្វះខាតពីឆ្នាំកន្លងទៅ ហើយត្រូវធ្វើផែនការឲ្យច្បាស់លាស់ទាំងនីតិវិធី សម្ភារៈពេលវេលាសំដៅយកសុក្រិតភាព និងប្រសិទ្ធភាព។
លោកបន្តថា ការជ្រើសរើសនាយទាហាន នៃកងយោធពលខេមរភូមិន្ទឆ្នាំ២០១៩ នេះមានការកើនឡើង បើប្រៀបធៀបទៅនឹងឆ្នាំ២០១៨ កន្លងមក ហើយការកើនឡើងនេះ គឺបានកើនឡើងនៅតាមបណ្តាយោធភូមិភាគ។
ទន្ទឹមនោះ លោកឧត្ដមសេនីយ៍ឯក ហ៊ុន ម៉ាណែត ក៏បានណែនាំដាក់បទបញ្ជាយ៉ាងម៉ឺងម៉ាត់ទៅដល់ក្រុមការងារថ្នាក់កណ្តាល នៃអនុគណៈកម្មការប្រឡងជ្រើសរើសក៏ដូចជា គណៈមេប្រយោគអគានុរក្ស និងអនុរក្ស និងផ្សេងមិនឲ្យមានការអន្តរាគម និងមិនត្រូវមានមនោសញ្ចេតនាចំពោះបុគ្គលតែត្រូវមានមនោសញ្ចេតនាទូទៅដោយការប្រកួតប្រជែង។ ផ្តើមពីនោះ និងត្រូវរៀបចំផែនការអនុវត្តនីតិវិធីឲ្យបានច្បាស់លាស់ និងអនុវត្តបទបញ្ជាឲ្យបានម៉ឺងម៉ាត់នៅក្នុងការដឹកនាំ និងដំណើរការ នៃការប្រលងជ្រើសរើសនាយទាហាន នៃកងយោធពលខេមរភូមិន្ទ ឆ្នាំ២០១៩ ឲ្យមានសុក្រឹតភាព និងប្រសិទ្ធភាព។
គួរបញ្ជាក់ដែរថា ការប្រលងជ្រើសរើសនាយទាហាន នៃកងយោធពលខេមរភូមិន្ទ វគ្គនាយ ទាហានសកម្មជំនាន់ទី២៣ វគ្គនាយទាហានទ័ពជើងគោកជំនាន់ទី១១ វគ្គនាយទាហានបន្ត វេនជំនាន់ទី១២ និងវគ្គនាយទាហានជំនាញបច្ចេកទេសយោធា ឆ្នាំ២០១៩នេះ នឹងប្រព្រឹត្តទៅនៅថ្ងៃទី១៣-១៥ ខែមករា ឆ្នាំ២០១៩ ខាងមុខ ដែលមានចំនួន៦មណ្ឌល គឺនៅមណ្ឌល រាជធានីភ្នំពេញ យោធភូមិភាគ ទី១ ទី២ ទី៣ ទី៤ និងទី៥ ដោយផ្ដោតទៅលើវិញ្ញាសាចំណេះដឹងទូទៅភាសាបរទេស និងវិញ្ញាសាកីឡាកាយសម្បទា៕
Source: Kampuchea Thmey Daily
0 Comments