រតនគិរី ៖ ម៉ូតូហុងដាឌ្រីម២គ្រឿងពន្លះគ្នានៅកណ្ដាលប្រលានយន្តហោះចាស់យ៉ាងពេញទំហឹងបណ្ដាលឲ្យមនុស្សប្រុសស្រី៣នាក់ បានរងរបួសធ្ងន់ និងស្រាល។
ករណីគ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៤និង៤០នាទីល្ងាច ថ្ងៃព្រហស្បតិ៍៥កើត ខែបុស្ស ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១០ ខែមករា ឆ្នាំ២០១៩ ត្រង់ចំណុចប្រលានយន្តហោះចាស់ ស្ថិតក្នុងភូមិ៧មករា សង្កាត់ឡាបានសៀក ក្រុងបានលុង។
បើតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញស្រីម្នាក់ជិះម៉ូតូក្នុងទិសដៅពីកើតមកលិច ខណៈមកដល់ត្រង់ចំណុចកើតហេតុ ក៏មានម៉ូតូមួយគ្រឿងជិះក្នុងល្បឿនយ៉ាងលឿនពីត្បូងទៅជើងបម្រុងបត់ទៅទិសខាងលិច ស្រាប់តែជ្រុលចង្កូតទៅបុកស្ត្រីម្នាក់កំពុងធ្វើចរាចរណ៍បណ្ដាលឲ្យរងរបួសធ្ងន់ទាំងសងខាង។
មន្ត្រីនគរបាលប៉ុស្តិ៍ឡាបានសៀកបានឲ្យដឹងថា ស្ត្រីរងគ្រោះមានឈ្មោះ សម្ភស្ស អាយុ៣១ឆ្នាំ ជនជាតិខ្មែរ មានទីលំនៅភូមិ/ឃុំកើតហេតុខាងលើ របួសធ្ងន់ ជិះម៉ូតូ១គ្រឿងម៉ាកហុងដាឌ្រីម សេ១២៥ ស៊េរីឆ្នាំ២០១៩ ពណ៌ខ្មៅ ពាក់ស្លាកលេខ រដ្ឋ ១៤ ១-០៣៤៩។
រីឯម៉ូតូ១គ្រឿងទៀតម៉ាកហុងដាឌ្រីម សេ១២៥ ស៊េរីឆ្នាំ២០១៦ ពណ៌ខ្មៅ ពាក់ស្លាកលេខ រតនគិរី ១A-៦៦៩៤ អ្នកបើកបរមានឈ្មោះ ចែម សុវត្តី ភេទប្រុស អាយុ១៥ឆ្នាំ ជនជាតិខ្មែរ ជាសិស្ស មានទីលំនៅភូមិល្អឺន ឃុំអូរជុំ ស្រុកអូរជុំ ខេត្តរតនគិរី របួសស្រាល។
អ្នករួមដំណើរឈ្មោះលី ណារិទ្ធ ភេទប្រុស អាយុ១៥ឆ្នាំ ជនជាតិឥស្លាម មានទីលំនៅភូមិ/ឃុំកើតហេតុខាងលើ របួសធ្ងន់បែកក្បាលហូរឈាមពេញខ្លួន។ ចំណែកម៉ូតូទាំង២គ្រឿង បានរងការខូចខាតទាំងសងខាង។
ក្រោយកើតហេតុ អ្នករងរបួសទាំងសងខាង ត្រូវបានសាច់ញាតិដឹកបញ្ជូនទៅមន្ទីរពេទ្យបង្អែកខេត្តដើម្បីព្យាបាលរបួស។
ដោយឡែកមធ្យោបាយទាំង២គ្រឿង ត្រូវបាននគរបាលចរាចរណ៍រឹបអូសយកមករក្សាទុកនៅការិយាល័យចរាចរណ៍ខេត្តដើម្បីរង់ចាំធ្វើការដោះស្រាយនៅពេលក្រោយ៕
Source: Kampuchea Thmey Daily
0 Comments